അമേരിക്കയില് ഭര്ത്താവ് കുത്തിക്കൊലപ്പെടുത്തിയ മലയാളി നഴ്സ് മെറിന് ജോയിയുടെ മൃതദേഹം നാട്ടിലെത്തിക്കില്ല...സംസ്കാരം അടുത്ത ശനിയാഴ്ച അമേരിക്കയില്
അമേരിക്കയില് ഭര്ത്താവ് കുത്തിക്കൊലപ്പെടുത്തിയ മലയാളി നഴ്സ് മെറിന് ജോയിയുടെ മൃതദേഹം നാട്ടിലെത്തിക്കില്ല. സംസ്കാരം അടുത്ത ശനിയാഴ്ച അമേരിക്കയില് നടത്തുമെന്ന് ബന്ധുക്കള് അറിയിച്ചു.
സൗത്ത് ഫ്ലോറിഡയിലെ ബ്രോവാര്ഡ് ഹെല്ത്ത് ഹോസ്പിറ്റലില് നഴ്സായ മെറിന് ജോയി നൈറ്റ് ഡ്യൂട്ടി കഴിഞ്ഞു വീട്ടിലേക്ക് മടങ്ങവെയാണ് ഭര്ത്താവ് നിവിന് കുത്തി വീഴ്ത്തിയത്.
കഴിഞ്ഞ ഡിസംബറില് കുഞ്ഞുമായി നാട്ടിലെത്തിയ മെറിനും നെവിനും നാട്ടില് വച്ച് അസ്വാരസ്യമുണ്ടാവുകയും നെവിന് വഴക്കിട്ട് നേരത്തെ തിരിച്ചു പോരുകയും ചെയ്തു. മെറിന് കുഞ്ഞിനെ മാതാപിതാക്കളോടൊപ്പം ആക്കിയിട്ട് മയാമിയില് തിരികെയെത്തി ജോലിയില് പ്രവേശിക്കുകയായിരുന്നു.ഡെട്രോയിറ്റില് ജോലി ചെയ്തിരുന്ന നെവിന് ഇന്നലെ മയാമിയില് എത്തി ഹോട്ടലില് റൂം എടുക്കുകയായിരുന്നു.
കോറല് സ്പ്രിംഗ്സിലെ ബ്രോവാര്ഡ് ഹെല്ത്ത് ഹോസ്പിറ്റലില് നഴ്സായ മെറിന് നൈറ്റ് ഡ്യൂട്ടി കഴിഞ്ഞ് ഹോസ്പിറ്റലില് നിന്ന് പുറത്തിറങ്ങിയപ്പോള് കാര് പാര്ക്കിങ്ങില് കാത്തു നിന്ന നെവിന് മെറിനെ ആക്രമിക്കുകയായിരുന്നു. 17 തവണ കത്തി കൊണ്ട് കുത്തിയശേഷം നിലത്തുവീണുകിടന്ന ഭാര്യയുടെ ശരീരത്തില് വാഹനമോടിച്ചു കയറ്റി അതിക്രൂരമായാണ് മെറിനെ നെവിന് കൊലപ്പെടുത്തിയത്.
മെറിന് ഈ ഹോസ്പിറ്റലില് നിന്നും ജോലി രാജി വച്ച് ആഗസ്റ്റ് 15 ന് താമ്പയിലേക്ക് താമസം മാറാന് ഇരിക്കെയാണ് സംഭവം. ഇപ്പോള് ജോലി ചെയ്യുന്ന ഹോസ്പിറ്റലിലെ അവസാനത്തെ ഷിഫ്റ്റ് പൂര്ത്തിയാക്കി പുറത്തിറങ്ങുമ്പോഴാണ് അതിദാരുണമായ അന്ത്യം സംഭവിച്ചത്.
https://www.facebook.com/Malayalivartha
