അയല്‍ രാജ്യമായ നേപ്പാളില്‍ വെള്ളപ്പൊക്കത്തിലും മണ്ണിടിച്ചിലിലും ഇതുവരെ മരണ സംഖ്യ 170 ആയെന്ന് അധികൃതര്‍. ഇതു സംബന്ധിച്ച റിപ്പോര്‍ട്ട് നേപ്പാള്‍ ആഭ്യന്തര മന്ത്രാലയം ഞായറാഴ്ച പുറത്തുവിട്ടു. ദുരന്തങ്ങളില്‍ 111 പേര്‍ക്ക് പരിക്കേറ്റതായും 4,000ത്തോളം പേരെ രക്ഷപ്പെടുത്തിയതായും മന്ത്രാലയം ഞായറാഴ്ച സ്ഥിരീകരിക്കുകയായിരുന്നു.

സുരക്ഷാ ഏജന്‍സികളെ വിന്യസിച്ചതോടെ തിരച്ചില്‍, രക്ഷാപ്രവര്‍ത്തനം, ദുരിതാശ്വാസ പ്രവര്‍ത്തനങ്ങള്‍ എന്നിവ ഊര്‍ജിതമാക്കി. കാവ്രെ, സിന്ധുലി, ലളിത്പൂര്‍ ജില്ലകളില്‍ പരിക്കേറ്റവരോ ഒറ്റപ്പെട്ടവരോ ആയ 162 പേരെ നേപ്പാളി ആര്‍മി ഹെലികോപ്ടറുകള്‍ രക്ഷപ്പെടുത്തി. പരിക്കേറ്റവര്‍ ചികിത്സയില്‍ കഴിയുകയാണ്.

കഴിഞ്ഞ ദിവസങ്ങളില്‍ തുടര്‍ച്ചയായി പെയ്ത മഴയെ തുടര്‍ന്നുണ്ടായ വെള്ളപ്പൊക്കത്തിലും മണ്ണിടിച്ചിലിലും നേപ്പാളിലെ ജലവൈദ്യുത നിലയങ്ങള്‍ക്കും ജലസേചന സൗകര്യങ്ങള്‍ക്കും സാരമായ കേടുപാടുകള്‍ സംഭവിച്ചതായി മന്ത്രാലയം .നിര്‍മ്മാണത്തിലിരിക്കുന്ന 15 ജലവൈദ്യുത നിലയങ്ങള്‍ക്കും കേടുപാടുകള്‍ സംഭവിച്ചു.

വൈദ്യുതി നിലയങ്ങളും ട്രാന്‍സ്മിഷന്‍ ലൈനുകളും തകരാറിലായതിനാല്‍ രാജ്യത്തിന്റെ വിവിധ ഭാഗങ്ങളില്‍ വൈദ്യുതി വിതരണം തടസ്സപ്പെട്ടിരിക്കുകയാണ്.