യെമനില്‍ മെഡിസിന്‍സ് സാന്‍സ് ഫ്രണ്ടിയേഴ്‌സ് (എം.എസ്.എഫ്) ആശുപത്രിക്കു നേരെയുണ്ടായ വ്യോമാക്രമണത്തില്‍ 11 പേര്‍ കൊല്ലപ്പെട്ടു. 19 പേര്‍ക്ക് പരുക്കേറ്റു. ഉത്തര യെമനിലെ ഹജ്ജ പ്രവിശ്യയിലുള്ള അബ്‌സിലാണ് ആക്രമണമുണ്ടായത്. യെമനീസ് സര്‍ക്കാരിനെതിരെ പോരാട്ടം നടത്തുന്ന ഹൂദി വിമതര്‍ക്കെതിരെ യെമന്റെ പിന്തുണയോടെ ആക്രമണം നടത്തുന്ന സൗദി സഖ്യ സൈന്യമാണ് ആശുപത്രിക്കു നേര്‍ക്ക് ആക്രമണം നടത്തിയതെന്ന് റിപ്പോര്‍ട്ടുണ്ട്. എന്നാല്‍ ഇക്കാര്യത്തില്‍ സൗദി വിശദീകരണം നല്‍കിയിട്ടില്ല.
ഈ മേഖലയില്‍ ദിവസങ്ങളായി രൂക്ഷമായ വ്യോമാക്രമണം തുടരുകയായിരുന്നുവെന്ന് പ്രദേശവാസികള്‍ പറയുന്നു. കൊല്ലപ്പെട്ടവരില്‍ എം.എസ്.എഫ് ജീവനക്കാരുമുണ്ട്. രണ്ട് രോഗികളും മരിച്ചിട്ടുണ്ട്. 2015ല്‍ ആരംഭിച്ച യെമന്‍ കലാപത്തില്‍ ഇതിനകം തന്നെ 6,400 പേര്‍ കൊല്ലപ്പെട്ടിട്ടുണ്ടെന്നാണ് കണക്ക്. ഇതില്‍ പകുതിയും സാധാരണക്കാരാണ്. 25 ലക്ഷത്തോളം പേരാണ് വീടുകള്‍ ഉപേക്ഷിച്ച് നാടുവിട്ടതെന്നും യു.എന്‍ കണക്കില്‍ പറയുന്നു.