അമേരിക്കന്‍ ജനതയുടെ ആത്മാവില്‍ മുറിവേല്‍പ്പിച്ച ആ ദുരന്ത ദിനത്തിന് 15 വയസ്സ്. അമേരിക്കയിലെ വേള്‍ഡ് ട്രെഡ് സെന്ററിന് നേരെ ഭീകരാക്രമണം നടന്നിട്ട് ഇന്നേക്ക് 15 വര്‍ഷം. റാഞ്ചിയെടുത്ത യാത്രാവിമാനങ്ങള്‍ ഉപയോഗിച്ച് നടത്തിയ ആക്രമണത്തില്‍ 2,996 പേരുടെ ജീവനുകളാണ് നഷ്ടപ്പെട്ടത്.
2001 സെപ്റ്റംബര്‍ പതിനൊന്നിനായിരുന്നു യുഎസിലെ ഭീകരാക്രമണം. വേള്‍ഡ് ട്രേഡ് സെന്ററിലേക്കും പെന്റഗണിലേക്കും അല്‍ ഖായിദ ഭീകരര്‍ വിമാനങ്ങള്‍ ഇടിച്ചുകയറ്റി നടത്തിയ ആക്രമണങ്ങളില്‍ മൊത്തം 2,996 പേര്‍ കൊല്ലപ്പെട്ടു. നാല് ദീര്‍ഘദൂര യാത്രാവിമാനങ്ങളാണ് ഭീകരര്‍ ആക്രമണത്തിനായി റാഞ്ചിയത്. വലിയ അളവില്‍ ഇന്ധനം നിറച്ചിരുന്നു എന്ന കാരണം കൊണ്ടാണ് വലിയ വിമാനങ്ങള്‍ തന്നെ തെരഞ്ഞെടുത്തത്. ആദ്യ വിമാനം ലോകവ്യാപാര കേന്ദ്രത്തിന്റെ ഒന്നാമത്തെ ടവറിലേക്ക് ഇടിച്ചിറങ്ങിയത് രാവിലെ 8.46ന് ആയിരുന്നു. രണ്ടാമത്തെ വിമാനം ഇരട്ടഗോപുരങ്ങളില്‍ രണ്ടാമത്തേതിലേക്ക് വന്നിടിച്ച് പൊട്ടിത്തെറിച്ചത് 9.03ന്. 9.37ന് മൂന്നാം വിമാനം പെന്റഗണിലേക്ക് ഇടിച്ചിറങ്ങി. വാഷിംഗ്ടണ്‍ ഡി.സി ലക്ഷ്യംവച്ച നാലാം വിമാനം യാത്രക്കാരുമായി പെന്‍സില്‍വാനിയക്ക് സമീപം തകര്‍ന്നു വീണപ്പോള്‍ സമയം 10.03. അല്‍ ഖ്വയ്ദയുടെ 19 ഭീകരരാണ് ആക്രമണത്തില്‍ പങ്കെടുത്തത്. നാലുവിമാനങ്ങളിലുമായി ഉണ്ടായിരുന്ന 246 പേരില്‍ ആരും രക്ഷപ്പെട്ടില്ല. കത്തുന്ന ഇരട്ടഗോപുരങ്ങളില്‍ നിന്ന് പ്രാണഭയത്താല്‍ ചാടിയാണ് 200ലേറെപ്പേര്‍ മരിച്ചത്. 411 രക്ഷാപ്രവര്‍ത്തകരും മരിച്ചു.
ഇരട്ടഗോപുരങ്ങള്‍ തകര്‍ന്നടിഞ്ഞ ഗ്രൗണ്ട് സീറോ ഇന്ന് ആക്രമണത്തില്‍ മരിച്ചവരുടെ ഓര്‍മ്മകള്‍ പേറുന്ന മ്യൂസിയമാണ്. മരിച്ചവരുടെ ബന്ധുക്കളും സുഹൃത്തുക്കളും അടക്കം ആയിരക്കണക്കിന് ആളുകളാണ് ഓര്‍മ്മപ്പൂക്കളുമായി ഇവിടേക്കെത്തുന്നത്. വേള്‍ഡ് ട്രേഡ് സെന്റര്‍ ആക്രമണത്തില്‍ കൊല്ലപ്പെട്ട 23 ഓഫീസര്‍മാരുടെ ബഹുമാനാര്‍ഥം ന്യൂയോര്‍ക്ക് പൊലീസ് വകുപ്പു പരേഡ് നടത്തി. 9/11 അനുസ്മരണ സമ്മേളനം ഇന്ന് നടക്കും.
ഭീകരാക്രമണങ്ങള്‍ക്കെതിരെ ഒരുമയോടെ നിലകൊള്ളണമെന്നു യുഎസ് പ്രസിഡന്റ് ബറാക് ഒബാമ പറഞ്ഞു. യുഎസിനെ ആഴത്തില്‍ മുറിവേല്‍പിച്ച 9/11 ഭീകരാക്രമണത്തിനു 15 വര്‍ഷം തികയുന്നതിന്റെ തലേദിവസം നടത്തിയ റേഡിയോ പ്രഭാഷണത്തിലാണ്, ഇക്കാര്യത്തില്‍ രാജ്യത്തു ഭിന്നതയുണ്ടാകാന്‍ ഇടയാകരുതെന്ന അദ്ദേഹത്തിന്റെ ആഹ്വാനം.
ജാതി, മത, വര്‍ഗ, വിശ്വാസ, ലിംഗ വ്യത്യാസമില്ലാതെ വൈവിധ്യങ്ങളെ ഉള്‍ക്കൊള്ളുന്ന നിലപാടാണ് യുഎസിനെ മഹത്വപൂര്‍ണമാക്കുന്നതെന്ന് ഒബാമ പറഞ്ഞു. റിപ്പബ്ലിക്കന്‍ പ്രസിഡന്റ് സ്ഥാനാര്‍ഥി ഡോണള്‍ഡ് ട്രംപിന്റെ മുസ്‌ലിം വിരുദ്ധ നിലപാടുകളെ പ്രസംഗത്തില്‍ പലവട്ടം ഒബാമ തള്ളിപ്പറഞ്ഞു. കറുത്ത ദിനമായ 9/11നു ശേഷം കാര്യങ്ങള്‍ ഒരുപാടു മാറിയിരിക്കുന്നു. ആക്രമണത്തിന്റെ സൂത്രധാരന്‍ ഉസാമ ബിന്‍ ലാദന് അര്‍ഹിക്കുന്ന ശിക്ഷ നല്‍കി. രാജ്യത്തിന്റെ സുരക്ഷ ശക്തിപ്പെടുത്തി.
ആക്രമണങ്ങളെ തടഞ്ഞു. എങ്കിലും ഭീകരാക്രമണ ഭീഷണി കെട്ടടങ്ങിയിട്ടില്ല. ഭീകര സംഘടനകളായ അല്‍ ഖായിദയ്ക്കും ഐഎസിനുമെതിരായ പോരാട്ടം തുടരും. നാം അവരെ തകര്‍ക്കുമെന്നും ഒബാമ പറഞ്ഞു.