കൊല്ലം അയത്തില്‍ ഗോപാലശേരി ജി.വി. നഗര്‍ ഗുരുലീലയില്‍ സിനിയുടെ (46) നാട്ടുകാരെ ഒന്നാകെ അമ്പരപ്പിച്ചിരുന്നു. അധ്യാപികയുടെ മരണത്തില്‍ സംശയത്തോടെ പിടികൂടിയ ഫേസ്ബുക്ക് കാമുകനെ നിരപരാധിയാണെന്ന് കണ്ടെത്തിയതിനെ തുടര്‍ന്ന് വിട്ടയച്ചു. 

അതേസമയം തൂങ്ങിമരിച്ച നിലയില്‍ കണ്ടെത്തിയ അധ്യാപിക സിനിക്ക് മാനസികവിഭ്രാന്തിയുണ്ടായിരുന്നതായി പോലീസ്. ബോര്‍ഡര്‍ലൈന്‍ പഴ്‌സണാലിറ്റി ഡിസോര്‍ഡര്‍ എന്ന മാനസികപ്രശ്‌നത്തിന് സിനി ചികിത്സയിലായിരുന്നുവെന്നും അന്വേഷണത്തില്‍ വ്യക്തമായി. ഇതേത്തുടര്‍ന്നു സിനിയുടെ കാമുകന്‍ മലപ്പുറം സ്വദേശി വിഷ്ണുവിനെ പ്രതിചേര്‍ക്കാതെ പോലീസ് വിട്ടയച്ചു. 

വിഷ്ണുവുമായി വഴക്കിട്ടശേഷമാണ് സിനി വീടിനുള്ളില്‍ തൂങ്ങിമരിച്ചത്. സിനിയെ ചികിത്സിച്ചിരുന്ന കോഴിക്കോട് കുതിരവട്ടം മാനസികാരോഗ്യ കേന്ദ്രത്തിലെ ഡോക്ടറുമായി ബന്ധപ്പെട്ടാണു പോലീസ് രോഗം സംബന്ധിച്ച വിവരങ്ങള്‍ കണ്ടെത്തിയത്. 

അമിതമായുണ്ടാകുന്ന വികാരത്തെ നിയന്ത്രിക്കാനാവാതെ വൈകാരിക സ്ഥിരത നഷ്ടപ്പെടുന്ന മാനസികവൈകല്യമാണ് ബോര്‍ഡര്‍ലൈന്‍ പഴ്‌സണാലിറ്റി ഡിസോഡര്‍ എന്ന മാനസികരോഗം. ഇമോഷണലി അണ്‍സ്‌റ്റേബിള്‍ പഴ്‌സണാലിറ്റി ഡിസോര്‍ഡര്‍ എന്നും ഈ രോഗം അറിയപ്പെടുന്നു.

അപകടകരമായ ലൈംഗികസ്വഭാവം, ആത്മഹത്യാശ്രമം, ഭീഷണി, വഴക്കടിക്കല്‍, സ്വയം പരുക്കേല്‍പ്പിക്കാനുള്ള ശ്രമം, അമിതമായ ദേഷ്യം മനോനിലയില്‍ അടിക്കടിയുണ്ടാകുന്ന വ്യതിയാനം, ചെറിയ പ്രശ്‌നങ്ങളിലെ അനാവശ്യമായ ഉല്‍കണ്ഠയും പിരിമുറുക്കവും മനോവിഭ്രാന്തിയുമാണ് പ്രധാന ലക്ഷണങ്ങള്‍. 

സിനി മാനസികരോഗത്തിനു ചികിത്സതേടിയിരുന്നതായി വിഷ്ണു പോലീസിനോട് വെളിപ്പെടുത്തിയിരുന്നു. ശനിയാഴ്ച സിനിയെ കാണാനെത്തിയശേഷം തിരികെ പോകാനൊരുങ്ങിയപ്പോള്‍ സിനി തടസം നിന്നതായും തുടര്‍ന്ന് അക്രമാസക്തയായി ദേഹം മുഴുവന്‍ മാന്തിപ്പറിച്ചെന്നും സഹിക്കാന്‍ കഴിയാതെ വന്നപ്പോള്‍ താന്‍ നിലവിളിച്ചു പുറത്തേക്ക് ഓടിയതെന്നുമായിരുന്നു വിഷ്ണുവിന്റെ വെളിപ്പെടുത്തല്‍. 

ഓടിയെത്തിയ നാട്ടുകാരോടു ആക്രമിച്ച കാര്യവും സിനി വീട്ടിനകത്തു കയറി വാതില്‍ അടച്ചെന്നും വിഷ്ണു പറഞ്ഞു. തുടര്‍ന്ന് നാട്ടുകാര്‍ വിവരം അറിയിച്ചതിനെത്തുടര്‍ന്നെത്തിയ പോലീസ് സംഘം വാതില്‍ ചവിട്ടിത്തുറന്നപ്പോഴാണു തൂങ്ങിമരിച്ച നിലയില്‍ സിനിയെ കണ്ടെത്തിയത്.
രണ്ടുവര്‍ഷം മുമ്പാണ് ഫേസ്ബുക്ക് വഴി സിനിയും വിഷ്ണുവും തമ്മില്‍ അടുപ്പത്തിലായതും സൗഹൃദം പിന്നീട് പ്രണയമായി മാറിയതും വഴിവിട്ട ബന്ധത്തില്‍ കലാശിച്ചതും.