പോലീസ് ഡ്രൈവറെ എഡിജിപിയുടെ മകള്‍ മര്‍ദിച്ച കേസില്‍ ഏക ദൃക്‌സാക്ഷിയായ ഓട്ടോ ഡ്രൈവറെ കാണാനില്ല; തിരുവനന്തപുരം സ്വദേശിയായ ഓട്ടോ ഡ്രൈവറെ അന്വേഷിച്ചെങ്കിലും കണ്ടെത്താനായില്ലെന്ന് ക്രൈംബ്രാഞ്ച്; ഡ്രൈവറെ കണ്ടെത്തിയാലേ തുമ്പുണ്ടാക്കാന്‍ കഴിയൂവെന്നാണ് അന്വേഷണസംഘം
എഡിജിപി സുദേഷ്‌കുമാറിന്റെ മകള്‍ സ്‌നിഗ്ധ കുമാര്‍ പോലീസ് ഡ്രൈവര്‍ ഗവാസ്‌കറെ മര്‍ദിച്ചെന്ന കേസില്‍ ഏകദൃക്‌സാക്ഷിയായ ഓട്ടോറിക്ഷാ ഡ്രൈവറെ കാണാനില്ലെന്ന് റിപ്പോര്‍ട്ട്. തിരുവനന്തപുരം സ്വദേശിയായ ഓട്ടോ ഡ്രൈവറെ അന്വേഷിച്ചെങ്കിലും കണ്ടെത്താനായില്ലെന്നാണു ക്രൈംബ്രാഞ്ച് പറയുന്നത്. ഓട്ടോ ഡ്രൈവര്‍ക്കായുള്ള തെരച്ചില്‍ തുടരുകയാണെന്നും നോട്ടീസ് ഇറക്കുന്നതു പരിഗണനയിലാണെന്നും അന്വേഷണസംഘം വ്യക്തമാക്കി. ഓട്ടോ ഡ്രൈവറെ കണ്ടെത്തിയാലേ കേസില്‍ തുമ്പുണ്ടാക്കാന്‍ കഴിയൂവെന്നാണ് അന്വേഷണസംഘത്തിന്റെ നിലപാട്.
സംഭവശേഷം ഇയാളുടെ ഓട്ടോയിലാണു സ്‌നിഗ്ധ തലസ്ഥാനത്തെ എസ്പി ഫോര്‍ട്ട് ആശുപത്രിയില്‍ ചികിത്സയ്ക്കായി പോയത്. ആശുപത്രിയില്‍ ഡോക്ടറോടു പറഞ്ഞത് ഓട്ടോ ഇടിച്ച് പരുക്കേറ്റെന്നാണ്. ഇക്കാര്യം ഡോക്ടര്‍ ആശുപത്രി രജിസ്റ്ററില്‍ രേഖപ്പെടുത്തുകയും ചെയ്തു.
സംഭവം നടന്ന് ഒരുമാസം കഴിഞ്ഞിട്ടും സ്‌നിഗ്ധയെ കേന്ദ്രീകരിച്ച് അന്വേഷണം നടത്താന്‍ ക്രൈംബ്രാഞ്ച് തയാറാകാത്തതിനു പിന്നില്‍ ഐപിഎസ് അസോസിയേഷന്റെ സമ്മര്‍ദമാണെന്നാണ് ആരോപണം. ദാസ്യപ്പണി വിവാദത്തെത്തുടര്‍ന്നു പോലീസ് ആസ്ഥാനത്തു ചേര്‍ന്ന അസോസിയേഷന്‍ യോഗത്തില്‍ ഔദ്യോഗികപക്ഷവും തച്ചങ്കരി പക്ഷവും ഒന്നിച്ച് സുദേഷ്‌കുമാറിനു പിന്നില്‍ അണിനിരന്നിരുന്നു.
എന്നാല്‍, കേസില്‍ ഹൈക്കോടതി നിലപാട് ഗവാസ്‌കര്‍ക്ക് അനുകൂലമാണ്. സ്‌നിഗ്ധയുടെ എതിര്‍പരാതിയില്‍ ഗവാസ്‌കറുടെ അറസ്റ്റ് തടഞ്ഞ ഹൈക്കോടതി, എഡിജിപിയുടെ മകള്‍ക്കു പ്രത്യേകപരിഗണനയില്ലെന്നും വ്യക്തമാക്കി.
https://www.facebook.com/Malayalivartha
