മലപ്പുറം മമ്പാട് പൊങ്ങല്ലൂര്‍ അണ്ടിക്കുന്നില്‍ നേരിയ ഭൂചലനമുണ്ടായെന്ന സംശയത്തെത്തുടര്‍ന്ന് റവന്യൂ സംഘം പരിശോധന നടത്തി. ഇവിടത്തെ കുടുംബങ്ങളോട് ബന്ധുവീടുകളിലേക്ക് മാറിത്താമസിക്കാന്‍ നിര്‍ദ്ദേശം നല്‍കി. വെള്ളിയാഴ്ച രാത്രി 10 മണിയോടെയാണ് സംഭവം. പ്രദേശത്ത് മൂന്ന് തവണയായി വലിയ ശബ്ദം കേട്ടിരുന്നതായി നാട്ടുകാര്‍ പറയുന്നു. രാത്രി ഒന്‍പതോടെ നിരവധിയാളുകള്‍ ഇവിടെ തടിച്ചു കൂടി. കളക്ടറേയും തഹസില്‍ദാരേയും വിവരം ധരിപ്പിച്ചു. നിലമ്പൂര്‍ ഡെ.തഹസില്‍ദാരുടെ നേതൃത്വത്തില്‍ ഉദ്യോഗസ്ഥരെത്തി പരിശോധന നടത്തുകയായിരുന്നു. ഒരു വീടിന് വിള്ളല്‍ കണ്ടെത്തിയിട്ടുണ്ട്. ശനിയാഴ്ച വിദഗ്ധ പരിശോധനകള്‍ നടത്തി.

കനത്ത മഴയില്‍ 25 ഇടങ്ങളിലാണ് മണ്ണിടിച്ചിലുണ്ടായത്. ഇടുക്കിയില്‍ 21 സ്ഥലങ്ങളില്‍ മണ്ണിടിഞ്ഞു. ചിന്നാറിനടുത്ത് മുരിക്കശേരി, അടിമാലി റൂട്ട്, രാജപുരം, കഞ്ഞിക്കുഴി, കൊന്നത്തടി, പനംകുറ്റി, കല്ലാര്‍കുറ്റി, പണിക്കന്‍കുടി, ഉടുമ്പന്‍ചോല, മൂന്നാര്‍ ലക്ഷ്മി മാങ്കുളം റോഡ്, ആനവിരട്ടി വില്ലേജ്, മീന്‍മുട്ടി, മാങ്കുളം, പള്ളിവാസല്‍ (പ്ലംജൂഡ് റിസോര്‍ട്ടിന് സമീപം), പാംബഌ ഇടശേരിപടിയില്‍, മാങ്കടവു കവല, കൂമ്പന്‍ പാറ, അമ്പഴച്ചാല്‍, ഇരുട്ടുകാനം കല്ലാര്‍ മേഖല, അമ്പലച്ചാല്‍ ഷാല്യംപാറ റോഡ്, ഒടക്ക സിറ്റി എന്നിവിടങ്ങളിലാണ് ഇടുക്കിയില്‍ മണ്ണിടിഞ്ഞത്. കണ്ണൂരില്‍ കരിക്കൊട്ടക്കരിയിലും മലപ്പുറത്ത് പൊങ്കല്ലൂര്‍ പൂച്ചക്കരയിലും വയനാട്ടില്‍ മക്കിമലയിലും വൈത്തിരിയിലുമാണ് മണ്ണിടിച്ചിലുണ്ടായത്.