അസം നിയമസഭാ തിരഞ്ഞെടുപ്പിന്റെ ഫലം പുറത്തുവന്നപ്പോള്‍ വന്‍ വിജയവുമായി തുടര്‍ഭരണത്തിന്റെ വിജയക്കൊടി വീശുകയാണ് എന്‍ഡിഎ. കൊടിയ വിവാദങ്ങള്‍ക്കും രാഷ്ട്രീയ ചര്‍ച്ചകള്‍ക്കും വാക്‌പോരിനും വിരാമമിട്ടുകൊണ്ട് ബിജെപി നേതൃത്വം നല്‍കുന്ന എന്‍ഡിഎ 101 സീറ്റ് നേടി മൂന്നാം തവണയും ഭരണത്തിലെത്തി. കോണ്‍ഗ്രസ് നേതൃത്വം നല്‍കുന്ന മുന്നണി 19 സീറ്റിലേക്കൊതുങ്ങി.

എക്‌സിറ്റ് പോള്‍ എക്‌സാറ്റ് പോളായ കാഴ്ചയ്ക്കാണ് അസം രാഷ്ട്രീയം സാക്ഷിയായത്. ഒന്നിലധികം ഏജന്‍സികള്‍ പുറത്തുവിട്ട എക്‌സിറ്റ് പോള്‍ പ്രവചനങ്ങള്‍ അസമില്‍ ഇന്ത്യാ സഖ്യം തകര്‍ന്നടിയും എന്ന സൂചനയാണ് നല്‍കിയത്. ബിജെപി നേതൃത്വത്തിലുള്ള സര്‍ക്കാരിന് ശക്തമായ ഭൂരിപക്ഷം പ്രവചിക്കുകയും ചെയ്തിരുന്നു. പി മാര്‍ക്ക് സര്‍വേ ബിജെപി 82 മുതല്‍ 94 സീറ്റുകള്‍ നേടുമെന്നും കോണ്‍ഗ്രസ് 30 – 40 സീറ്റുകള്‍ നേടുമെന്നും മറ്റുള്ളവര്‍ക്ക് 1 – 5 സീറ്റുകള്‍ ലഭിച്ചേക്കുമെന്നുമായിരുന്നു പ്രവചിച്ചിരുന്നത്. അതേസമയം ഗൗരവ് ഗൊഗോയിയുടെ നേതൃത്വത്തിലുള്ള അസമിലെ കോണ്‍ഗ്രസ് തിരിച്ചടി നേരിടുമെന്നായിരുന്നു പ്രവചനം.

ആകെ 126 സീറ്റ്, ബിജെപി മത്സരിച്ചത് 89 സീറ്റുകളിലേക്ക്. അതേസമയം ബിജെപിയുടെ പ്രധാന ഘടകകക്ഷിയായ അസം ഗണപരിഷത് 26 സീറ്റുകളിലേക്കും ബിപിഎഫ് 11 സീറ്റുകളിലേക്കും മത്സരിച്ചിരുന്നു. ഇതായിരുന്നു എന്‍ഡിഎയുടെ മത്സര നില. കോണ്‍ഗ്രസ് നേതൃത്വം നല്‍കുന്ന മുന്നണിയായ അസം സണ്‍മിലിറ്റോ മോര്‍ച്ച (അടങ) കോണ്‍ഗ്രസ് 99, റേയ്ജര്‍ ദള്‍ 13, അസം ജാതീയ പരിഷത് 10 എന്ന തരത്തില്‍ മത്സരത്തിനിറങ്ങി.

2016 വരെ കോണ്‍ഗ്രസ് അധികാരത്തിലുണ്ടായിരുന്ന സംസഥാനത്ത് കോണ്‍ഗ്രസിന്റെ പ്രധാനമുഖമായിരുന്ന ഹിമന്ദ ബിശ്വ ശര്‍മ നടത്തിയ കൂടുമാറ്റം അസമിന്റെ രാഷ്ട്രീയ ചരിത്രത്തില്‍ പ്രധാന അധ്യായമായിരുന്നു. ഇത്തവണ ഹിമന്തയും ഗൗരവും തമ്മിലുള്ള ഏറ്റുമുട്ടലായി പ്രചാരണം മാറുന്ന കാഴ്ച അസം കണ്ടിരുന്നു. മുന്‍ മുഖ്യമന്ത്രി തരുണ്‍ ഗൊഗോയിയുടെ മകനും അസം കോണ്‍ഗ്രസ് അധ്യക്ഷനും ജോര്‍ഹട്ട് എംപിയുമായ ഗൗരവ് ഗൊഗോയിയുടെ കീഴില്‍ സംസ്ഥാനത്ത് വീണ്ടും സ്ഥാനം നേടാന്‍ കോണ്‍ഗ്രസ് ശക്തമായ ശ്രമം നടത്തിയിരുന്നു.

ഹിമന്ദ ബിശ്വ ശര്‍മയുടെ നിരന്തര ആക്രമണമേല്‍ക്കുമ്പോഴും കോണ്‍ഗ്രസിന്റെ തിരിച്ചുവരവിനായി ആത്മാര്‍ത്ഥമായ പരിശ്രമം നടത്തിയ നേതാവാണ് ഗൗരവ് ഗൊഗോയി. ഹിമന്ദയും അസം മന്ത്രിസഭ ഒന്നാകെയും ക്യാംപ് ചെയ്ത് പ്രചാരണം നടത്തിയിട്ടും ഇക്കഴിഞ്ഞ ജോര്‍ഹട്ട് ലോക്‌സ്ഭാ തിരഞ്ഞെടുപ്പില്‍ ഗൗരവിനെ തോല്‍പ്പിക്കാനായിരുന്നില്ല. എന്നാല്‍ കോണ്‍ഗ്രസ് നേതാക്കള്‍ കൂട്ടത്തോടെ ബിജെപിയിലേക്ക് ചേക്കേറിയത് ഇത്തവണ പാര്‍ട്ടിയെ തളര്‍ത്തിയെന്നു കരുതേണ്ടിവരും.

വോട്ട് ചോരി, മണ്ഡല പുനര്‍നിര്‍ണയം, ബംഗ്ലദേശില്‍ നിന്ന് കുടിയേറുന്നവര്‍ക്കും പൗരത്വം നഷ്ടപ്പെട്ടവര്‍ക്കും എതിരെ ബിജെപി എടുത്ത നിലപാടുകള്‍ എന്നിവയും തിരഞ്ഞെടുപ്പ് പ്രചാരണവേളയില്‍ വലിയ ചര്‍ച്ചയായിരുന്നു. അതിനെയെല്ലാം മറികടക്കുന്ന പ്രകടനമാണ് ബിജെപി നടത്തിയത്.