പത്തു വര്ഷത്തെ എല്ഡിഎഫിന്റെ ധിക്കാരം നിറഞ്ഞ ദുര്ഭരണത്തിനെതിരായ ജനവികാരമാണ് തിരഞ്ഞെടുപ്പുഫലം; യുഡിഎഫിന്റെ കൂട്ടായ പ്രവര്ത്തനവും, ഇന്ദിരാ ഗ്യാരണ്ടിയും തിരഞ്ഞെടുപ്പു വിജയത്തില് മുഖ്യപങ്കുവഹിച്ചതായി എഐസിസി ജനറല് സെക്രട്ടറി കെ.സി.വേണുഗോപാല്
യഥാര്ഥ കേരള സ്റ്റോറിയാണ് സംസ്ഥാനത്തെ നിയമസഭാ തിരഞ്ഞെടുപ്പുഫലമെന്ന് എഐസിസി ജനറല് സെക്രട്ടറി കെ.സി.വേണുഗോപാല് എംപി. അഴിമതിയും ധിക്കാരവും സ്വജനപക്ഷപാതവും അക്രമരാഷ്ട്രീയവും കേരളത്തിലെ ജനങ്ങള് അംഗീകരിക്കില്ല. മതത്തിന്റെ പേരില് ജനങ്ങളെ വിഭജിപ്പിച്ച് കേരളം കയ്യടക്കാന് ആര്ക്കും കഴിയില്ല.
യുഡിഎഫിന്റെ കൂട്ടായ പ്രവര്ത്തനവും, രാഹുല് ഗാന്ധി അവതരിപ്പിച്ച പ്രകടനപത്രികയിലെ ഇന്ദിരാ ഗ്യാരണ്ടിയും തിരഞ്ഞെടുപ്പു വിജയത്തില് മുഖ്യപങ്കുവഹിച്ചു. യുഡിഎഫിന്റെ മുഖ്യമന്ത്രിയെ കോണ്ഗ്രസ് നേതൃത്വം കൂടിയാലോചിച്ച് ഉടന് തീരുമാനിക്കുമെന്നും വേണുഗോപാല് വ്യക്തമാക്കി.
പത്തു വര്ഷത്തെ എല്ഡിഎഫിന്റെ ധിക്കാരം നിറഞ്ഞ ദുര്ഭരണത്തിനെതിരായ ജനവികാരമാണ് തിരഞ്ഞെടുപ്പുഫലം. യുഡിഎഫ് പ്രവര്ത്തകര് മാത്രമല്ല, യഥാര്ഥ കമ്യൂണിസ്റ്റുകാരും ഇത്തവണ യുഡിഎഫിന് വോട്ട് ചെയ്തു.കോണ്ഗ്രസ് പ്രവര്ത്തകരും നേതാക്കളും ഈ തിരഞ്ഞെടുപ്പിനു വേണ്ടി രണ്ടു വര്ഷമായി ഒറ്റക്കെട്ടായി കഠിനാധ്വാനം നടത്തുകയായിരുന്നു.
രാഹുല് ഗാന്ധിയും പ്രിയങ്ക ഗാന്ധിയും മല്ലികാര്ജുന് ഖാര്ഗെയും ദീപ ദാസ് മുന്ഷിയും അടക്കമുള്ള കേന്ദ്ര നേതൃത്വവും കെപിസിസി പ്രസിഡന്റ് സണ്ണി ജോസഫ് ,പ്രതിപക്ഷ നേതാവ് വി ഡി സതീശൻ തിരഞ്ഞെടുപ്പ് പ്രചാരണ കമ്മിറ്റി ചെയര്മാന് രമേശ് ചെന്നിത്തല എന്നിവരുള്പ്പെടെയുള്ള നേതാക്കളും യുഡിഎഫിലെ മുഴുവന് ഘടകകക്ഷി നേതാക്കളും ഈ വിജയത്തിനു വേണ്ടി ഒരേ മനസ്സോടെ ഒറ്റക്കെട്ടായി പ്രവര്ത്തിച്ചു.
യുഡിഎഫിന്റെയും കോണ്ഗ്രസിന്റെയും ഉത്തരവാദിത്തം വര്ധിപ്പിക്കുന്ന ജനവിധിയാണിത്. രാഹുല്ഗാന്ധി അവതരിപ്പിച്ച ഇന്ദിരാ ഗ്യാരണ്ടി ഈ വിജയത്തില് വലിയ പങ്കു വഹിച്ചിട്ടുണ്ട്. ഇന്ദിരാ .ഗ്യാരണ്ടിയിലെ വാഗ്ദാനങ്ങള് താഴേത്തട്ടിലെ ജനങ്ങളിലെത്തിക്കാന് യുഡിഎഫ് നേതാക്കള്ക്കും പ്രവര്ത്തകര്ക്കും കഴിഞ്ഞുവെന്നും അദ്ദേഹം പറഞ്ഞു.
https://www.facebook.com/Malayalivartha
