പ്രളയവും ഉരുള്‍പ്പൊട്ടലും നാശം വിതയ്ക്കുന്ന വയനാട്ടില്‍ ദുരിതാശ്വാ ക്യാമ്ബുകള്‍ സന്ദര്‍ശിച്ച്‌ മുഖ്യമന്ത്രി പിണറായി വിജയന്‍. ബത്തേരി സെന്റ് മേരീസ് കോളജില്‍ ഹെലികോപ്റ്ററില്‍ എത്തിയ അദ്ദേഹം ആദ്യമെത്തിയത് മുണ്ടേരിയിലെ ദുരിതാശ്വാസ ക്യാമ്ബിലാണ്. വെള്ളം കയറി വീടുകള്‍ തകര്‍ന്നതിനെക്കുറിച്ചായിരുന്നു എല്ലാവര്‍ക്കും പറയാനുണ്ടായിരുന്നത്.

എത്രയും പെട്ടെന്ന് വീടിന്റെ അറ്റകുറ്റിപ്പണിക്കും മറ്റുമുള്ള സൗകര്യമുണ്ടാക്കണമെന്ന് ക്യാമ്ബിലുള്ളവര്‍ മുഖ്യമന്ത്രിയോട് ആവശ്യപ്പെട്ടു. 'വീടൊക്കെ നമുക്ക് പുതിയതുണ്ടാക്കാം, വിഷമിക്കേണ്ട, നിങ്ങളുടെ ജീവനാണ് ഞങ്ങള്‍ക്ക് വലുത്' എന്നു പറഞ്ഞാണ് സങ്കടം പറഞ്ഞ് കരഞ്ഞ ഒരു വീട്ടമ്മയെ മുഖ്യമന്ത്രി ആശ്വസിപ്പിച്ചത്.

ബാണാസുര സാഗര്‍ ഡാമിന്റെ ഷട്ടറുകള്‍ തുറന്നതിനെ തുടര്‍ന്ന് വയനാടിന്റെ താഴ്ന്ന പ്രദേശങ്ങളിലുള്ളവര്‍ വെള്ളക്കെട്ടിലായിരുന്നു. കോട്ടത്തറ, പടിഞ്ഞാറെത്തറ മേഖലകളിലുള്ളവരെയാണ് ഏറ്റവുമധികം മഴക്കെടുതി ബാധിച്ചത്. 2744 കുടുംബങ്ങളെ ദുരിതാശ്വാസ ക്യാമ്ബുകളിലേക്ക് മാറ്റിയിരുന്നു.

2744 കുടുംബങ്ങളിലെ 10649 പേരാണ് 133 ദുരിതാശ്വാസ ക്യാമ്ബുകളിലായി അഭയം തേടിയത്. പനമരം മേഖലയിലാണ് കൂടുതല്‍ ക്യാമ്ബുകളുള്ളത്. കാലവര്‍ഷക്കെടുതിയില്‍ വീടും ഭൂമിയും നഷ്ടപ്പെട്ടവര്‍ക്ക് സര്‍ക്കാര്‍ ധനസഹായം പ്രഖ്യാപിച്ചിട്ടുണ്ട്. വീട് നഷ്ടപ്പെട്ടവര്‍ക്ക് 4 ലക്ഷം രൂപയും ഭൂമി നഷ്ടപ്പെട്ടവര്‍ക്ക് 6 ലക്ഷം രൂപയുമാണ് അനുവദിച്ചത്.

ഒരു കുടുംബത്തിന് സൗജന്യ റേഷനു വേണ്ടി 3800 രൂപ നല്‍കും. മരിച്ചവരുടെ കുടുംബത്തിന് നാല് ലക്ഷം രൂപ വീതം നല്‍കാനും മുഖ്യമന്ത്രിയുടെ നേതൃത്വത്തില്‍ ചേര്‍ന്ന അവലോകന യോഗത്തില്‍ തീരുമാനമായിരുന്നു.

എറണാകുളത്തെ പ്രളയബാധിത പ്രദേശങ്ങള്‍ ഹെലികോപ്റ്ററില്‍ കണ്ട ശേഷമാണ് മുഖ്യമന്ത്രി ക്യാമ്ബുകള്‍ സന്ദര്‍ശിക്കുന്നതിന് വേണ്ടി കൊച്ചിയിലെത്തിയത്. മുഖ്യമന്ത്രിയോടൊപ്പം പ്രതിപക്ഷനേതാവ് രമേശ് ചെന്നിത്തല, റവന്യു മന്ത്രി ഇ ചന്ദ്രശേഖരന്‍ എന്നിവരുമുണ്ടായിരുന്നു. പ്രളയക്കെടുതി നേരിട്ട വയനാട്ടിലെ ദുരിത ബാധിത പ്രദേശങ്ങള്‍ സന്ദര്‍ശിച്ച ശേഷമാണ് മുഖ്യമന്ത്രി കൊച്ചിയിലെത്തിയത്.

കാലവര്‍ഷക്കെടുതി തുടരുന്ന സാഹചര്യത്തില്‍ ആഗസ്റ്റ് 12 വരെയുള്ള മുഖ്യമന്ത്രിയുടെ പൊതുപരിപാടികള്‍ റദ്ദാക്കിയിരുന്നു. രക്ഷാപ്രവര്‍ത്തനം ഏകോപിപ്പിക്കുന്നതിന് വേണ്ടിയാണ് മുഖ്യമന്ത്രിയുടെ പരിപാടികള്‍ റദ്ദാക്കിയത്.