പ്രളയ ദുരന്തമുഖത്ത് പ്രവർത്തിക്കുന്ന മന്ത്രി വി എസ് സുനിൽകുമാറിനെ ആർഎസ്എസ് കാര്യവാഹക് ആക്കി ആർഎസ്എസ് പ്രചരണം. കൃഷിമന്ത്രി വി എസ്‌ സുനിൽകുമാർ പൊലീസ്‌ ഉദ്യോഗസ്ഥർക്കും വളണ്ടിയർമാർക്കും ഒപ്പം ദുരിതാശ്വാസ പ്രവർത്തനങ്ങളിൽ ഏർപ്പെട്ടിരിക്കുന്ന ചിത്രം ഉപയോഗിച്ചാണ്‌ ആർഎസ്‌എസ്‌ നെക്‌സ്റ്റ്‌ഡോർ എന്ന ട്വിറ്റർ ഹാൻഡിൽ ദേശീയതലത്തിൽ പ്രചാരണം നടത്തിയത്.

ആറാട്ടുപുഴ ബണ്ട്‌ പുനർനിർമാണ പ്രവർത്തനങ്ങളിൽ ഏർപ്പെട്ടിരിക്കുന്ന ചിത്രം മന്ത്രി വി എസ്‌ സുനിൽ കുമാർ ഇന്നലെ ഫേസ്‌ബുക്കിൽ പോസ്റ്റ്‌ ചെയ്‌തിരുന്നു. ഈ ചിത്രം ഉപയോഗിച്ചാണ്‌ ആർഎസ്എസ് കാര്യവാഹകും കേരള പൊലീസ് ചീഫും ചേർന്നു ദുരന്തമുഖത്ത് പ്രവർത്തിക്കുന്നു എന്ന അടിക്കുറിപ്പോടുകൂടി ചിത്രം പ്രചരിച്ചത്.

‘‘പൊലീസ്‌ മേധാവിയോടൊപ്പം രക്ഷാപ്രവർത്തനത്തിൽ ഏർപ്പെട്ടിരിക്കുന്ന ആർഎസ്‌എസ്‌ കാര്യവാഹക്‌. പരമാവധി പ്രചരിപ്പിക്കൂ... റീട്വീറ്റ്‌ ചെയ്‌ത്‌ ദൈവത്തിന്റെ സ്വന്തം നാട്ടിൽ നാം ചെയ്യുന്ന കാര്യങ്ങൾ ലോകത്തെ അറിയിക്കൂ’’ ‐ എന്നായിരുന്നു ചിത്രത്തോടൊപ്പമുള്ള ട്വീറ്റ്‌.