തിരുവനന്തപുരം: സംസ്ഥാന ആരോഗ്യ വകുപ്പിന്റെ കീഴില്‍ പ്രവര്‍ത്തിക്കുന്ന കണ്‍ട്രോള്‍ റൂമുകളുടെ പ്രവര്‍ത്തനം കാര്യക്ഷമമായി നടന്നു വരുന്നതായി ആരോഗ്യ സാമൂഹ്യനീതി വകുപ്പ് മന്ത്രി കെ.കെ. ശൈലജ ടീച്ചര്‍. പകര്‍ച്ചവ്യാധി പ്രതിരോധത്തിനായി സ്‌റ്റേറ്റ് കണ്‍ട്രോള്‍ റൂം, ജില്ലാ കണ്‍ട്രോള്‍ റൂമുകള്‍ എന്നിവയാണുള്ളത്. ഇതുകൂടാതെ സത്വര നടപടിയെടുക്കാന്‍ ആരോഗ്യ വകുപ്പ് മന്ത്രിയുടെ ഓഫീസിലും കണ്‍ട്രോള്‍ റൂം പ്രവര്‍ത്തിച്ചു വരുന്നു. ചില സ്ഥലങ്ങളില്‍ ബാധിച്ച പകര്‍ച്ച വ്യാധികള്‍ കണ്‍ട്രോള്‍ റൂം വഴി റിപ്പോര്‍ട്ട് ചെയ്തിട്ടുണ്ട്. എന്നാല്‍ ഓരോ സ്ഥലത്തും ബാധിക്കപ്പെടുന്ന പകര്‍ച്ച വ്യാധികള്‍ അപ്പപ്പോള്‍ തന്നെയറിയിച്ചാല്‍ കണ്‍ട്രോള്‍ റൂമിന് കൂടുതല്‍ ശക്തമായി ഇടപെടാന്‍ കഴിയും. സ്വകാര്യ ആശുപത്രികളും ഈ സേവനം ഉപയോഗപ്പെടുത്തണമെന്ന് മന്ത്രി നിര്‍ദേശിച്ചു.

ആരോഗ്യ വകുപ്പ് ഡയറക്ടറുടെ ഓഫീസിലാണ് സ്‌റ്റേറ്റ് കണ്‍ട്രോള്‍ റൂം പ്രവര്‍ത്തിക്കുന്നത്. സംസ്ഥാനത്തെ മുഴുവന്‍ മെഡിക്കല്‍ ക്യാമ്പുകളിലേയും അന്തിമ ഏകോപനം നടക്കുന്നത് ഇവിടെയാണ്. ദിവസംതോറും നിരവധി കോളുകളാണ് കണ്‍ട്രോള്‍ റൂമില്‍ വന്നുകൊണ്ടിരിക്കുന്നത്. ഓരോ കോളുകളും വിലയിരുത്തി നടപടിയെടുക്കാന്‍ പ്രത്യേക സംഘത്തെതന്നെ നിയോഗിച്ചിട്ടുണ്ട്. സന്നദ്ധ സേവനത്തിനും സംഭാവനയ്ക്കുമായാണ് (13.53% + 13.34%) ഏറ്റവുമധികം കോളുകള്‍ വന്നത്. ക്ലോറിനേഷന്‍ (16.82%), പരിസരം ശുചിയാക്കല്‍ (12.76%), രോഗ പ്രതിരോധവും കുത്തിവയ്പ്പും (9.47%), മാലിന്യനിര്‍മ്മാര്‍ജനം (6.18%), ആരോഗ്യം, മാനസികാരോഗ്യം, ബ്ലീച്ചിംഗ് പൗഡറിന്റെ ലഭ്യത, ജീവനക്കാരുടെ ലഭ്യത, സേവനങ്ങളുടെ ലഭ്യത തുടങ്ങിയ മറ്റ് അനുബന്ധ മേഖലകളുടെ സംശയങ്ങളും പരാതികളുമായി 27.9% കോളുകളുമാണ് വന്നിട്ടുള്ളത്. അതെല്ലാം തന്നെ അതത് വിഭാഗങ്ങളെ അറിയിക്കുകയും നടപടിയെടുക്കുകയും ചെയ്തു.

അടുത്തിടെയുള്ള കോളുകളില്‍ അധികവും വരുന്നത് എലിപ്പനിയെപ്പറ്റിയുള്ളതാണ്. അന്ന് പ്രതിരോധ മരുന്ന് നല്‍കിയിട്ടും കഴിക്കാത്തവര്‍ സംശയ നിവാരണത്തിനായാണ് കൂടുതലും വിളിക്കുന്നത്. സ്ഥിരമായി മരുന്ന് കഴിച്ചിരുന്നവര്‍ മരുന്ന് മുടങ്ങിയതിനെ കുറിച്ചുള്ള സംശയങ്ങള്‍ ചോദിച്ചും വിളിക്കാറുണ്ട്. ആരോഗ്യ സംബന്ധമായ വിവരങ്ങള്‍ നല്‍കാന്‍ ഡോക്ടര്‍മാരുടെ ഒരു പാനല്‍ തന്നെയുണ്ട്. ആരോഗ്യ വകുപ്പ് അഡീഷണല്‍ ഡയക്ടറുടെ നേതൃത്വത്തിലുള്ള ഡോക്ടര്‍മാര്‍, ആരോഗ്യ വകുപ്പ് ജീവനക്കാര്‍, ആരോഗ്യ സന്നദ്ധ പ്രവര്‍ത്തകര്‍ തുടങ്ങിയ 50 അംഗ സംഘമാണ് കണ്‍ട്രോള്‍ റൂമില്‍ 24 മണിക്കൂറും ജാഗ്രതയോടെ സേവനമനുഷ്ടിക്കുന്നത്.

കേരളത്തിനകത്തു നിന്നും പുറത്തു നിന്നും സന്നദ്ധ സേവനത്തിന് തയ്യാറായവരുടേയും സംഭാവന നല്‍കാന്‍ തയ്യാറായവരുടേയും വിളികളാണ് മന്ത്രിയുടെ ഓഫീസിലെ കണ്‍ട്രോള്‍ റൂമിലേക്ക് വരുന്ന കോളുകളില്‍ അധികവും. ക്ലോറിനേഷനേയും കുടിവെള്ളം ശുദ്ധീകരിക്കുന്നതിനേയും കുറിച്ചുള്ള കോളുകളും വരാറുണ്ട്.

24 മണിക്കൂറും പ്രവര്‍ത്തിക്കുന്ന മാധ്യമ നിരീക്ഷണ വിഭാഗവും ഇതോടൊപ്പം പ്രവര്‍ത്തിക്കുന്നുണ്ട്. വാട്‌സ്ആപ്, ഫേസ്ബുക്ക്, ദൃശ്യ, ശ്രാവ്യ, പത്ര മാധ്യമങ്ങളില്‍ വരുന്ന ആരോഗ്യത്തെ സംബന്ധിച്ചുള്ള വിവരങ്ങളുടെ അടിസ്ഥാനത്തിലും സത്വര നടപടികളെടുത്തുവരുന്നു. മാധ്യമ നിരീക്ഷണ വിഭാഗത്തില്‍ നോഡല്‍ ഓഫീസര്‍മാരായി 2 മെഡിക്കല്‍ ഓഫീസര്‍മാരും ഇ-ഹെല്‍ത്തില്‍ നിന്നുള്ള 8 ജീവനക്കാരും 6 സന്നദ്ധ പ്രവര്‍ത്തകരും സേവനമനുഷ്ടിച്ചു വരുന്നു. മാത്രമല്ല ഓരോ ജില്ലകളില്‍ നിന്നും ഓരോ നോഡല്‍ ഓഫീസര്‍ എന്ന ക്രമത്തില്‍ 14 നോഡല്‍ ഓഫീസര്‍മാരും ഈ വിഭാഗത്തില്‍ പ്രവര്‍ത്തിക്കുന്നുണ്ട്. 6282986880, 6282983626 എന്നീ വാട്‌സ് ആപ്പ് നമ്പരുകളിലൂടെ ആരോഗ്യ സംബന്ധമായ പരാതികള്‍, പ്രശ്‌നങ്ങള്‍, അന്വേഷണങ്ങള്‍, സംശയങ്ങള്‍ എന്നിവ അറിയിക്കാവുന്നതാണ്.

പ്രളയബാധിത പ്രദേശങ്ങളിലുള്ള പകര്‍ച്ചവ്യാധികളെ സംബന്ധിച്ചുള്ള ആരോഗ്യപ്രവര്‍ത്തനങ്ങള്‍ ഏകോപിപ്പിക്കുന്നതിന് സ്‌റ്റേറ്റ് പീഡ് സെല്ലിന്റെ നേതൃത്വത്തില്‍ തയ്യാറാക്കിയ ഓണ്‍ ലൈന്‍ ടൂള്‍ കിറ്റിന് (ലിങ്ക് ഇതാണ് : http://bit.ly/cdreporting ) നല്ല പ്രതികരണമാണ് ലഭിച്ചത്. സ്വകാര്യ ആശുപത്രികള്‍, ചെറിയ ക്ലിനിക്കുകള്‍ ഉള്‍പ്പെടെയുള്ളവര്‍ ഈ ലിങ്ക് വഴി രോഗങ്ങള്‍ റിപ്പോര്‍ട്ട് ചെയ്യുന്നുണ്ട്. എങ്കിലും കുറച്ചാളുകള്‍ വിമുഖത കാട്ടുന്നുണ്ട്. എല്ലാവരും ഈ സേവനം ഉപയോഗിച്ചാല്‍ മാത്രമേ പകര്‍ച്ചവ്യാധികളുടെ പൂര്‍ണമായ വിവരങ്ങള്‍ ലഭ്യമാകുകയുള്ളൂവെന്നും മന്ത്രി പറഞ്ഞു.