കേസ് അട്ടിമറിക്കുന്നതായി ബിജെപി. ഡി.വൈ.എഫ്.ഐ വനിതാ നേതാവിനെ ലൈംഗികമായി പീഡിപ്പിച്ച ഷൊര്‍ണൂര്‍ സി.പി.എം എം.എല്‍.എ പി.കെ.ശശി, പീഡിപ്പിക്കപ്പെട്ട വനിതയുടെ പരാതി പോലീസിന് കൈമാറാതെ പ്രശ്‌നം ഒതുക്കി തീര്‍ക്കാന്‍ ശ്രമിച്ച സി.പി.എം ജില്ലാ സംസ്ഥാന നേതാക്കള്‍, പോളിറ്റ് ബ്യൂറോ അംഗം ബൃന്ദാ കാരാട്ട് എന്നിവര്‍ക്കെതിരെ ക്രിമിനല്‍ നടപടിക്രമം അനുസരിച്ച് കേസെടുക്കണമെന്ന് ബി.ജെ.പി സംസ്ഥാന അദ്ധ്യക്ഷന്‍ പി.എസ്.ശ്രീധരന്‍ പിള്ള.

താന്‍ പീഡിപ്പിക്കപ്പെട്ടതായി വനിതാ നേതാവ് പാലക്കാട് സി.പി.എം ജില്ലാ സെക്രട്ടറിയ്ക്കും, സംസ്ഥാന സെക്രട്ടറിയ്ക്കും, പോളിറ്റ് ബ്യൂറോ അംഗം ബൃന്ദാ കാരാട്ടിനും പരാതി നല്‍കിയത് മൂന്നാഴ്ച്ചകള്‍ മുമ്പാണ്. പരാതി ലഭിച്ചാല്‍ മണിക്കൂറുകള്‍ക്കകം പോലീസിന് കൈമാറണമെന്നിരിക്കെ പാര്‍ട്ടിക്കുള്ളില്‍ പ്രശ്‌നം ഒതുക്കി തീര്‍ക്കാനുള്ള ഹീനമായ ശ്രമമാണ് ജില്ലാസംസ്ഥാന നേതൃത്വത്തില്‍ നിന്ന് ഉണ്ടായത്.

വനിതാ പി.ബി അംഗമായ ബൃന്ദാ കാരാട്ടില്‍ നിന്നുപോലും പീഡിപ്പിക്കപ്പെട്ട വനിതയ്ക്ക് നീതി ലഭിച്ചില്ല. ഈ സാഹചര്യത്തിലാണ് സി.പി.എം ജനറല്‍ സെക്രട്ടറി സീതാറം യെച്ചൂരിക്ക് പീഡനത്തിന് വിധേയയായ യുവതി ഇന്നലെ നേരിട്ട് പരാതി അയച്ചത്. പരാതി കിട്ടിയതായി യെച്ചൂരി സ്ഥിരീകരിച്ചിട്ടുണ്ട്. അത് വാര്‍ത്തയായതിന് ശേഷം മാത്രമാണ് സംസ്ഥാന സെക്രട്ടറി കോടിയേരി ബാലകൃഷ്ണന്‍ പരാതിയിന്മേലുള്ള കുറ്റകരമായ മൗനം ലംഘിക്കാന്‍ നിര്‍ബന്ധിതനായത്. ഇവിടെ പ്രതിക്കൂട്ടിലാവുന്നത് ആരോപണ വിധേയനായ സി.പി.എം ഷൊര്‍ണൂര്‍ എം.എല്‍.എയ്‌ക്കൊപ്പം പാര്‍ട്ടിയുടെ ജില്ലാ, സംസ്ഥാന നേതാക്കളും, വനിതാ പി.ബി അംഗവുമാണ്.
അതേ സമയം വിഷയത്തില്‍ പ്രതികരണവുമായി കോടിയേരി രംഗത്തെത്തി. ഷൊര്‍ണ്ണൂര്‍ എംഎല്‍എ പി.ശശിക്കെതിരായ ലൈംഗികാരോപണം സംബന്ധിച്ച പരാതി മൂന്നാഴ്ച്ച മുന്‍പു തന്നെ സംസ്ഥാന കമ്മിറ്റിക്ക് ലഭിച്ചിരുന്നുവെന്ന് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്‍. പരാതിയിന്മേല്‍ സംസ്ഥാന ഘടകം നടപടികള്‍ ആരംഭിച്ചിട്ടുണ്ട്. പൊലീസിന് കൊടുക്കേണ്ട വിഷയമല്ല പരാതിയില്‍ ഉള്ളതെന്നും, ഉണ്ടെങ്കില്‍ അവര്‍ അത് നേരിട്ട് പൊലീസിന് കൈമാറുമായിരുന്നുവെന്നും കൊടിയേരി പറഞ്ഞു.

പരാതി കൈകാര്യം ചെയ്യുന്നത് സംബന്ധിച്ച് കേന്ദ്രനേതൃത്വത്തില്‍ നിന്നും നിര്‍ദേശങ്ങളൊന്നും ലഭിച്ചിട്ടില്ലെന്നും, സംഭവത്തില്‍ കുറ്റക്കാരെ പാര്‍ട്ടി സംരക്ഷിക്കില്ലെന്നും അത്തരമൊരു ചരിത്രം പാര്‍ട്ടിക്കില്ലെന്നും കോടിയേരി പറഞ്ഞു.