കന്യാസ്ത്രീയെ ബലാല്‍സംഗം ചെയ്‌തെന്ന കേസിലെ കുറ്റാരോപിതനായ ബിഷപ്പ് ഫ്രാങ്കോ മുളയ്ക്കല്‍ വിവാദം ഉര്‍ന്നപ്പോഴേ രാജിവയ്ക്കണമായിരുന്നെന്ന് കേരള റീജിയണല്‍ ലത്തീന്‍ കാത്തലിക് കൗണ്‍സില്‍ അഭിപ്രായപ്പെട്ടു. ബിഷപ്പിനെതിരെ കന്യാസ്ത്രീകള്‍ സമരത്തിനിറങ്ങിയ പശ്ചാത്തലത്തിലാണ് ലത്തീന്‍ സഭ ഇക്കാര്യത്തില്‍ അഭിപ്രായം തുറന്ന് പറഞ്ഞ് വാര്‍ത്തിക്കുറിപ്പ് ഇറക്കിയത്. മിഷണറീസ് ഓഫ് ജീസസ് എന്ന സഭയ്‌ക്കെതിരെ അല്ല കന്യാസ്ത്രികള്‍ സമരം നടത്തുന്നത്്. ബിഷപ്പിനെതിരായാണ്. തനിക്കെതിരായ ആരോപണങ്ങളും ആക്ഷേപങ്ങളും സഭയ്‌ക്കെതിരെ ആണെന്ന ബിഷപ്പ് ഫ്രാങ്കോയുടെ ആരോപണം ശരിയല്ല. ബിഷപ്പല്ല സഭയെന്നും ലത്തീന്‍ സഭാ വക്താവ് ഷാജി ജോര്‍ജ്ജ് പുറത്തിറക്കിയ വാര്‍ത്താക്കുറിപ്പില്‍ പറയുന്നു.

സഭാനാഥനെന്ന നിലയില്‍ ബിഷപ്പ് ഫ്രാങ്കോ കാണിക്കേണ്ട നീതിയും ധാര്‍മികതയും വിശ്വാസവുമാണ് കന്യാസ്ത്രീകളും പൊതുസമൂഹവും ചോദ്യം ചെയ്യുന്നത്. അതെല്ലാം ബിഷപ്പിനെതിരായ വ്യക്തിപരമായ ആരോപണങ്ങളാണ്. സഭയുടെ തലവന്‍മാരില്‍ നിന്ന് ധാര്‍മികമായ നടപടികളാണ് വിശ്വാസികളും പൊതുസമൂഹവും ആഗ്രഹിക്കുന്നത്. രാജിവയ്ക്കാന്‍ ആഗ്രഹിച്ചിരുന്നെന്ന പ്രസ്താവന വിവാദങ്ങള്‍ തുടങ്ങുംമുമ്പ് നടത്തണമായിരുന്നു.

വിശ്വാസികള്‍ക്ക് അപമാനവും അനിഷ്ടവും ഉണ്ടാക്കുന്ന കാര്യങ്ങള്‍ നടക്കുന്നത്. സഭയെ എതിര്‍ക്കുന്ന ഗൂഢാലോചനക്കാര്‍ ഇത് മുതലെടുക്കുന്നുണ്ടാകും. ആരോപണമുയര്‍ന്നപ്പോള്‍ തന്നെ ബിഷപ്പ് ഫ്രാങ്കോ മുളയ്ക്കല്‍ മാറി നിന്ന് അന്വേഷണവുമായി സഹകരിച്ചിരുന്നെങ്കില്‍ അദ്ദേഹത്തിന്റെ യശസ് ഉയരുകയും പൊതുസമൂഹം അംഗീകരിക്കപ്പെടുകയും ചെയ്യുമായിരുന്നെന്നും പ്രസ്താവന ചൂണ്ടിക്കാട്ടുന്നു.