ബിഷപ്പ് ഫ്രാങ്കോ മുളയ്ക്കലിനോട് ഈമാസം 19ന് വൈക്കം ഡിവൈ.എസ്.പിക്ക് മുന്നില്‍ ഹാജരാകാന്‍ നിര്‍ദ്ദേശിച്ചിട്ടുണ്ടെന്ന് ഐ.ജി വിജയ് സാഖറെ. ഇക്കാര്യം കാണിച്ച് ബിഷപ്പിന് നോട്ടീസ് നല്‍കിയിട്ടുണ്ട്. ഡിവൈ.എസ്.പിയുടെ നേതൃത്വത്തില്‍ ബിഷപ്പിനെ വീണ്ടും ചോദ്യം ചെയ്യും. അദ്ദേഹത്തിന്റെ മൊഴികളില്‍ പൊരുത്തക്കേടുണ്ടെന്നും ഐ.ജി വ്യക്തമാക്കി. അന്വേഷണ ഉദ്യോഗസ്ഥരുടെ നേതൃത്വത്തില്‍ കൊച്ചിയല്‍ ചേര്‍ന്ന അവലോകന യോഗത്തിന് ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. ബിഷപ്പിന്റെ മാത്രമല്ല കന്യാസ്ത്രീയുടെയും മറ്റ് സാക്ഷികളുടെയും മൊഴികളില്‍ വൈരുദ്ധ്യമുണ്ടെന്നും ഐ.ജി പറഞ്ഞു.

വളരെ മുന്നേ നടന്ന സംഭവമായതിനാല്‍ ശാസ്ത്രീയ, സാങ്കേതിക തെളിവുകള്‍ ശേഖരിക്കുന്നതിന് ബുദ്ധിമുട്ടുണ്ട്. അതുകൊണ്ടാണ് അന്വേഷണം വൈകുന്നത്. വ്യക്തമായ തെളിവ് ലഭിച്ചെങ്കില്‍ മാത്രമേ കുറ്റപത്രം കുറ്റമറ്റരീതിയില്‍ സമര്‍പ്പിക്കാനാവൂ. അല്ലെങ്കില്‍ അതിന്റെ ഗുണം കുറ്റാരോപിതനേ ലഭിക്കൂ. ഇരയ്ക്ക് നീതി ലഭിക്കുന്നതിനായാണ് അന്വേഷണ സംഘം ശ്രമിക്കുന്നത്.

മൊഴികളിലെ വൈരുദ്ധ്യം ബിഷപ്പിന് അനുകൂലമാകാതിരിക്കാനാണ് ശ്രമിക്കുന്നത്. ഇതുവരെയുള്ള അന്വേഷണം വിലയിരുത്തി. പരാതിക്കാരിക്ക് ആവശ്യമായ സുരക്ഷ ഉറപ്പാക്കും. ഐ.ജി ഉള്‍പ്പെടെയുള്ള ഉന്നതര്‍ ബിഷപ്പിനെ സംരക്ഷിക്കുകയാണെന്ന് സമരം നടത്തുന്ന കന്യാസ്ത്രീകളുടെ ആരോപണം ശരിയല്ല. ഭരണഘടന അനുശാസിക്കുന്നതിന് അനുസരിച്ചാണ്് താന്‍ പ്രവര്‍ത്തിക്കുന്നതെന്നും ഇരയ്ക്ക് നീതി ഉറപ്പാക്കുകയാണ് ലക്ഷ്യമെന്നും അദ്ദേഹം വ്യക്തമാക്കി.