തിരുവനന്തപുരം: പ്രളയദുരന്തത്തെ അതിജീവിച്ച കേരളത്തിന്റെ പുനര്‍നിര്‍മ്മാണത്തില്‍ കരുത്ത് പകര്‍ന്ന് ഹൈദരാബാദ് ആസ്ഥാനമായി പ്രവര്‍ത്തിക്കുന്ന പദ്മശ്രീ ഡോ. സുനിത കൃഷ്ണന്‍ നേതൃത്വം നല്‍കുന്ന സന്നദ്ധ സംഘടനയായ 'പ്രജ്വല'. വെള്ളം കയറി തകരാറുകള്‍ സംഭവിച്ച ആലപ്പുഴ കുട്ടനാട്ടിലെ 200-ലധികം വീടുകള്‍ താമസ യോഗ്യമാക്കിയിരിക്കുകയാണ് പ്രജ്വലയിലെ 30 വനിതകള്‍. 3 ആഴ്ച നീണ്ടുനിന്ന സേവനത്തിലൂടെയാണ് പ്രജ്വല മാതൃകാപരമായ പ്രവര്‍ത്തനം നടത്തിയത്. 'കോസ്റ്റ്‌ഫോര്‍ഡ്' എന്ന സന്നദ്ധ സംഘടനയുമായി സഹകരിച്ചാണ് ആലപ്പുഴയിലെ പ്രവര്‍ത്തനങ്ങള്‍ ഏകോപിപ്പിച്ചത്.

ഡോ. സുനിതാ കൃഷ്ണന്റേയും സംഘത്തിന്റേയും പ്രവര്‍ത്തനങ്ങള്‍ മാതൃകാപരമാണെന്നും ഇതിന് നന്ദി അറിയിക്കുന്നതായും ആരോഗ്യ സാമൂഹ്യനീതി വകുപ്പ് മന്ത്രി കെ.കെ. ശൈലജ ടീച്ചര്‍ പറഞ്ഞു.

വെള്ളം ഇറങ്ങിയതോടെ ദുരിതാശ്വാസ ക്യാംപുകളില്‍ നിന്ന് വീടുകളിലേക്ക് മടങ്ങിയവര്‍ക്ക് പലര്‍ക്കും കാണാനായത് ഉപയോഗ ശൂന്യമായ വീടുകളാണ്. ശുചീകരണം, ഇലക്ട്രിക്, കാര്‍പെന്റിംഗ്, വെല്‍ഡിംഗ് തുടങ്ങിയ ജോലികള്‍ പൂര്‍ത്തിയാക്കാതെ താമസിക്കാന്‍ കഴിയുമായിരുന്നില്ല. ഈ ഘട്ടത്തിലാണ് ആരോഗ്യ സാമൂഹ്യനീതി വകുപ്പ് മന്ത്രി കെ.കെ. ശൈലജ ടീച്ചറിന്റെ അഭ്യര്‍ത്ഥന മാനിച്ച് സഹായവുമായി പ്രമുഖ മനുഷ്യാവകാശ പ്രവര്‍ത്തക ഡോ. സുനിത കൃഷ്ണന്‍ രംഗത്തെത്തിയത്. പ്രജ്വല സംഘടനയിലെ വെല്‍ഡര്‍മാരായും കാര്‍പെന്റര്‍മാരായും പരിശീലനം സിദ്ധിച്ച 30 യുവതികളെയാണ് കേരളത്തിലയച്ചത്.

ഇവര്‍ ചെറു സംഘങ്ങളായി തിരിഞ്ഞ് കുട്ടനാട്ടിലെ 200-ലധികം വീടുകള്‍ താമസയോഗ്യമാക്കുകയും സമീപ പ്രദേശങ്ങള്‍ ശുചീകരിക്കുകയും ചെയ്തു. 2009ല്‍ മഹ്ബൂബ് നഗറില്‍ വെള്ളപ്പൊക്കം ഉണ്ടായപ്പോഴും അവിടെ സഹായഹസ്തമായി പ്രജ്വലയിലെ യുവതികള്‍ എത്തിയിരുന്നു. ഒരു മാസത്തോളം പ്രയത്നിച്ച് 3000 കുടുംബങ്ങളെ ഇവര്‍ അന്ന് സഹായിച്ചിരുന്നു.

മലയാളിയായ ഡോ. സുനിത കൃഷ്ണന്റെ ഇപ്പോഴത്തെ പ്രവര്‍ത്തന മേഖല ഹൈദരാബാദാണ്. പീഡനങ്ങള്‍ക്കിരയായ സ്ത്രീകളേയും കുട്ടികളേയും സംരക്ഷിക്കുന്നതിനും പുനരധിവസിപ്പിക്കുന്നതിനുമായി സുനിത കൃഷ്ണന്‍ രൂപം നല്‍കിയ സംഘടനയാണ് പ്രജ്വല. പെണ്‍കുട്ടികളെ ചൂഷണങ്ങളില്‍ നിന്നും രക്ഷപ്പെടുത്തി വിദ്യാഭ്യാസവും ജോലിയും നല്‍കുന്നതിനോടൊപ്പം അവരുടെ കുട്ടികളെ പുനരധിവസിപ്പിക്കാനായി പ്രജ്വലയ്ക്ക് 17 കേന്ദ്രങ്ങളുമുണ്ട്. എയ്ഡ്‌സ് ബാധിതരായ അയ്യായിരത്തോളം കുട്ടികളുടെ വിദ്യാഭ്യാസം പ്രജ്വല ഏറ്റെടുത്ത് നടത്തുന്നുണ്ട്. 20,000ത്തോളം പെണ്‍കുട്ടികളെയാണ് ലൈംഗിക ചൂഷണത്തില്‍ നിന്നും രക്ഷപ്പെടുത്തുകയും പുനരധിവസിപ്പിക്കുകയും ചെയ്തത്. സേവനസന്നദ്ധമായ പ്രവര്‍ത്തനത്തിന് സുനിതാ കൃഷ്ണനെ 2016ല്‍ രാജ്യം പദ്മശ്രീ നല്‍കി ആദരിച്ചു.

ലൈംഗിക അതിക്രമങ്ങള്‍ക്ക് വിധേയരാകുന്ന പെണ്‍കുട്ടികളേയും സ്ത്രീകളേയും സംരക്ഷിക്കുന്ന സംസ്ഥാന വനിതാശിശു വികസന വകുപ്പിന്റെ കീഴിലുള്ള നിര്‍ഭയയുടെ അഡൈ്വസര്‍ കൂടിയാണ് ഡോ. സുനിത കൃഷ്ണന്‍.