രാജ്യത്തെ ആദ്യ വനിതാ ഐഎഎസ് ഓഫിസറും മലയാളിയുമായ അന്ന മല്‍ഹോത്ര (92) അന്ധേരി മരോളിലെ ശുഭം കോംപ്ലക്‌സിലെ വസതിയില്‍ അന്തരിച്ചു. സംസ്‌കാരം മുംബൈയില്‍ നടത്തി.

പത്തനംതിട്ട നിരണം ഒറ്റവേലില്‍ കുടുംബാംഗമായ അന്ന റിസര്‍വ് ബാങ്ക് മുന്‍ ഗവര്‍ണര്‍ പരേതനായ ആര്‍.എന്‍. മല്‍ഹോത്രയുടെ ഭാര്യയാണ്. 

ഒറ്റവേലില്‍ ഒ.എ. ജോര്‍ജിന്റെയും അന്ന പോളിന്റെയും മകളായി ജനിച്ച അന്ന കോഴിക്കോട് പ്രൊവിഡന്‍സ് കോളജില്‍ നിന്ന് ഇന്റര്‍മീഡിയറ്റും മലബാര്‍ ക്രിസ്ത്യന്‍ കോളജില്‍ നിന്നു ബിരുദവും നേടിയ ശേഷം ഇംഗ്ലിഷ് സാഹിത്യത്തില്‍ മദ്രാസ് സര്‍വകലാശാലയില്‍നിന്നു ബിരുദാനന്തര ബിരുദം നേടി. 1950-ല്‍ സിവില്‍ സര്‍വീസ് പരീക്ഷയില്‍ ഉയര്‍ന്ന മാര്‍ക്കോടെ വിജയം.

ഹൊസൂര്‍ സബ്കലക്ടര്‍ ആയി ആദ്യ നിയമനം. ഡിന്‍ഡിഗല്‍, മദ്രാസ് എന്നിവിടങ്ങളില്‍ സേവനത്തിനുശേഷം കേന്ദ്ര സര്‍വീസില്‍ ചേര്‍ന്നു. പിന്നീട്, കേന്ദ്ര വിദ്യാഭ്യാസ സെക്രട്ടറിയായതോടെ കേന്ദ്രത്തില്‍ വകുപ്പു സെക്രട്ടറിയാകുന്ന ആദ്യവനിതയായി.

പ്രധാനമന്ത്രിമാരായിരുന്ന ഇന്ദിരാ ഗാന്ധി, രാജീവ് ഗാന്ധി തുടങ്ങിയവരുമായി ഏറെ അടുപ്പമുണ്ടായിരുന്നു. 1982 ഏഷ്യാഡ് പദ്ധതിയില്‍ രാജീവ് ഗാന്ധിയുടെ കൂടെ പ്രവര്‍ത്തിച്ചു. നവിമുംബൈ നാവഷേവയിലെ ജവാഹര്‍ലാല്‍ നെഹ്‌റു തുറമുഖ പദ്ധതിയുടെ ചുമതല പ്രധാനമന്ത്രി രാജീവ് ഗാന്ധി അന്നയെയാണ് ഏല്‍പിച്ചത്. 1989-ല്‍ പദ്ധതി പൂര്‍ത്തിയാക്കിയതിനു രാഷ്ട്രം പത്മഭൂഷണ്‍ നല്‍കി അവരെ ആദരിച്ചു.