തനിക്കെതിരായ മീ ടൂ ക്യാമ്പയിന്‍ തെറ്റിദ്ധാരണയാണെന്ന് നടന്‍ മുകേഷ്. ആ പെണ്‍കുട്ടിയെ കണ്ടതായി ഓര്‍മയില്ല. ഫോണ്‍ വിളിച്ചത് മറ്റാരെങ്കിലുമാകാം. അവിടെ വേറെ മുകേഷ് കുമാര്‍ ഉണ്ടായിരുന്നിരിക്കാം. ലേ മെറിഡിയന്‍ ഹോട്ടലിലാണ് താമസിച്ചിരുന്നത്. ക്രൂവിനും അവിടെയാണ് താമസം ഒരുക്കിയിരുന്നതെന്ന് അറിയില്ല. എത്ര ഓര്‍ത്തിട്ടും ടെസ് ജോസഫിനെ ഓര്‍മ്മ വരുന്നില്ല. ഡെറിക് ഒബ്‌റെയിനോട് പരാതി പറഞ്ഞെന്ന് പറയുന്നത് വിശ്വസിക്കുന്നില്ല.

ടി.വി ഷോയില്‍ എന്റെ ഗുരുവാണ് അദ്ദേഹം. ആദ്യ ഷോ സംവിധാനം ചെയ്തത് അദ്ദേഹമാണ്. മികച്ച പിന്തുണയാണ് നല്‍കിയത്. ആ ഷോയ്ക്ക് ശേഷം പത്ത് വര്‍ഷം മുമ്പ് ഡെറിക് കൊച്ചിയില്‍ ഡിസ്‌ക്കവറി ചാനലിന് വേണ്ടി ഒരുപരിപാട് നടത്താന്‍ എത്തിയിരുന്നു. അന്ന് എന്നെ വിളിച്ച് അവിടേക്ക് വരാമോ എന്ന് ചോദിച്ചു. കേരളത്തില്‍ എനിക്കാകെയുള്ള സുഹൃത്താണെന്നാണ് അന്ന് പറഞ്ഞത്. ടെസ് ജോസഫ് ആരോപിക്കുന്നത് പോലെ എന്തെങ്കിലും പ്രശ്‌നമുണ്ടായിരുന്നെങ്കില്‍ അദ്ദേഹം സൂചിപ്പിച്ചേനേ എന്നും മുകേഷ് വ്യക്തമാക്കി.

ടെസ് ജോസഫ് തന്നെ തെറ്റിദ്ധരിച്ചതാണ്. തന്റെ ആരോപണം രാഷ്ട്രീയവല്‍ക്കരിക്കരുതെന്ന് അവര്‍ തന്നെ വ്യക്തമാക്കിയിട്ടുണ്ട്.എന്നിട്ടും എനിക്കെതിരെ തിരിയുന്നത് എന്തിനാണെന്ന് മനസിലാകുന്നില്ല. കഴിഞ്ഞ ദിവസം സെക്രട്ടറിയേറ്റില്‍ ഒരു പരിപാടിയില്‍ ഇരിക്കുമ്പോള്‍ ഒരു പെണ്‍കുട്ടി വിളിച്ച് ടെസ് ജോസഫ് ഉന്നയിച്ച ആരോപണത്തെ കുറിച്ച് ചോദിച്ചു, സൗഹൃദസംഭാഷണം എന്ന നിലയില്‍ അതിന് മറുപടി നല്‍കി, അത് പ്രതികരണമായിരുന്നില്ലെന്നും മുകേഷ് വ്യക്തമാക്കി. മീ ടൂ ക്യാമ്പയിന് ഏറ്റവും കൂടുതല്‍ പിന്തുണ നല്‍കുന്നയാളാണ് ഞാന്‍. എന്റേത് കലാകുടുംബമാണ്. പണ്ട് കാലത്ത് കലാരംഗത്ത് ലിംഗവ്യത്യാസം ഉണ്ടായിരുന്നു. ഇന്നതില്ല. ഇന്ന് അങ്ങനെ എന്തെങ്കിലും സംഭവിച്ചാല്‍ പെണ്‍കുട്ടികള്‍ ധൈര്യമായി മുന്നോട്ട് വരണമെന്നും മുകേഷ് ആവശ്യപ്പെട്ടു.

താനിപ്പോള്‍ സെല്‍ മീ ദ ആന്‍സര്‍ എന്നൊരു ടി.വി ഷോ ചെയ്യാന്‍ ഒരുങ്ങുകയാണ്. പ്രളയദുരിതത്തില്‍ പെട്ടവരെ സഹായിക്കാനാണ് അതിന്റെ പ്രധാന ലക്ഷ്യം. അത് കൂടി മുഖവിലയ്‌ക്കെടുക്കണമെന്നും മുകേഷ് ഓര്‍മ്മിപ്പിച്ചു. ഫോണിലൂടെ രാത്രി മുഴുവന്‍ ശല്യപ്പെടുത്തിയെന്നാണ് പറയുന്നത്. അത് ഞാനാണെന്ന് എങ്ങനെ പറയാനാകുമെന്നും മുകേഷ് ചോദിച്ചു. ടെസിനെതിരെ നിയമനടപടി സ്വീകരിക്കുമോ എന്ന് മാധ്യമപ്രവര്‍ത്തകര്‍ ചോദിച്ചപ്പോള്‍ അക്കാര്യം പാര്‍ട്ടിയുമായി ആലോചിച്ച് തീരുമാനിക്കുമെന്നും കൊല്ലം എം.എല്‍.എ വ്യക്തമാക്കി.