ഓഖി ദുരന്തത്തിന്റെ പശ്ചാത്തലത്തില്‍ മത്സ്യത്തൊഴിലാളികള്‍ക്കു നാവിക് ഉപകരണങ്ങളും സാറ്റലൈറ്റ് ഫോണും ലഭ്യമാക്കാന്‍ 25.36 കോടി രൂപ അനുവദിക്കാന്‍ മന്ത്രിസഭാ തീരുമാനം. 15,000 മത്സ്യബന്ധന യാനങ്ങള്‍ക്കാണു നാവിക് ഉപകരണം നല്‍കുന്നത്. ഇതിന് 15.93 കോടി രൂപ ചെലവുവരും. 1500 കിലോമീറ്റര്‍ വരെ പരിധിയുള്ള നാവിക് മുഖേന ചുഴലിക്കാറ്റ്, സുനാമി, ഭൂചലനം എന്നിവ ഉള്‍പ്പെടെയുളള പ്രകൃതി ദുരന്തങ്ങളെക്കുറിച്ചും കാലാവസ്ഥാ വ്യതിയാനം, രാജ്യാന്തര അതിര്‍ത്തി, മത്സ്യബന്ധ സാധ്യതാ മേഖല എന്നിവ സംബന്ധിച്ചും സന്ദേശം നല്‍കാനാകും. ഐ.എസ്.ആര്‍.ഒയുടെ സാങ്കേതികവിദ്യ ഉപയോഗിച്ച് കെല്‍ട്രോണാണ് നാവിക് ഉപകരണങ്ങള്‍ നിര്‍മിച്ചു നല്‍കുന്നത്.

തീരദേശ ജില്ലകളില്‍ നിന്ന് പന്ത്രണ്ട് നോട്ടിക്കല്‍ മൈല്‍ കൂടുതല്‍ ദൂരത്തേക്കു മത്സ്യബന്ധനത്തിനു പോകുന്ന യാനങ്ങളുടെ ഉടമസ്ഥരില്‍ തെരഞ്ഞെടുക്കപ്പെടുന്ന 15,000 പേര്‍ക്കാണ് ഉപകരണങ്ങള്‍ നല്‍കുക. ആയിരം മത്സ്യത്തൊഴിലാളികള്‍ക്കാണു സാറ്റലൈറ്റ് ഫോണ്‍ നല്‍കുക. ഇതിന് 9.43 കോടി രൂപയാണു ചെലവ്. ബി.എസ്.എന്‍.എല്ലുമായി സഹകരിച്ചാണ് ഇത് നടപ്പാക്കുന്നത്. ഉപഭോക്തൃവിഹിതമായി ഓരോ തൊഴിലാളിയും 1500 രൂപ നല്‍കണം. നാവിക് ഉപകരണത്തിനും സാറ്റലൈറ്റ് ഫോണിനും വേണ്ട 25.36 കോടി രൂപ മുഖ്യമന്ത്രിയുടെ ദുരിതാശ്വാസനിധിയില്‍ നിന്ന് (ഓഖി ഫണ്ട്) വിനിയോഗിക്കും.

ഓഖി ദുരന്തത്തില്‍ മത്സ്യബന്ധനോപാധികള്‍ പൂര്‍ണമായി നഷ്ടപ്പെട്ട എട്ടു പേര്‍ക്കും ഭാഗികമായി നഷ്ടപ്പെട്ട 81 പേര്‍ക്കും നഷ്ടപരിഹാരമായി 1.78 കോടി രൂപ നല്‍കാനും മന്ത്രിസഭ തീരുമാനിച്ചു. മത്സ്യബന്ധനോപാധികള്‍ പൂര്‍ണമായി നഷ്ടപ്പെട്ട രജിസ്‌ട്രേഷനും ലൈസന്‍സുമില്ലാത്ത മൂന്നു യൂണിറ്റുകള്‍ക്കും ഭാഗികമായി നഷ്ടപ്പെട്ട 113 യൂണിറ്റുകള്‍ക്കും 22.52 ലക്ഷം രൂപ നഷ്ടപരിഹാരമായി നല്‍കും. 40,000 മത്സ്യത്തൊഴിലാളികള്‍ക്കു ലൈഫ് ജാക്കറ്റ് വാങ്ങി നല്‍കാനുള്ള തീരുമാനവും മന്ത്രിസഭ അംഗീകരിച്ചു. ലൈഫ് ജാക്കറ്റിന് ഉപഭോക്തൃവിഹിതമായി ഓരോ തൊഴിലാളിയും 250 രൂപ നല്‍കണം