തൃപ്തി ദേശായിയെ ശബരിമല കയറാന്‍ ഒരു കാരണവശാലും അനുവദിക്കില്ലെന്ന് അയ്യപ്പധര്‍മ്മസേന പ്രസിഡന്റ് രാഹുല്‍ ഈശ്വര്‍ . കോടതിയലക്ഷ്യം ആകുമെന്നതിനാല്‍ തൃപ്തിയെ തടയുമെന്ന് പറയുന്നില്ല. പക്ഷെ വഴി നീളെ വിശ്വാസികള്‍ നിരന്ന് കിടന്ന് പ്രതിഷേധിക്കും. ഞങ്ങളുടെ ശരീരത്തില്‍ ചവിട്ടിയേ തൃപ്തിക്ക് ശബരിമലയിലേക്ക് പോകാനാകൂ. തൃപ്തി രണ്ടും കല്‍പ്പിച്ചാണെങ്കില്‍ ഞങ്ങള്‍ മൂന്നും കല്‍പ്പിച്ചാണെന്ന് രാഹുല്‍ ഈശ്വര്‍ പറഞ്ഞു. ഫേസ്ബുക് ലൈവിലൂടെയായിരുന്നു രാഹുലിന്റെ പ്രതികരണം.

തൃപ്തി ദേശായി മലകയറുന്നത് പ്രതിരോധിക്കാന്‍ വിശ്വാസികളെയും അമ്മമാരെയും അണിനിരത്തും. മലയാളികളുടെ പോരാട്ടവീര്യം തൃപ്തി ദേശായി കാണാനിരിക്കുന്നതേയുള്ളൂ. മലയാളികളും തമിഴന്മാരും തെലുങ്കരുമായ വിശ്വാസികളെക്കുറിച്ച്‌ തൃപ്തിക്ക് അറിയില്ല. അവരുടെ വിശ്വാസത്തിന്റെ ശക്തി തൃപ്തി കാണാനിരിക്കുന്നതേയുള്ളൂ.

ഡല്‍ഹിയിലുള്ള തൃപ്തി ശബരിമലയില്‍ വരുന്നത് ഭക്തി കൊണ്ടല്ല. അയ്യപ്പനെ അറിയാത്തതുകൊണ്ട് വരുന്നതാണ്. അയ്യപ്പനെ കളിയാക്കാനാണ് അവരുടെ വരവ്. ഇരുമുടിക്കെട്ടില്ലാതെ ശബരിമലയില്‍ വരുമെന്ന് പറഞ്ഞത് തന്നെ ഭക്തി കൊണ്ടല്ലെന്ന് വ്യക്തമാകുന്നു. തൃപ്തി ദേശായിയുടെ വരവിന് മുന്നോടിയായി താന്‍ ശബരിമലയിലേക്ക് പോകും. ഇരുമുടിക്കെട്ടുമായി പോകുന്ന തങ്ങളെ പൊലീസിന് നിയമപരമായി തടയാനാവില്ലെന്നും രാഹുല്‍ ഈശ്വര്‍ പറഞ്ഞു.

മണ്ഡല മകരവിളക്ക് പൂജകള്‍ക്കായി നവംബര്‍ 16 ന് വൈകീട്ടാണ് നട തുറക്കുന്നത്. ആറ് സ്ത്രീകളുമായാണ് താന്‍ കേരളത്തില്‍ എത്തുന്നതെന്നും ശനിയാഴ്ച വൃശ്ചികം ഒന്നിന് നടതുറക്കുമ്പോള്‍ മലകയറാന്‍ സൗകര്യമൊരുക്കണമെന്നാവശ്യപ്പെട്ട് തൃപ്തി ദേശായി മുഖ്യമന്ത്രി പിണറായി വിജയന് കത്ത് നല്‍കി. ശബരിമല സന്ദര്‍ശനത്തിനായി വെള്ളിയാഴ്ച കേരളത്തില്‍ എത്തുമെന്ന് ഭൂമാതാ ബ്രിഗേഡ് നേതാവ് തൃപ്തി ദേശായി വ്യക്തമാക്കിയിരുന്നു. യുവതീപ്രവേശനം അനുവദിച്ചുള്ള അഞ്ചംഗ ഭരണഘടന ബെഞ്ചിന്റെ വിധി പുനഃപരിശോധിക്കാന്‍ സുപ്രീം കോടതി തീരുമാനിച്ചാലും തന്റെ തീരുമാനത്തില്‍ നിന്ന്‌ള പിന്നോട്ടില്ലെന്ന് അവര്‍ ഇന്നലെ വ്യക്തമാക്കിയിരുന്നു.