ഉടുക്കുകൊട്ടി പേടിപ്പിക്കുന്ന തൃപ്തി ദേശായിമാരോട് വിശ്വാസികള്‍ പറയുന്നത്
ഇന്ത്യയിലെ ആക്ടിവിസത്തിന്റെ അമരത്തിരിക്കുന്ന തൃപ്തി ദേശായി കേരളത്തിലേക്കു വരുന്നത് വെറുതെയല്ലെന്ന് പറയുന്നവര്‍ അറിയേണ്ടത്.ജീവന്‍ കൊടുത്തും വിശ്വാസ അവകാശ സംരക്ഷണത്തിന് പ്രതിരോധം തീര്‍ത്ത അയ്യപ്പഭക്തര്‍ കോട്ടകെട്ടിയ ശബരിമലയിലേക്ക് ഈ വരുന്ന ശനിയാഴ്ച തൃപ്തി ദേശായിയെത്തുന്നത് പരിവാരങ്ങളുമായിട്ടു തന്നെ. അലങ്കാരത്തിനും, അഹങ്കാരത്തിനും ആറു യുവതികള്‍ കൂട്ട്. മുപ്പത്തിനാലുകാരിയായ തൃപ്തിക്ക് പോരാട്ടവീര്യം തുളുമ്പുന്ന ആക്ടിവിസത്തിന്റെ വേദിയായി ശബരിമല.
വിശ്വാസികള്‍ക്ക് നെഞ്ചിടിച്ചില്ല. ആചാരം ലംഘിക്കാനെത്തുന്നവര്‍ തോറ്റുമടങ്ങിയ നിരവധി കാഴ്ചകള്‍ കണ്ടു. അവര്‍ തോല്‍പിക്കപ്പെട്ടത് ആള്‍ക്കൂട്ടത്തിന്റെ പ്രതിരോധം കൊണ്ടുമാത്രമല്ല വിശ്വാസമൊരുക്കിയ അയ്യപ്പകൃപ കൊണ്ടു കൂടിയാണ്. മണ്ഡലകാലം തുടങ്ങാന്‍ ഇനി മണിക്കൂറുകള്‍ മാത്രം. തൃപ്തി ദേശായിക്ക് സുരക്ഷയൊരുക്കുമെന്നും, സന്നിധാനത്തെത്തിക്കുമെന്നും ഇപ്പോള്‍ സര്‍ക്കാര്‍ ഉറപ്പിച്ചു പറയുന്നില്ല. എല്ലാം നാളത്തെ സര്‍വ്വകക്ഷിയോഗത്തിനു ശേഷം. വിശ്വാസലംഘനം വേണ്ട എന്ന കോണ്‍ഗ്രസിന്റെയും, ബി.ജെ.പിയുടെയും ഉറച്ച തീരുമാനമാണ് നാളത്തെ സര്‍വ്വകക്ഷി യോഗത്തിലുന്നയിക്കുക. തത്ക്കാലം ഇതിനപ്പുറത്ത് വലിയ പ്രകോപനം വേണ്ട എന്ന തീരുമാനത്തിലെത്താനാണ് സാധ്യത.
അങ്ങനെ വന്നാല്‍ മതിയായ സുരക്ഷ സംസ്ഥാന സര്‍ക്കാര്‍ തനിക്കൊരുക്കുന്നില്ല എന്നുപറഞ്ഞ് തൃപ്തിക്ക് കോടതിയെ സമീപിക്കാം. സര്‍ക്കാര്‍ സമവായ പാതയിലൂടെ തൃപ്തിയെ പറഞ്ഞു മനസ്സിലാക്കണം. വിശ്വാസികളെ വെല്ലുവിളിക്കരുതെന്ന്. കേരളത്തെ കലാപ ഭൂമിയാക്കരുതെന്ന്. കനത്ത പോലീസ് കാവലിന്റെ ശക്തി വിശ്വാസികളെ തളയ്ക്കാന്‍ മതിയാകില്ല. നാലായിരത്തി അഞ്ഞൂറ് പോലീസുകാര്‍ക്ക് ഒഴുകിയെത്തുന്ന ഭക്തരെ നിയന്ത്രിക്കുക അത്രയെളുപ്പമല്ല. തത്കാലം സുപ്രീം കോടതി പുനപരിശോധിക്കുന്നതുവരെ കാത്തിരിക്കൂ എന്ന മറുപടി തന്റേടത്തോടെ തൃപ്തിയോട് പറയുക. തൃപ്തിയെ മടക്കി അയക്കാനായാല്‍, സി.പി.എം വെല്ലുവിളിച്ചില്ലെങ്കില്‍ മണ്ഡലകാലം സമാധാന പൂര്‍ണ്ണമാകും.
തൃപ്തി ഒരു പ്രതീകമാണ്. ഒരുപാട് യുവതികള്‍ക്ക് ആക്ടിവിസത്തിനുള്ള പ്രതീകം. അവര്‍ പോര് തെളിച്ച് നേടേണ്ടത് വിശ്വാസികളുടെ ആചാര നിഷ്ഠയല്ല. സര്‍ക്കാര്‍ കവചമൊരുക്കേണ്ടത് വിശ്വാസികള്‍ക്കും, അയ്യപ്പ ഭക്തര്‍ക്കുമാണ്. അക്രമികളും തീവ്രവാദികളും നുഴഞ്ഞു കയറി ശബരിമലയെ കലാപഭൂമിയാക്കാതിരിക്കാനാണ് ജാഗ്രത കാട്ടേണ്ടത്.ഇവിടെ വേണ്ടത് ഒരു വലിയ നോ ആണ്. തൃപ്തി ദേശായിയോട്. കേരളം ആവശ്യപ്പെടുന്നതും അതു തന്നെ. ആ ഇച്ഛാ ശക്തിയില്‍ ആക്ടിവിസം പൊഴിഞ്ഞുവീഴട്ടെ. ഇവിടെ തോല്‍വിയും ജയവുമില്ല. വിശ്വാസവും ആചാരവും മാത്രം. സമാധാനപൂര്‍ണ്ണമായ മണ്ഡലകാലം സമ്മാനിക്കാനായാല്‍ ജയിക്കുന്നത് സര്‍ക്കാരും.തൃപ്തിക്കു ജയിക്കാനും സര്‍ക്കാരിനു തോല്‍ക്കാനുമാകരുത് ശബരിമലയുടെ പുണ്യം.
https://www.facebook.com/Malayalivartha
