ശബരിമല വിഷയത്തില് മുഖ്യമന്ത്രി ജനഹിതം മാനിക്കണം, ദര്ശനത്തിനെത്തുന്ന യുവതികളെ തടയില്ല, ഭാവിപരിപാടികള് നാളെ കൊച്ചിയില് ചേരുന്ന സംസ്ഥാന നിര്വാഹക സമിതി തീരുമാനിക്കും- ശ്രീധരന്പിള്ള നിലപാട് വ്യക്തമാക്കുന്നു
ശബരിമലയില് സുപ്രീംകോടതി വിധി പെട്ടെന്ന് നടപ്പാക്കി മുഖ്യമന്ത്രി ജനങ്ങളെ തമ്മിലടിപ്പിക്കരുതെന്ന് ബി.ജെ.പി സംസ്ഥാന അധ്യക്ഷന് പി.എസ് ശ്രീധരന്പിള്ള ആവശ്യപ്പെട്ടു. മുഖ്യമന്ത്രി പിടിവാശി ഉപേക്ഷിക്കണം. ജനഹിതം മാനിക്കണം. ശബരിമലയെ കലാപഭൂമിയാക്കരുത്. സര്ക്കാര് തീരുമാനം പുന:പ്പരിശോധിക്കണം. ഹിന്ദുസംഘടനകളെ സര്വകക്ഷി യോഗത്തിന് വിളിക്കാത്തത് ശരിയല്ല.
ആഭ്യന്തര തീര്ത്ഥാടനം ഭരണഘടനയില് സ്റ്റേറ്റ് ലിസ്റ്റിലാണ് വരുന്നത്. അതിനാല് സംസ്ഥാനം ആവശ്യപ്പെട്ടാല് കേന്ദ്രസര്ക്കാര് ശബരിമലവിഷയത്തില് ഇടപെടും. വിശ്വാസികളുടെ വികാരം മനസിലാക്കണം. ശബരിമലയില് ദര്ശനത്തിനെത്തുന്ന യുവതികളെ ബി.ജെ.പി തടയില്ല. തുടര്ന്ന് സമരപരിപാടികള് നടത്തും. അത് സംബന്ധിച്ച തീരുമാനം നാളെ കൊച്ചിയില് ചേരുന്ന സംസ്ഥാന നിര്വാഹകസമിതി യോഗം തീരുമാനിക്കുമെന്നും അദ്ദേഹം വ്യക്തമാക്കി.
പൊലീസിനെ ആഭ്യന്തരവകുപ്പില് നിന്ന് പൂര്ണമായും മാറ്റണമെന്ന് സുപ്രീംകോടതി ഉത്തരവിട്ടിരുന്നു. 2007 ജനുവരി 11 മുതല് ആ വിധി നടപ്പാക്കണമെന്നും കോടതി ഉത്തരവിട്ടു. കോടിയേരി ബാലകൃഷ്ണനായിരുന്നു അന്ന് ആഭ്യന്തരമന്ത്രി. ആ വിധി ഇതുവരെയായി നടപ്പാക്കിയിട്ടില്ല. തങ്ങളെ ബാധിക്കുന്ന വിധി നടപ്പാക്കാതിരിക്കുകയും എതിരാളികളായ വിശ്വാസികളെ ബാധിക്കുന്ന വിധി നടപ്പാക്കാന് വ്യഗ്രത കാട്ടുകയും ചെയ്യുന്ന സി.പി.എമ്മിന്റെ ഇരട്ടത്താപ്പാണ് ഇതിലൂടെ വ്യക്തമാകുന്നത്. വിധിക്കെതിരെ ഈ സര്ക്കാര് കഴിഞ്ഞ ജൂലായില് റിവ്യൂഹര്ജി നല്കിയിരിക്കുകയാണ്. അവര്ക്ക് താല്പര്യമുള്ള കാര്യങ്ങളില് റിവ്യൂഹര്ജിയാകാം എന്നാണ് ഇതിലൂടെ മനസിലാകുന്നതെന്നും ശ്രീധരന്പിള്ള ചൂണ്ടിക്കാട്ടുന്നു.
പൊലീസിനെ ആഭ്യന്തര വകുപ്പില് നിന്ന് മാറ്റിയ ശേഷം സെക്യൂരിറ്റി കമ്മീഷന് രൂപീകരിക്കണമെന്ന് സുപ്രീംകോടതി ആവശ്യപ്പെട്ടെങ്കിലും അതും ചെയ്തില്ല. പകരം 2010ല് പൊലീസ് ആക്ടില് ഭേദഗതി വരുത്തുകയാണ് ചെയ്തത്. ഇക്കാര്യങ്ങള് സര്വകക്ഷിയോഗത്തില് ഉന്നയിച്ചെങ്കിലും മുഖ്യമന്ത്രി മറുപടി പറഞ്ഞില്ല. ഇന്ന ദിവസം മുതല് നടപ്പാക്കണമെന്ന് സുപ്രീംകോടതി ഉത്തരവിട്ട വിധി നടപ്പാക്കാതെ, എന്ന് മുതല് നടപ്പാക്കണമെന്ന് പറയാത്ത ഡികഌറേറ്റീവ് വിധിയാണ് ശബരിമലയില് സര്ക്കാര് നടപ്പാക്കാന് ഒരുങ്ങുന്നതെന്നും ശ്രീധരന്പിള്ള ചൂണ്ടിക്കാട്ടി.
https://www.facebook.com/Malayalivartha