സര്വകക്ഷിയോഗത്തിന് പിന്നാലെ പന്തളം കൊട്ടാരവുമായും തന്ത്രി കുടുംബവുമായും മുഖ്യമന്ത്രി നടത്തിയ ചര്ച്ച പൊളിഞ്ഞു, രണ്ട് കൂട്ടരും തങ്ങളുടെ നിലപാടില് ഉറച്ച് നിന്നതോടെ വഞ്ചി ഇപ്പോഴും തിരുനക്കരെ തന്നെ
സര്വകക്ഷിയോഗത്തിന് പിന്നാലെ പന്തളം കൊട്ടാരം പ്രതിനിധികളുമായും തന്ത്രി കുടുംബാംഗങ്ങളുമായും മുഖ്യമന്ത്രി നടത്തിയ ചര്ച്ച പൊളിഞ്ഞു. വിധി നടപ്പാക്കാതിരിക്കാന് കഴിയില്ലെന്ന സര്ക്കാരിന്റെ പരിമിതി മുഖ്യമന്ത്രി അറിയിച്ചെന്ന് പന്തളം കൊട്ടാരം നിര്വാഹകസമിതി പ്രസിഡന്റ് ശശികുമാര വര്മ പറഞ്ഞു. അതേസമയം യുവതീപ്രവേശനത്തിന് സാധ്യതയുണ്ടെന്ന ധ്വനി ശശികുമാര വര്മയുടെ വാക്കുകളിലും അവര് നല്കിയ നിവേദനത്തിലും വ്യക്തമാക്കുന്നുണ്ട്. പ്രളയത്തില് തകര്ന്ന പമ്പയില് അടിസ്ഥാന സൗകര്യങ്ങള് മെച്ചപ്പെടുത്തണം. വിരിവയ്ക്കാന് പോലും സാധിക്കാത്ത അവസ്ഥയാണുള്ളത്. അതിനാല് സ്ത്രീകള് അവിടെയെത്തിയാല് ധാരാളം പ്രശ്നങ്ങളുണ്ടാകുമെന്നും നിവേദനത്തില് പറയുന്നു.
ഇവരുടെ നിര്ദ്ദേശങ്ങള്ക്ക് ശേഷം മുഖ്യമന്ത്രി ചില നിര്ദ്ദേശങ്ങള് മുന്നോട്ട് വെച്ചു. അക്കാര്യത്തില് തങ്ങള്ക്ക് മാത്രം തീരുമാനം എടുക്കാനാവില്ലെന്നും ബന്ധപ്പെട്ട മറ്റുചിലരുമായി കൂടിയാലോചന നടത്തിയ ശേഷം വീണ്ടും മുഖ്യമന്ത്രിയെ കാണുമെന്നും ശശികുമാര വര്മ പറഞ്ഞു. തങ്ങള് ഉന്നയിച്ച വിഷയങ്ങള് ഗൗരവമായി കാണാമെന്ന് മുഖ്യമന്ത്രി ഉറപ്പ് നല്കി. ചര്ച്ച സൗഹാര്ദ്ദപരമായിരുന്നെന്നും അദ്ദേഹം വ്യക്തമാക്കി. നിലപാടില് മാറ്റമില്ലെന്നും ആചാര അനുഷ്ഠാനങ്ങളില് നിന്ന് പിന്മാറാന് പറ്റില്ല. അതില് മാറ്റം വരുത്തണമെങ്കില് വേറ ചര്ച്ച നടത്തണം. അതിന് ശേഷം വ്യക്തമായ തീരുമാനത്തിലെത്താന് കഴിയൂ എന്നും ശശികുമാര വര്മ പറഞ്ഞു.
അടുത്ത ജനുവരി 22ന് സുപ്രീംകോടതി പു:നപ്പരിശോധനാ ഹര്ജി പരിഗണിക്കണമെന്നുള്ള അപേക്ഷ തുറന്നകോടതിയില് കേള്ക്കും. അത് വരെ വിധി നടപ്പാക്കുന്നത് നീട്ടിവയ്ക്കണമെന്നും പന്തളം കൊട്ടാരം പ്രതിനിധികളും തന്ത്രി കുടുംബവും ആവര്ത്തിച്ചു. ദയവായി യുവതികള് സന്നിധാനത്തേക്ക് വരരുതെന്ന് തന്ത്രി കണ്ഠരര് രാജീവര് അപേക്ഷിച്ചു. യുവതികള് എത്തിയാല് നട അടയ്ക്കുമോ എന്ന ചോദ്യത്തിന് അതൊക്കെ അപ്പോ തീരുമാനിക്കാം എന്ന് പറഞ്ഞു.
https://www.facebook.com/Malayalivartha