ശബരിമല സന്ദര്‍ശനത്തിന് തൃപ്തി ദേശായി ഇപ്പോള്‍ കേരളത്തില്‍ വരരുതായിരുന്നെന്ന് എസ്‌എന്‍ഡപി യോഗം ജനറല്‍ സെക്രട്ടറി വെള്ളാപ്പള്ളി നടേശന്‍. എന്നാല്‍ നിയമം കയ്യിലെടുത്ത് അവരെ തടയുന്നതു തെറ്റാണെന്നും അവര്‍ക്ക് പൊലീസ് സുരക്ഷ ഉറപ്പാക്കണമെന്നും വെള്ളാപ്പള്ളി നടേശന്‍ വ്യക്തമാക്കി.

ഒരു വിഭാഗം ആളുകള്‍, ഭക്തിയുടെ പേരില്‍ ഭ്രാന്തുപിടിച്ചുനടക്കുകയാണ്. അവര്‍ നിയമം കയ്യിലെടുക്കാനുള്ള ശ്രമത്തിലാണ്. നിയമം കയ്യിലെടുത്ത് അരാജകത്വം സൃഷ്ടിക്കുകയാണ്.കോടതി വിധിയെ മാനിച്ചു മാത്രമാണ് സര്‍ക്കാറിന്റെ നടപടികള്‍. ആത്മീയതയെ മാര്‍ക്കറ്റുചെയ്ത് രാഷ്ട്രീയ വിദ്വേഷം പടര്‍ത്തുന്നു. സവര്‍ണ്ണരുടെ സര്‍വ്വാധിപത്യം നഷ്ടപെടുമെന്ന ഭയത്തിലാണ് പ്രതിഷേധം നടത്തുന്നതെന്നും വെള്ളാപ്പള്ളി വ്യക്തമാക്കി.

തുടക്കം മുതലേ ഈ വിഷയത്തില്‍ തുടന്നുവന്ന തന്റെ നിലപാടുകള്‍ക്ക് യാതൊരു മാറ്റവുമില്ലെന്ന് ഒരിക്കല്‍കൂടി അടിവരയിടുകയായിരുന്നു വെള്ളാപ്പള്ളി. നേരത്തെ തന്നെ ഈ വിഷയത്തില്‍ സംഘപരിവാറിന്റെ അജണ്ടക്ക് ഒപ്പമല്ല താന്‍ എന്ന വെള്ളാപ്പള്ളി പല തവണ വ്യക്തമാക്കിയിരുന്നു. അയ്യപ്പഭക്തരുടെ സമരങ്ങള്‍ക്ക് എസ്‌എന്‍ഡിപിയുടെ പിന്തുണയില്ലെന്ന് നേരത്തെ തന്നെ വെള്ളാപ്പള്ളി വ്യക്തമാക്കിയിരുന്നുു. ഹിന്ദു സമൂഹമല്ല ഇവിടെ സമര രംഗത്തുള്ളത് തന്ത്രിയും തന്ത്രി കുടുംബവും മാത്രം അടങ്ങുന്നതല്ല ഹിന്ദു സമൂഹമെന്നും വെള്ളാപ്പള്ളി പറഞ്ഞു. തമ്ബ്രാക്കന്മാര്‍ തീരുമാനിച്ച്‌ അടിയാന്മാര്‍ നടപ്പാക്കണം എന്ന ഏര്‍പ്പാട് ശരിയല്ല.അടുത്ത വിമോചന സമരത്തിനുള്ള പുറപ്പാടാണോ ഇപ്പോഴത്തെതെന്നും വെള്ളാപ്പള്ളി ചോദിച്ചു. രാജ്യത്തെ ഭ്രാന്താലയമാക്കുന്ന നിലപാട് ശരിയല്ല. ഈ വിഷയത്തില്‍ മുഖ്യമന്ത്രി പിണറായി വിജയന്റേത് തുറന്ന സമീപനമാണെന്നും വെള്ളാപ്പള്ളി വ്യക്തമാക്കിയിരുന്നു