ശബരിമലയില്‍ പൊലീസ് അറസ്റ്റ് ചെയ്ത ഹിന്ദു ഐക്യവേദി അധ്യക്ഷ കെ.പി.ശശികലയെ പൊലീസ് കോടതി കയറ്റി. ഇരുമുടിക്കെട്ടുമായി മലകയറാന്‍ കഴിയാത്തതില്‍ അതിയായ വിഷമമുണ്ടെന്ന് അവര്‍ പറഞ്ഞു. ജാമ്യമെടുത്താല്‍ ശബരിമലയ്ക്ക് പോകാമെന്ന് പൊലീസ് അറിയിച്ചെങ്കിലും അവര്‍ തയ്യറായില്ല. തുടര്‍ന്നാണ് തിരുവല്ല ആര്‍.ഡി.ഒയ്ക്ക് മുന്നില്‍ ഹാജരാക്കിയത്. ഇന്നലെ അര്‍ദ്ധരാത്രിയിലാണ് ശശികലയെ പൊലീസ് അറസ്റ്റ് ചെയ്തത്. വിലക്ക് ലംഘിച്ച് മലകയറിയതിനെ തുടര്‍ന്നായിരുന്നു ഇത്. നിയലംഘനം നടത്തിയതിനാണെന്ന് അറസ്റ്റ് ചെയ്തതെന്ന് പത്തനംതിട്ട എസ്.പി വ്യക്തമാക്കി.

ജാമ്യത്തില്‍ പോകില്ലെന്നും പൊലീസുകാര്‍ ശബരിമലയില്‍ എത്തിക്കണമെന്നും ശശികല ഉറച്ച് നിന്നതോടെയാണ് കോടതിയില്‍ ഹാജരാക്കുന്നത്. കോടതിയില്‍ നിന്നും ജാമ്യമെടുത്ത് ശശികലയ്ക്ക് ശബരിമലയിലേക്ക് പോകാമെന്നും പൊലീസ് അറിയിച്ചു. അതേസമയം, ശശികലയെ കസ്റ്റഡിയില്‍ സൂക്ഷിച്ചിരിക്കുന്ന റാന്നി പൊലീസ് സ്‌റ്റേഷന് മുന്നില്‍ തമ്പടിച്ചിരുന്ന പ്രതിഷേക്കാര്‍ പിരിഞ്ഞ് പോയി. ശശികലയെ വിട്ടയയ്ക്കാതെ തങ്ങള്‍ പിരിഞ്ഞുപോകില്ലെന്ന നിലപാടിലായിരുന്നു ഇവര്‍. ഉപവാസത്തിലിരുന്ന ശശികലയെ ഇടയ്ക്ക് ഡോക്ടര്‍മാരെത്തി പരിശോധിച്ചിരുന്നു.

ഇന്നലെ സന്നിധാനത്തേക്ക് പോകാനെത്തിയ ശശികലയെ രാത്രി ഏഴരയോടെ മരക്കൂട്ടത്ത് വെച്ച് തടയുകയായിരുന്നു. തുടര്‍ന്ന് അര്‍ദ്ധരാത്രി 1.40 ഓടെയാണ് അറസ്റ്റ് ചെയ്തത്. മടങ്ങിപ്പോകണമെന്ന് പലതവണ ആവശ്യപ്പെട്ടെങ്കിലും ഭക്തയായ താന്‍ ദര്‍ശനവും നെയ്യഭിഷേകവും നടത്താതെ മടങ്ങില്ലെന്ന് പൊലീസിനെ അറിയിച്ചു. തുടര്‍ന്നാണ് അറസ്റ്റ് ചെയ്തത്. ഒരു മാസത്തിനിടെ നാലാംതവണയാണ് ശശികല ടീച്ചര്‍ ശബരിമല ദര്‍ശനത്തിനെത്തിയത്.