ശബരിമലയില്‍ പൊലീസ് അറസ്റ്റ് ചെയ്ത ഹിന്ദു ഐക്യവേദി അധ്യക്ഷ കെ.പി.ശശികലയ്ക്ക് തിരുവല്ല കോടതി ജാമ്യം നല്‍കി. ശബരിമലയിലേക്ക് പോകുമെന്നും എന്നാല്‍ ആരോഗ്യസ്ഥിതി മോശമായതിനാല്‍ എപ്പോഴാണെന്ന് പിന്നീട് വ്യക്തമാക്കാമെന്നും ശശികല അറിയിച്ചു. അറസ്റ്റ് ചെയ്തത് മുതല്‍ നിരാഹാരത്തിലായിരുന്നു അവര്‍. ആരോഗ്യം അനുവദിച്ചാല്‍ മലകയറുമെന്നും തന്റെ ജാമ്യാപേക്ഷയെ പൊലീസ് എതിര്‍ത്തില്ലെന്നും റിമാന്‍ഡ് റിപ്പോര്‍ട്ട് സമര്‍പ്പിച്ചില്ലെന്നും അവര്‍ പറഞ്ഞു.

രണ്ട് ആള്‍ജാമ്യത്തിലാണ് ഇവരെ വിട്ടയച്ചത്. അടുത്തമാസം മൂന്നിന് മജിസ്‌ട്രേട്ടിന് മുന്നില്‍ ഹാജരാകണമെന്നും ആവശ്യപ്പെട്ടു. തിരുവല്ല സബ്ഡിവിഷണല്‍ മജിസ്‌ട്രേട്ടിന് മുന്നില്‍ ശശികലയെ ഹാജരാക്കിയത് അറിഞ്ഞ് നൂറുകണക്കിന് ഹിന്ദുഐക്യവേദി പ്രവര്‍ത്തകരാണ് കോടതി പരിസരത്ത് തടിച്ച് കൂടിയത്. ജാമ്യം കിട്ടിയതോടെ തിരുവല്ല നഗരത്തില്‍ നാമജപക്കാരും വിശ്വാസികളും ആഹഌദപ്രകടനം നടത്തി. 

കരുതല്‍ തടങ്കലിനാണ് കെ.പി ശശികലയെ കസ്റ്റഡിയിലെടുത്തത്. അത് ജാമ്യം കിട്ടാവുന്ന വകുപ്പാണെന്നും പൊലീസ് വൃത്തങ്ങള്‍ അറിയിച്ചു. ഇരുമുടിക്കെട്ടുമായി മലകയറാന്‍ കഴിയാത്തതില്‍ അതിയായ വിഷമമുണ്ടെന്ന് കെ.പി ശശികല പറഞ്ഞു. ഇന്നലെ സന്നിധാനത്തേക്ക് പോകാനെത്തിയ ശശികലയെ രാത്രി ഏഴരയോടെ മരക്കൂട്ടത്ത് വെച്ച് തടയുകയായിരുന്നു. തുടര്‍ന്ന് അര്‍ദ്ധരാത്രി 1.40 ഓടെയാണ് അറസ്റ്റ് ചെയ്തത്. മടങ്ങിപ്പോകണമെന്ന് പലതവണ പൊലീസ് ആവശ്യപ്പെട്ടെങ്കിലും ഭക്തയായ താന്‍ ദര്‍ശനവും നെയ്യഭിഷേകവും നടത്താതെ മടങ്ങില്ലെന്ന് പൊലീസിനെ അറിയിച്ചു. തുടര്‍ന്നാണ് അറസ്റ്റ് ചെയ്തത്. ഒരു മാസത്തിനിടെ നാലാംതവണയാണ് ശശികല ടീച്ചര്‍ ശബരിമല ദര്‍ശനത്തിനെത്തിയത്.

അറസ്റ്റ് ചെയ്ത ശശികല ടീച്ചറെ റാന്നി പൊലീസ് സ്റ്റേഷനിലെത്തിച്ചു. അവിടെ നിന്ന് ജാമ്യമെടുത്ത് ശബരിമലയ്ക്ക് പോകാമെന്ന് പൊലീസ് അറിയിച്ചെങ്കിലും തന്നെ അറസ്റ്റ് ചെയ്തിടത്ത് കൊണ്ട് വിടണമമെന്ന് അവര്‍ ആവശ്യപ്പെട്ടു. അത് പൊലീസ് അംഗീകരിച്ചില്ല. തുടര്‍ന്നാണ് കോടതിയില്‍ ഹാജരാക്കിയത്. വിലക്ക് ലംഘിച്ച് മലകയറിയതിനെ തുടര്‍ന്നായിരുന്നു ഇത്. നിയലംഘനം നടത്തിയതിനാണെന്ന് അറസ്റ്റ് ചെയ്തതെന്ന് പത്തനംതിട്ട എസ്.പി വ്യക്തമാക്കി. അറസ്റ്റിനെ തുടര്‍ന്ന് ഹിന്ദു ഐക്യവേദി സംസ്ഥാനത്ത് ഹര്‍ത്താല്‍ നടത്തുകയാണ്.