കേന്ദ്ര സര്ക്കാര് നല്കിയ 100 കോടി എവിടെ? ഇതാണോ ഭക്തരുടെ കക്കൂസ്; ഉദ്യോഗസ്ഥരെ അമ്പരപ്പിച്ച് കേന്ദ്രമന്ത്രി അല്ഫോണ്സ് കണ്ണന്താനം പമ്പയിലെ അടിസ്ഥാന സൗകര്യങ്ങള് പരിശോധിച്ചു
പ്രളയം കഴിഞ്ഞ് 4 മാസം കഴിഞ്ഞിട്ടു പോലും പമ്പയിലും നിലയ്ക്കലിലും അടിസ്ഥാന സൗകര്യമൊരുക്കാത്തതിനെ രൂക്ഷമായ ഭാഷയില് വിമര്ശിച്ച് കേന്ദ്ര ടൂറിസം വകുപ്പ് മന്ത്രി അല്ഫോണ്സ് കണ്ണന്താനം. നിലയ്ക്കലിലെ പരിശോധനയ്ക്ക് ശേഷം പമ്പയിലെത്തിയ കണ്ണന്താനം അപ്രതീക്ഷിതമായി ഭക്തര്ക്കൊരുക്കിയ ശുചിമുറികള് പരിശോധിച്ചു. പൂര്ത്തിയായിട്ടും തുറന്ന് കൊടുക്കാത്തതും വൃത്തിയില്ലാത്തതുമായ കക്കൂസുകളും അല്ഫോണ്സ് കണ്ണന്താനത്തെ ചൊടിപ്പിച്ചു. ഇതാണോ ഭക്തര്ക്കായി ഒരുക്കിയതെന്ന് കണ്ണന്താനം ചോദിച്ചു. ഉദ്യോഗസ്ഥരാകട്ടെ എന്ത് മറുപടി പറയണമെന്നറിയാതെ പതറുകയും ചെയ്തു.
ശബരിമലയിലെ അടിസ്ഥാന സൗകര്യങ്ങള് വിലയിരുത്തുന്നതിനായാണ് താന് എത്തിയതെന്ന് കണ്ണന്താനം മാധ്യമങ്ങളോട് പറഞ്ഞു. രണ്ടു മാസം മുമ്പ് പ്രളയത്തിനു ശേഷമുള്ള സ്ഥിതിഗതികള് വിലയിരുത്താന് ഇവിടെ വന്നിരുന്നു. അന്ന് പമ്പയുടെ സ്ഥിതി ദയനീയമായിരുന്നു. അതില് നിന്ന് ഒട്ടും മെച്ചപ്പെട്ടിട്ടില്ലെന്ന് കണ്ണന്താനം കുറ്റപ്പെടുത്തി. കേന്ദ്ര സര്ക്കാര് ശബരിമലയുടെ വികസനത്തിനായി 100 കോടി അനുവദിച്ചിരുന്നു. എന്നാല് അടിസ്ഥാന സൗകര്യങ്ങള് പോലും ഇവിടെ ഒരുക്കിയിട്ടില്ലെന്നും കണ്ണന്താനം പറഞ്ഞു.
ശബരിമലയില് സര്ക്കാര് അക്രമം അഴിച്ചു വിടുകയാണ്. സോവിയറ്റ് റഷ്യയിലും ചൈനയിലും പോലും കാണാത്ത കാര്യങ്ങളാണ് നടമാടുന്നത്. ശബരിമലയില് എത്തുന്നത് ഭക്തന്മാരാണ്, തീവ്രവാദികളല്ല. പൊലീസ് അവരെ മര്ദിക്കുന്നത് എന്തിനാണ് ഇവിടെ നിരോധനാജ്ഞ പ്രഖ്യാപിക്കേണ്ട കാര്യമെന്താണ് ഭക്തിയോടെ മലകയറാന് വരുന്നരെ അറസ്റ്റ് ചെയ്യുന്നത് എന്തിനാണെന്നും അദ്ദേഹം ചോദിച്ചു.
പാര്ട്ടി നിര്ദേശമനുസരിച്ചല്ല, കേന്ദ്ര മന്ത്രി എന്ന നിലയിലാണ് ശബരിമലയില് എത്തിയത്. ശബരിമലയിലെ പൊലസ് നടപടി മൂലം ആയിരക്കണക്കിന് പേര്ക്ക് തൊഴില് നഷ്ടപ്പെട്ടു. ലോകത്തിനു മുന്നില് പൊലീസ് നിയന്ത്രണത്തിലാണ് കേരളം എന്ന പ്രതീതിയാണുള്ളത്. സമാധാനപരമായി നാമജപം നടത്തുന്നത് എങ്ങനെയാണ് പ്രതിഷേധമാവുക ഭക്തരില് ചിലര് ചില പാര്ട്ടി അംഗങ്ങളൊണെന്നത് തെറ്റല്ലെന്നും അദ്ദേഹം പറഞ്ഞു.
ശബരിമല യുവതീപ്രവേശന വിഷയത്തില് സുപ്രീംകോടതി വിധി വരുന്നതു വരെ കാത്തിരിക്കണമെന്നും അദ്ദേഹം കൂട്ടിച്ചേര്ത്തു. ജീവിതത്തിലൊരിക്കലും ശബരിമലയില് പോകാത്തവര്ക്ക് ഈ രണ്ടുമാസം കൊണ്ട് പോയാല് മാത്രമേ രക്ഷപ്പെടൂ എന്ന് ചിന്തിക്കുന്നത് ശരിയാണെന്ന് തോന്നുന്നില്ല. ഇതൊക്കെ പ്രശ്നങ്ങള് ഉണ്ടാക്കാന് വേണ്ടി മാത്രം നടത്തുന്നതാണെന്നും കണ്ണന്താനം പറഞ്ഞു.
"
https://www.facebook.com/Malayalivartha