ശബരിമലയെ സംബന്ധിച്ച് ഇന്നലത്തെയും ഇന്നത്തേയും ദിവസം കേന്ദ്ര മന്ത്രി പൊന്‍ രാധാകൃഷ്ണന്റേതായിരുന്നു. നിലയ്ക്കലില്‍ സുരക്ഷാ ചുമതലയുള്ള എസ് പി യതീഷ് ചന്ദ്രയുടെ ചോദ്യം ചെയ്തതിന് പിന്നാലെ കേന്ദ്രമന്ത്രി പൊന്‍രാധാകൃഷ്ണന്റെ വാഹനം പമ്പയില്‍ തടഞ്ഞും പോലീസ് പുലിവാലു പിടിച്ചിരിക്കുകയാണ്. ശബരിമല ദര്‍ശനത്തിന് ശേഷം മടങ്ങിയ കേന്ദ്രമന്ത്രിയുടെ വാഹനം പമ്പ കെഎസ്ആര്‍ടിസി ബസ് സ്റ്റാന്‍ഡിന് സമീപത്ത് വെച്ചായിരുന്നു തടഞ്ഞത്. അബദ്ധത്തില്‍ നടന്ന സംഭവത്തില്‍ പോലീസ് പിന്നീട് മാപ്പു പറഞ്ഞതായാണ് വാര്‍ത്തകള്‍ വന്നത്. എന്നാല്‍ മാപ്പല്ല വിശദീകരണം മാത്രമാണ് നല്‍കിയതെന്നാണ് എസ്.പി. ഹരിശങ്കര്‍ പറഞ്ഞത്. മന്ത്രിയുടെ വാഹനമംല്ല കൂടെയുള്ള വാഹന വ്യൂഹമാണ് തടഞ്ഞതെന്നുമാണ് പറയുന്നത്. 

പുലര്‍ച്ചെ ഒരു മണിയോടെയായിരുന്നു കേന്ദ്രമന്ത്രിയുടെ വാഹനം തടഞ്ഞെന്ന തരത്തില്‍ വാര്‍ത്തകള്‍ വന്നത്. ശബരിമലയിലെ പ്രതിഷേധക്കാരുടെ വാഹനമാണെന്ന് കരുതിയാണ് തടഞ്ഞതെന്ന് പോലീസ് വ്യക്തമാക്കി. ഇന്നലെ ശബരിമലദര്‍ശനത്തിനായി എത്തിയ കേന്ദ്രമന്ത്രി എല്ലാം കഴിഞ്ഞ് സ്വകാര്യ പമ്പയിലേക്ക് സ്വകാര്യ വാഹനത്തില്‍ തിരിച്ചു പോകുമ്പോഴായിരുന്നു വാഹനം പോലീസ് തടഞ്ഞത്. കേന്ദ്രമന്ത്രിയാണെന്ന് തിരിച്ചറിഞ്ഞതോടെ പോലീസുകാര്‍ ഉന്നതോദ്യോഗസ്ഥരെ വിവരം അറിയിക്കുകയും അവരെത്തി മാപ്പു പറയുകയുമായിരുന്നു. 

ഇന്നലെ ശബരിമലയില്‍ സുരക്ഷാ ചുമതലയുള്ള എസ്പി യതീഷ്ചന്ദ്ര പൊന്‍രാധാകൃഷ്ണനെ ചോദ്യം ചെയ്തത് വലിയ വിവാദമായതിന് പിന്നാലെയാണ് ഇന്ന് പുലര്‍ച്ചെ പോലീസ് മന്ത്രിയുടെ വാഹനം തടയുകയും ചെയ്തിരിക്കുന്നത്. ഇന്നലെ സ്വകാര്യവാഹനങ്ങള്‍ കടത്തിവിടാത്തത് ചോദ്യം ചെയ്തപ്പോള്‍ അത് ശബരിമലയില്‍ ഉണ്ടാക്കുന്ന ട്രാഫിക് ചൂണ്ടിക്കാട്ടിയായിരുന്നു യതീഷ്ചന്ദ്ര തിരിച്ചു ചോദിച്ചത്. കെഎസ്ആര്‍ടിസി ബസുകള്‍ തിരിച്ചു പോരുമെന്നും സ്വകാര്യ വാഹനങ്ങള്‍ അവിടെ കിടക്കുന്നത് മൂലം ഉണ്ടാകുന്ന ഗതാഗതക്കുരുക്കിന്റെ ഉത്തരവാദിത്വം ഏറ്റെടുക്കുമോ എന്നായിരുന്നു യതീഷ്ചന്ദ്ര ചോദിച്ചത്. 

സ്വന്തം ഉത്തരവാദിത്വങ്ങള്‍ നടത്താതെ മന്ത്രിയെ ചോദ്യം ചെയ്യുകയാണോ എന്ന് ബിജെപി സംസ്ഥാന സെക്രട്ടറി എ എന്‍ രാധാകൃഷ്ണന്‍ തട്ടിക്കയറിയപ്പോള്‍ മന്ത്രി ഉത്തരവിട്ടാല്‍ ഗതാഗതം അനുവദിക്കാമെന്നായിരുന്നു എസ്പിയുടെ മറുപടി. എന്നാല്‍ അതിന് തനിക്ക് അധികാരമില്ലെന്ന് പറഞ്ഞ് മന്ത്രിയും ബിജെപി സംസ്ഥാന ജനറല്‍ സെക്രട്ടറിയും പിന്നീട് കെഎസ്ആര്‍ടിസി ബസിലാണ് പമ്പയിലേക്ക് പോയത്.

ശബരിമലയിലെ സ്ഥിതി പരമദയനീയമെന്ന് ഇന്നലെ ഹൈക്കോടതിയും വിമര്‍ശിച്ചിരുന്നു. ചില പോലീസ് ഉദ്യോഗസ്ഥര്‍ നിയമം കയ്യിലെടുക്കുകയാണെന്നാണ് കോടതിയുടെ വിലയിരുത്തല്‍. ഹൈക്കോടതി നിര്‍ദ്ദേശങ്ങള്‍ പാലിക്കുന്നില്ല. രണ്ട് ഐപിഎസ് ഉദ്യോഗസ്ഥര്‍ ക്രിമിനല്‍ പശ്ചാത്തലമുണ്ടെന്നും എന്തിനവരെ സന്നിധാനത്ത് നിയോഗിച്ചു എന്നുമാണ് കോടതി ചോദിച്ചത്. ഇതോടെ വെട്ടിലായിരിക്കുകയാണ് ഐ.ജി വിജയ് സാഖറെയും എസ്പി യതീഷ് ചന്ദ്രയും ഇതോടെ വെട്ടിലായിരിക്കുകയാണ്. കൂടാതെ കേന്ദ്ര മന്ത്രിയോട് മോശമായി പെരുമാറിയെന്ന പരാതിയില്‍ യതീഷ് ചന്ദ്രനും ഹരിശങ്കറും നടപടി വരും. ഇതിനുള്ള നീക്കത്തിലാണ് കേന്ദ്ര സര്‍ക്കാര്‍.