ഒരു ഉദ്യോഗസ്ഥയും സര്‍ക്കാരിന് മുകളില്‍ പാറിപ്പറക്കേണ്ടെന്ന് എസ്.പി ചൈത്രാ തെരേസാ ജോണിന് സി.പി.എം സംസ്്ഥാന സെക്രട്ടറി കോടിയേരി ബാലകൃഷ്ണന്റെ ഭീഷണി. ഡി.സി.പിയായിരിക്കെ തിരുവനന്തപുരം ജി്ല്ലാകമ്മിറ്റി ഓഫീസില്‍ നടത്തിയ റെയ്ഡ് വിലകുറഞ്ഞ പബഌസിറ്റി സ്റ്റണ്ടാണെന്നും കോടിയേരി പരിഹസിച്ചു. എല്ലാ ഓഫീസര്‍മാരും സര്‍ക്കാരിന് വിധേയമാണെന്നും കോടിയേരി പറഞ്ഞു. സി.പി.എം നിയമവിധേയമായി പ്രവര്‍ത്തിക്കുന്ന പാര്‍ട്ടിയാണ്. നിരോധിച്ച പാര്‍ട്ടിയല്ല. നിരോധിച്ച പാര്‍ട്ടികളോട് സ്വീകരിക്കുന്ന സമീപനം സി.പി.എമ്മിനോട് പാടില്ല. അത് ശരിയല്ല. വെറുതെ പാര്‍ട്ടി ഓഫീസില്‍ കയറി പരിശോധന നടത്തുന്നത് സര്‍ക്കാര്‍ നയമല്ലെന്നും കോടിയേരി പറഞ്ഞു. 

അതേസമയം പ്രധാനമന്ത്രി നരേന്ദ്രമോദിക്കെതിരെ രൂക്ഷവിമര്‍ശനവും കോടിയേരി നടത്തി. ശബരിമല യുവതീപ്രവേശനം നടപ്പാക്കേണ്ടെന്നാണ് പ്രധാനമന്ത്രിയുടെ നിലപാടെങ്കില്‍ അത് തുറന്നുപറയണം. മോദി തുടരെ തുടരെ സംസ്ഥാനത്തെത്തുന്നത് ആസൂത്രിത നീക്കത്തിന്റെ ഭാഗമായാണ്. കമ്യൂണിസ്റ്റുകാര്‍ സംസ്‌കാരം തകര്‍ക്കുന്നെന്ന പ്രസ്താവന അതിന്റെ ഭാഗമാണ്. കേരളത്തെ കുറിച്ച് മോദിക്ക് ഒന്നും അറിയില്ല. സ്വാമി വിവേകാനന്ദന്‍ പറഞ്ഞ പോലെ കേരളത്തെ ഭ്രാന്താലയമാക്കാന്‍ ശ്രമിച്ചാല്‍ നടക്കില്ലെന്നും കോടിയേരി പറഞ്ഞു. ഞായറാഴ്ച കൊച്ചിയിലും തൃശൂരിലും എത്തിയ പ്രധാനമന്ത്രി സി.പി.എമ്മിനും കോണ്‍ഗ്രസിനും എതിരെ രൂക്ഷവിമര്‍ശനമാണ് നടത്തിയത്. അതേക്കുറിച്ച് മാധ്യമപ്രവര്‍ത്തകര്‍ ചോദിച്ചപ്പോഴാണ് കോടിയേരി മറുപടി നല്‍കിയത്. 

രണ്ടാഴ്ച മുമ്പ് എന്‍.ഡി.എ തെരഞ്ഞെടുപ്പ് റാലി ഉദ്ഘാടനം ചെയ്യാന്‍ കേരളത്തിലെത്തിയ പ്രധാനമന്ത്രി സി.പി.എമ്മിനെതിരെ രൂക്ഷവിമര്‍ശനം നടത്തി. ശബരിമലയെ തകര്‍ക്കാനാണ് സി.പി.എം ശ്രമിക്കുന്നതെന്നും ഭരിക്കുന്ന സര്‍ക്കാര്‍ അതിന് കൂട്ട് നില്‍ക്കുകയാണെന്നും മോദി ആരോപിച്ചിരുന്നു. ശബരിമല ദേശീയ പ്രക്ഷോഭമാക്കുമെന്നും അതിന് ബി.ജെ.പി എല്ലാ പിന്തുണയും നല്‍കുമെന്നും സി.പി.എമ്മുകാരുടെ മര്‍ദ്ദനത്തിന് ബി.ജെ.പിക്കാരുടെ മനോവിര്യം കെടുത്താനാകില്ലെന്നും പ്രധാനമന്ത്രി പറഞ്ഞിരുന്നു. കമ്യൂണിസ്റ്റുകാര്‍ക്കും കോണ്‍ഗ്രസിനും ഭരണഘടനാ സ്ഥാപനങ്ങളോടു വിലയില്ല. വിദേശമണ്ണില്‍ ഇന്ത്യയുടെ ജനാധിപത്യ പാരമ്പര്യത്തെ അവര്‍ ചോദ്യം ചെയ്യുന്നതു കണ്ടു. ഇതിന് കോണ്‍ഗ്രസ് മറുപടി പറയേണ്ടിവരുമെന്നും മോദി വ്യക്തമാക്കിയിരുന്നു.

ശബരിമല വിധിയുടെ മറവില്‍ സി.പി.എമ്മിനെ ആക്രമിക്കാനുള്ള മോദിയുടെ നീക്കത്തിനെതിരെ ഭരണഘടനയെ വെല്ലുവിളിക്കാന്‍ പ്രധാനമന്ത്രി ആഹ്വാനം ചെയ്യുന്നു എന്ന രീതിയില്‍ പ്രതിരോധിക്കാനാണ് തീരുമാനിച്ചിരിക്കുന്നത്. അതിന്റെ ഭാഗമായാണ് കോടിയേരി ഇന്ന് മോദിയെ വെല്ലുവിളിച്ചത്. ശബരിമല വിധി നടപ്പാക്കാനുള്ള നടപടി സ്വീകരിക്കണമെന്ന് ആവശ്യപ്പെട്ട് കേന്ദ്ര ആഭ്യന്തരമന്ത്രാലയം സംസ്ഥാന സര്‍ക്കാരിന് കത്ത് നല്‍കിയിരുന്നു. നിരോധനാഞ്ജ അടക്കമുള്ള നിയമനപടികള്‍ സ്വീകരിക്കണമെന്നും ആവശ്യപ്പെട്ടു. ഈ രേഖകള്‍ ഉയര്‍ത്തിയായിരിക്കും തെരഞ്ഞെടുപ്പ് പ്രചരണത്തില്‍ സി.പി.എം ബി.ജെ.പിയെ നേരിടുക.