വനിതാ ശാക്തീകരണവുമായി നടപടിയെ ബന്ധപ്പെടുത്തേണ്ടതില്ല!; തെറ്റിന്റെ കാര്യത്തില് സ്ത്രീയെന്നോ പുരുഷനെന്നോ വ്യത്യാസമില്ല; തെറ്റു ചെയ്തവര്ക്കെതിരെ സര്ക്കാരിന് നടപടി എടുക്കാമെന്ന് ജോസഫൈന്
എസ് പി ചൈത്ര തെരേസ ജോണ് സിപിഎം ഓഫീസ് റെയ്ഡ് ചെയ്തതിനെ തുടര്ന്നുണ്ടായ വിവാദത്തില് പ്രതികരണവുമായി വനിതാ കമ്മീഷന് അധ്യക്ഷ എം സി ജോസഫൈന്. തെറ്റു ചെയ്തവര്ക്കെതിരെ സര്ക്കാരിന് നടപടി എടുക്കാമെന്ന് ജോസഫൈന് പറഞ്ഞു. തെറ്റിന്റെ കാര്യത്തില് സ്ത്രീയെന്നോ പുരുഷനെന്നോ വ്യത്യാസമില്ല. വനിതാ ശാക്തീകരണവുമായി നടപടിയെ ബന്ധപ്പെടുത്തേണ്ടതില്ലെന്നും ചൈത്ര തെറ്റ് ചെയ്തോ എന്ന് സര്ക്കാര് അന്വേഷിക്കട്ടെ എന്നും എം സി ജോസഫൈന് പറഞ്ഞു. എന്നാല് ജോസഫൈന്റെ ആരോപണങ്ങള്ക്ക് വലിയ വിമര്ശനമാണ് സോഷ്യല് മീഡിയയില് ഉയരുന്നത്.
വനിതാ എസ്പിയുടെ നടപടി പോക്സോ കേസിലെ പ്രതികളെ സംരക്ഷിക്കുന്ന ഡിവൈഎഫ്ഐ നേതാക്കള്ക്കെതിരെയായിരുന്നു. ഇതിനെയാണ് പരോക്ഷമായി വനിതാ കമ്മീഷന് അദ്ധ്യക്ഷ വിമര്ശിച്ചിരിക്കുന്നത്. മാത്രമല്ല കമ്മീഷന്റെ പരിധിയില് വരാത്ത കാര്യത്തെപ്പറ്റി അവര് എന്തിന് വിമര്ശനം ഉന്നയിച്ചെന്നും വാദം ഉയരുന്നുണ്ട്. സ്ത്രീകള്ക്കൊപ്പമാണ് പാര്ട്ടിയ്ക്കൊപ്പമല്ല വനിതാ കമ്മീഷന് നില്ക്കേണ്ടതെന്നാണ് സോഷ്യല് മീഡിയയുടെ ഉപദേശം. കൂടാതെ എസ്പി ചെയ്ത തെറ്റ് എന്താണെന്നും അദ്ധ്യക്ഷ വ്യക്തമാക്കണമെന്നും അവര് പറയുന്നുണ്ട്.
അതേസമയം അര്ദ്ധരാത്രി സിപിഎം തിരുവനന്തപുരം ജില്ലാ കമ്മിറ്റി ഓഫീസ് റെയ്ഡ് ചെയ്ത ഡിസിപിയുടെ ചുമതലയുണ്ടായിരുന്ന എസ് പി ചൈത്ര തെരേസ ജോണ് വില കുറഞ്ഞ പബ്ലിസിറ്റിക്കാണ് ശ്രമിച്ചതെന്ന് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന് പറഞ്ഞു. സര്ക്കാരിന് മീതെ പറക്കാന് ഉദ്യോഗസ്ഥരെ അനുവദിക്കില്ലെന്നും അദ്ദേഹം മുന്നറിയിപ്പ് നല്കി.
നിയമവാഴ്ച നടപ്പാക്കാനാണ് പൊലീസ് ശ്രമിക്കേണ്ടത്. പാര്ട്ടി ഓഫീസില് ഏതെങ്കിലും കേസിലെ പ്രതി ഒളിച്ചുതാമസിക്കുന്നില്ല. അങ്ങനെയൊരു വിവരമുണ്ടെങ്കില്, ആ പ്രതിയെ പിടികൂടേണ്ട അടിയന്തര സാഹചര്യം ഉണ്ടായിരുന്നെങ്കില്, പരിശോധന നടത്തിയത് മനസ്സിലാക്കാമായിരുന്നു. പാര്ട്ടി ഓഫീസില് നിന്ന് ഒരു പ്രതിയേയും പിടികൂടാന് കഴിഞ്ഞില്ല. നിയമവാഴ്ച നടപ്പാക്കുന്നതിന് പകരം ഒരു പ്രഹസനം നടത്താനാണ് ശ്രമിച്ചതെന്നും കോടിയേരി ആരോപിച്ചു.
ബുധനാഴ്ച രാത്രി ഒരു സംഘം ആളുകള് തിരുവനന്തപുരം മെഡിക്കല് കോളജ് പൊലീസ് സ്റ്റേഷന് കല്ലെറിഞ്ഞിരുന്നു. ഈ സംഭവത്തില് അമ്ബതോളം ഡിവൈഎഫ്ഐ പ്രവര്ത്തകരെ പ്രതിചേര്ത്ത് പൊലീസ് കേസെടുത്തിട്ടുണ്ട്. പോക്സോ കേസില് അറസ്റ്റിലായ രണ്ട് പ്രവര്ത്തകരെ കാണാന് അനുവദിക്കാതിരുന്നതിനെ തുടര്ന്നായിരുന്നു പ്രതിഷേധം. ഇവരില് ചിലര് സിപിഎം തിരുവനന്തപുരം ജില്ലാ കമ്മിറ്റി ഓഫീസിലുണ്ട് എന്ന വിവരത്തിന്റെ അടിസ്ഥാനത്തിലായിരുന്നു ഡിസിപിയുടെ ചുമതല വഹിച്ച എസ് പി ചൈത്ര തെരേസ ജോണിന്റെ നേതൃത്വത്തില് സിപിഎം ജില്ലാ കമ്മിറ്റി ഓഫീസില് റെയ്ഡ് നടത്തിയത്.
https://www.facebook.com/Malayalivartha
