പൊതുപ്രവര്‍ത്തനത്തെ അംഗീകരിക്കുന്നതിന്റെ ഭാഗമായി രാഷ്ട്രീയ പാര്‍ട്ടികളുടെ ഓഫീസുകള്‍ പോലീസ് പരിശോധനയ്ക്ക് വിധേയമാക്കാറില്ലെന്ന പ്രസ്താവന പിണറായി വിജയന് വൈകി വന്ന ബോധോദയം. കഴിഞ്ഞ മൂന്ന് മാസമായി ബിജെപി പ്രവര്‍ത്തകര്‍ക്ക് നേരെ സംസ്ഥാനത്തുടനീളം പോലീസ് നടത്തിവരുന്ന പേക്കൂത്തുകള്‍ക്കും പിണറായി വിജയന്‍ മറുപടി നല്‍കണമെന്നു ബിജെപി നേതാക്കള്‍. പൊതുപ്രവര്‍ത്തനത്തെ അംഗീകരിക്കാനും ബഹുമാനിക്കുവാനും കഴിയുക എന്നത് ജനാധിപത്യസമൂഹത്തിന്റെ ആധാരശിലകളില്‍ ഒന്നാണെന്ന് മുഖ്യമന്ത്രി വ്യക്തമാക്കുമ്പോള്‍, കേന്ദ്രമന്ത്രി പൊന്‍ രാധാകൃഷ്ണനോട് സിനിമാസ്‌റ്റൈലില്‍ എസ്പി യതീഷ്ചന്ദ്ര തട്ടിക്കയറിയപ്പോള്‍ മുഖ്യമന്ത്രിയും പരിവാരങ്ങളും എസ്പിയ്ക്ക് സല്യൂട്ട് നല്‍കി. കേന്ദ്രമന്ത്രി രാഷ്ട്രീയ പ്രവര്‍ത്തകനാണെന്ന കാര്യം പിണറായി ബോധപൂര്‍വം മറന്നു. ഇതെന്തൊരു നീതിബോധമാണെന്ന് സോഷ്യല്‍ മീഡിയ. പൊതുപ്രവര്‍ത്തനത്തെ അംഗീകരിക്കുകയും ബഹുമാനിക്കുകയും വേണമെന്ന നിലപാട് നിലയ്ക്കലില്‍ പോലീസ് ലംഘിച്ചപ്പോള്‍ കൈയടിച്ച് പ്രോത്സാഹിപ്പിച്ചു.

ബിജെപി സംസ്ഥാന ജനറല്‍ സെക്രട്ടറി കെ. സുരേന്ദ്രനെ നിലയ്ക്കലില്‍ വച്ച് അറസ്റ്റ് ചെയ്ത് കള്ളക്കേസുകള്‍ ചുമത്തി ജയിലില്‍ അടച്ച് സംസ്ഥാനത്തുടനീളം കൊണ്ടുനടന്നപ്പോള്‍, ഇടതുസര്‍ക്കാര്‍ പൊതുപ്രവര്‍ത്തകരോട് കാണിക്കുന്ന ബഹുമാനം എന്തെന്ന് കേരളജനത കണ്ടതാണ്. ശബരിമല ദര്‍ശനത്തിനു പോയ കെ.പി. ശശികല ടീച്ചറെ അറസ്റ്റ് ചെയ്ത പോലീസുകാര്‍ക്ക് ഡിജിപി ഗുഡ് സര്‍വീസ് എന്‍ട്രി നല്‍കി ആദരിച്ചു. ഇങ്ങനെ പോകുന്നു സോഷ്യല്‍ മീഡിയ കമന്റുകള്‍. ഇപ്പോള്‍ മുഖ്യമന്ത്രി പറയുന്നു രാഷ്ട്രീയക്കാരെ ഇകഴ്ത്തിക്കാട്ടുക ചിലരുടെ സ്വഭാവമാണെന്ന്.

പാര്‍ട്ടി ഓഫീസുകളുടെ പ്രവര്‍ത്തനം സുഗമമായി മുന്നോട്ടുകൊണ്ടുപോകുന്നതിന് സഹായകമായ സാഹചര്യം സൃഷ്ടിക്കുക എന്നത് ജനാധിപത്യസമൂഹത്തിന്റെ മുന്നോട്ടുപോക്കിന് അനിവാര്യമാണെന്ന് പിണറായി വ്യക്തമാക്കുമ്പോള്‍ നിരവധി ബിജെപിആര്‍എസ്എസ് കാര്യാലയങ്ങള്‍ പോലീസ് റെയ്ഡ് ചെയ്യിച്ചു. സിപിഎം തിരുവനന്തപുരം ജില്ലാ കമ്മിറ്റി ഓഫീസിലെ പോലീസ് റെയ്ഡ്, പാര്‍ട്ടിയെ ഞെട്ടിച്ചു. തീക്കട്ടയില്‍ ഉറുമ്പ് അരിച്ചോ എന്നാണ് പാര്‍ട്ടി അണികളുടെ ചോദ്യം. മുഖ്യമന്ത്രിയുടെ കുമ്പസാരവും, പാര്‍ട്ടി അണികളുടെ വിമര്‍ശനത്തെ തണുപ്പിക്കുന്നതിനു വേണ്ടിയായിരുന്നു. എസ്പി തെറ്റു ചെയ്തിട്ടില്ലെന്ന് പോലീസിലെ ഉന്നത ഉദ്യാഗസ്ഥര്‍ റിപ്പോര്‍ട്ട് നല്‍കിയിട്ടുണ്ട്. തലശ്ശേരിയില്‍ എഎസ്പി ആയി സേവനം അനുഷ്ഠിച്ചിട്ടുള്ള ചൈത്ര തെരേസായ്ക്ക് വ്യക്തമായിരുന്നു അക്രമം നടത്തിയാല്‍ സിപിഎമ്മുകാര്‍ ഒളിക്കുന്നത് പാര്‍ട്ടി ഓഫീസില്‍ ആയിരിക്കുമെന്ന്. മുന്‍പും ധാരാളം അനുഭവങ്ങള്‍ ഇത്തരത്തിലുണ്ടല്ലോ?

നാമജപക്കാരെ കള്ളക്കേസുകളില്‍ കുടുക്കുന്നതിനെതിരെ പ്രതിഷേധം ഉയര്‍ന്നപ്പോള്‍ പോലീസ്, പോലീസിന്റെ പണിചെയ്യുന്നു എന്നായിരുന്നു മുഖ്യമന്ത്രിയുടെ പ്രതികരണം. എസ്പിയുടെ പാര്‍ട്ടി ഓഫീസ് റെയ്ഡ് ഏത് വിഭാഗത്തില്‍പെടുമെന്ന് കൂടി പിണറായി നിയമസഭയില്‍ വ്യക്തമാക്കണമായിരുന്നു. ഡി.സി.പി. ചൈത്ര തെരേസ ജോണിനെ നിയമസഭയില്‍ വിമര്‍ശിച്ച് മുഖ്യമന്ത്രി പിണറായി വിജയന്‍ പറഞ്ഞത് പൊതുപ്രവര്‍ത്തനത്തെ അംഗീകരിക്കാനും ബഹുമാനിക്കാനും കഴിയുക എന്നത് ജനാധിപത്യസമൂഹത്തിന്റെ ആധാരശിലകളില്‍ ഒന്നാണ്. അതിന് ഭംഗംവരുത്തുന്ന ഒരു പ്രവര്‍ത്തനവും ആരില്‍നിന്നും ഉണ്ടാകാന്‍ പാടില്ല എന്നാണ്.

ചൈത്രയ്‌ക്കെതിരായ അന്വേഷണത്തിന് നിര്‍ദേശിച്ചതു ഞാനാണ്. രാഷ്്രടീയ പാര്‍ട്ടികളുടെ ഓഫീസുകള്‍ സാധാരണ രീതിയില്‍ പരിശോധനയ്ക്ക് വിധേയമാക്കാറില്ല. രാഷ്ട്രീയപ്രവര്‍ത്തനം നടത്തുന്നവരെ ഇകഴ്ത്തിക്കാണിക്കാനുള്ള പ്രവണത ചില സ്ഥാപിതതാല്‍പ്പര്യക്കാരുടെ ഭാഗത്തുനിന്ന് ഉണ്ടാകാറുണ്ട്. പരിശോധനയുമായി ബന്ധപ്പെട്ട് സി.പി..എം. ജില്ലാ സെക്രട്ടറി പരാതി നല്‍കിയിട്ടുണ്ട്. അതുകൊണ്ടാണ് അന്വേഷണം നടത്താന്‍ ഡി.ജി.പിക്കു നിര്‍ദേശം നല്‍കിയത്. മുഖ്യമന്ത്രി നിയമസഭയെ അറിയിച്ചു.