സര്വകലാശാലകളിലെയും കോളജുകളിലെയും ഗെസ്റ്റ് അധ്യാപകരുടെ പ്രതിമാസ വേതനം അര ലക്ഷം രൂപയാക്കാന് യു.ജി.സി നിര്ദേശം
സര്വകലാശാലകളിലെയും കോളജുകളിലെയും ഗസ്റ്റ് അധ്യാപകരുടെ പ്രതിമാസ വേതനം അര ലക്ഷം രൂപയാക്കാന് യു.ജി.സി നിര്ദേശം. ഒരു ക്ലാസിന് 1500 രൂപ എന്ന നിലയില് പ്രതിമാസം പരമാവധി 50,000 രൂപ നല്കാനാണ് സര്വകലാശാലകള്ക്ക് നിര്ദേശം. അനുവദിക്കപ്പെട്ട തസ്തികകളില് മാത്രമേ ഗസ്റ്റ് അധ്യാപകരെ നിയമിക്കാന് പാടുള്ളൂ.
എന്നാല്, സര്വകലാശാലകളില് അനുവദിക്കപ്പെട്ട തസ്തികകളേക്കാള് 20 ശതമാനംവരെ അധികം ഗസ്റ്റ് അധ്യാപകരെ നിയമിക്കാനും അനുമതിയുണ്ട്. അസിസ്റ്റ് പ്രഫസര് തസ്തികയിലേക്ക് യു.ജി.സി നിര്ദേശിച്ച യോഗ്യതയുള്ളവരെ മാത്രമേ ഗസ്റ്റ് അധ്യാപകരായി നിയമിക്കാവൂ. സ്ഥിരം അധ്യാപകരെ നിയമിക്കാനുള്ള നടപടിക്രമങ്ങള് ഗസ്റ്റ് അധ്യാപകരുടെ നിയമനത്തിലും സ്വീകരിക്കണം. വൈസ് ചാന്സലറോ അദ്ദേഹം നാമനിര്ദേശം ചെയ്ത വ്യക്തിയോ അധ്യക്ഷനായ സെലക്ഷന് കമ്മിറ്റിയില് ബന്ധപ്പെട്ട വിഷയത്തിലെ വിദഗ്ധന്, ബന്ധപ്പെട്ട ഫാക്കല്റ്റി ഡീന്, വകുപ്പ് മേധാവി, എസ്.സി/എസ്.ടി/ഒ.ബി.സി/ മൈനോറിറ്റി/വനിത/ഭിന്നശേഷി വിഭാഗത്തില്നിന്ന് വൈസ് ചാന്സലര് നാമനിര്ദേശം ചെയ്യുന്ന അക്കാദമിഷ്യന് എന്നിവര് അംഗങ്ങളായിരിക്കണം.
ക്വോറം തികയാന് വിഷയവിദഗ്ധന് ഉള്പ്പെടെ നാല് അംഗങ്ങള് ഉണ്ടാകണം. ഗസ്റ്റ് അധ്യാപകര്ക്ക് സര്വകലാശാല ഭരണസമിതികളിലേക്ക് വോട്ടിങ് അവകാശമുണ്ടാകില്ല. സര്വിസില്നിന്ന് വിരമിച്ച അധ്യാപകരെ 70 വയസ്സുവരെ ഗസ്റ്റ് അധ്യാപക തസ്തികയിലേക്ക് പരിഗണിക്കാം.
https://www.facebook.com/Malayalivartha
