മരുഭൂമിയില്‍ മാത്രം കണ്ടുവരുന്ന ദേശാടന പക്ഷികളുടെ ഇഷ്ടപ്രദേശമായി കേരളം മാറിയിട്ടുണ്ടെന്ന് മുഖ്യമന്ത്രി പിണറായി വിജയന്‍ പറഞ്ഞത് അല്‍പം തമാശയോടെയാണ് കേരളം കേട്ടത്. ഇടയ്ക്കിടയ്ക്ക് കേരളം ചുറ്റുന്ന നരേന്ദ്ര മോഡിയേയും അമിത് ഷായേയും രാഹുല്‍ ഗാന്ധിയേയും ഉദ്ദേശിച്ചാണോ ഇത് പറഞ്ഞതെന്നാണ് വ്യാഖ്യാനം വന്നത്.

തലശേരി ബ്രണ്ണന്‍ കോളേജില്‍ സംസ്ഥാന ജൈവവൈവിധ്യ കോണ്‍ഗ്രസ് ഉദ്ഘാടനം ചെയ്ത് സംസാരിക്കവേയാണ് മുഖ്യമന്ത്രി ഇക്കാര്യം വ്യക്തമാക്കിയത്. മരുഭൂമിയില്‍ നിന്നുള്ള ദേശാടനപ്പക്ഷിയാണ് ഇടയ്ക്കിടെ കേരളത്തിലെത്തുന്നത്. അത് നമ്മളെയെല്ലാം അസ്വസ്ഥമാക്കുന്നതോ, ഭയചകിതരാക്കുന്നതോ ആണ്. എന്ത് ആപത്താണ് ഈ നാടിന് വരാനിരിക്കുന്നതെന്ന് അറിയില്ലെന്നും പിണറായി പറഞ്ഞു.

അതിനിടെ മുഖ്യമന്ത്രി യഥാര്‍ത്ഥത്തില്‍ ആരെയാണ് ഉദ്ദേശിച്ചതെന്ന് പക്ഷി ശാസ്ത്രജ്ഞര്‍ തന്നെ വെളിപ്പെടുത്തുന്നു. റോസി പാസ്‌റ്റെര്‍ അഥവാ റോസ് മൈന എന്ന പക്ഷി കേരളത്തിലെത്തുന്നത് അവയുടെ നാട്ടില്‍ തണുപ്പ് കൂടുന്നതുകൊണ്ടെന്ന് പരിസ്ഥിതിപ്രവര്‍ത്തകര്‍ പറയുന്നത്.

കാലാവസ്ഥാമാറ്റം വരുത്തിയേക്കാവുന്ന ആപത്തുകളെക്കുറിച്ചുള്ള ഉത്കണ്ഠ പങ്കുവെക്കുമ്പോഴായിരുന്നു പരാമര്‍ശം. ഇവിടെ ചൂട് കൂടുന്നതുകൊണ്ടാണ് അവ എത്തുന്നതെന്നും പരിസ്ഥിതിപ്രേമികള്‍ പറയുന്നുണ്ട്.

യൂറോപ്പ് ഉള്‍പ്പെടെയുള്ള രാജ്യങ്ങളില്‍ ശൈത്യകാലം തുടങ്ങുമ്പോഴാണ് ഇവ കേരളത്തിലേക്ക് എത്തുന്നത്. ആകാശത്ത് സര്‍ക്കസുകള്‍ (അക്രോബാറ്റിക്‌സ്) കാട്ടിക്കൊണ്ടുള്ള ഇവയുടെ പറക്കല്‍ കൗതുകം പകരുന്ന കാഴ്ച. ഒരു കൂട്ടത്തില്‍ ആയിരക്കണക്കിന് പക്ഷികളുണ്ടാകും. സ്റ്റാര്‍ലിങ് കുടുംബത്തില്‍പ്പെട്ട പക്ഷിയുടെ ശാസ്ത്രനാമം പാസ്റ്റര്‍ റോസേസ്.

കോട്ടയം തിരുനക്കര ക്ഷേത്രത്തിനു സമീപമുള്ള ആലിലും പരിസരത്തും ഇവ കൂട്ടമായി ചേക്കേറുന്നത് കാണാം.

എറണാകുളം നോര്‍ത്ത് റെയില്‍വേ സ്‌റ്റേഷനു സമീപവും ഇവയുടെ വലിയ സാന്നിധ്യമുണ്ട്. കേരളത്തിലെമ്പാടും ഏറിയും കുറഞ്ഞും ഇവയുണ്ട്. വന്‍തോതില്‍ വരാന്‍ തുടങ്ങിയിട്ട് അഞ്ചുവര്‍ഷമേ ആയിട്ടുള്ളൂവെന്ന് കോട്ടയം നേച്ചര്‍ സൊസൈറ്റി പ്രസിഡന്റ് ഡോ. ബി.ശ്രീകുമാര്‍ പറഞ്ഞു.

സെപ്റ്റംബര്‍ഒക്ടോബര്‍ മാസങ്ങളിലാണ് മലയാളക്കരയിലേക്കുള്ള ഇവയുടെ ദേശാടനം. വെട്ടുകിളികള്‍, പുഴുക്കള്‍ എന്നിവ പ്രധാന തീറ്റ. മറ്റ് തീറ്റകളും തിന്നും. കേരളത്തിന്റെ പല ഭാഗങ്ങളിലും അഴുകുന്ന മാലിന്യങ്ങള്‍ കൂട്ടിയിടുന്നതും ഇവയെ ഇവിടേക്ക് ആകര്‍ഷിക്കാന്‍ കാരണമാകുന്നെന്ന് കരുതുന്നുണ്ട്.

അതെന്തായാലും ഇവ എന്തെങ്കിലും തരത്തിലുള്ള കുഴപ്പങ്ങള്‍ക്കിടയാക്കുന്നതായി കണ്ടെത്തിയിട്ടില്ല. മാത്രവുമല്ല മാലിന്യത്തിലുണ്ടാകുന്ന പുഴുക്കളെയും മറ്റും വന്‍തോതില്‍ തിന്നുതീര്‍ത്ത് നാട് വൃത്തിയാക്കുന്നുമുണ്ട്.

രണ്ട് കാര്യങ്ങള്‍ക്കായാണ് ഭൂരിഭാഗം പക്ഷികളുടെയും ദേശാടനങ്ങള്‍. കാലാവസ്ഥാവ്യതിയാനം മൂലമുള്ള പ്രശ്‌നങ്ങളില്‍നിന്ന് രക്ഷ നേടാനാണ് ഒന്ന്. തീറ്റ തേടിയാണ് മറ്റൊന്ന്. ഇവയുടേത് ഇത് രണ്ടിനും വേണ്ടിയുള്ള വരവ്.

ഇവയുടെ തലയ്ക്കും ചിറകിനും കറുത്ത നിറമാണ്. ബാക്കി ഭാഗങ്ങളെല്ലാം റോസ് നിറവും. അങ്ങനെയാണ് റോസി പാസ്‌റ്റെര്‍ എന്ന േപര് വീണത്. ഇവിടെ കാണുന്നവ അത്ര നിറമുള്ളവയല്ല. തണുപ്പില്‍നിന്ന് ഇവിടത്തെ ചൂടിലേക്ക് എത്തുമ്പോള്‍ സൗന്ദര്യം ചോര്‍ന്നുപോകുന്നു.

മാര്‍ച്ചിലാണ് മടക്കയാത്ര. ഇവിടത്തെ തീറ്റയെല്ലാം തിന്ന് ജന്മദേശത്ത് തിരിച്ചെത്തുമ്പോഴേക്കും പക്ഷികള്‍ സുന്ദരികളും സുന്ദരന്‍മാരുമാകും. പിന്നെ ഇണചേരലിന്റെ നാളുകള്‍. മുട്ടയിടുന്നതും കുഞ്ഞുങ്ങളെ വളര്‍ത്തുന്നതുമെല്ലാം സ്വദേശത്തുതന്നെ.