കായകുളത്തെയും പുനലൂരിനെയും തമ്മിൽ ബന്ധിപ്പിക്കുന്ന തിരക്കേറിയതും വ്യാപാരപരമായി വളരെ മുൻ തൂക്കമുള്ളതുമായ ഒരു പാതയാണ് KP റോഡ്. ഈ പാതയിൽ അടൂരിൽ തുടങ്ങി പട്ടാഴി മുക്ക് വരെയുള്ള ഭാഗങ്ങൾ തികച്ചും ഗതാഗത യോഗ്യമല്ലാതെയായി തീർന്നിട്ട് നാളുകൾ ഏറെയായി. അറിയപ്പെടുന്ന പല രാഷ്ട്രീയ നേതാക്കളും ദിനവും കടന്നു പോകാറുള്ള ഈ പാതയുടെ അവസ്ഥക്ക് നാളിതുവരെ യാതൊരുവിധ പുരോഗതിയും ഉണ്ടായിട്ടില്ല.

നികുതിയടക്കുന്ന സാധാരണക്കാരായ പൗരന്മാർ കാലങ്ങളായി ഒറ്റപ്പെട്ട പ്രതിഷേധങ്ങൾ നടത്തികൊണ്ടിരുന്നു. വരാനിരിക്കുന്ന അപകടങ്ങളെ മുൻകൂട്ടി കണ്ടു കൊണ്ട് നടത്തിയ ഇത്തരം പ്രതിഷേധങ്ങളെ ഉത്തരവാദിത്തപ്പെട്ടവർ അവഗണിച്ചു കൊണ്ടേയിരുന്നു. അങ്ങനെ ഒടുവിൽ ആശങ്കപ്പെട്ടതു സംഭവിക്കുകയും ചെയ്തു.മരുതിമൂട് പള്ളിയിലേക്ക് മകനോടൊപ്പം ബൈക്കിന്റെ പിന്നിലിരുന്നു പോകുകയായിരുന്ന വീട്ടമ്മ റോഡിലെ കുഴിയിൽ വീണ ബെക്കിൽ നിന്നും തെറിച്ചു പിന്നാലെ വന്ന ബസിനു അടിയിൽ പെട്ടു മരണമടഞ്ഞു.

ജനപ്രതിനിധികളും, PWD യും, കോൺട്രാക്റ്റർമാരും, വാട്ടർ അതോറിറ്റിയും പരസ്പരം പഴിചാരി പൊട്ടനും ചട്ടിയും കളിച്ചു കൊണ്ടിരിക്കുന്നു. ഇത്രയുമായിട്ടും ഇവരുടെ ഭാഗത്ത് നിന്നും വ്യക്തമായ മറുപടി ലഭിച്ചിട്ടുമില്ല. അവർക്കിടയിലുള്ള ആശയക്കുഴപ്പത്തിനിടയിൽ പെട്ടു റോഡിന്റെ അറ്റകുറ്റപ്പണി ഇനിയും നീണ്ടു പോയാൽ ഇവിടെ ജീവിതങ്ങൾ ഇനിയും പൊലിഞ്ഞു പൊയ്ക്കൊണ്ടിരിക്കും. തിരഞ്ഞെടുക്കപ്പെട്ട പ്രതിനിധികൾക്കും, ഉത്തരവാദിത്തപ്പെട്ട ഉദ്യഗസ്ഥർക്കും, പ്രതിഫലം വാങ്ങുന്ന കരാറ് പണിക്കാരനും ഒത്തോരുമിച്ചു പോകാൻ കഴിയാത്ത ഒരു സാഹചര്യമാണ് ഇപ്പോഴുള്ളത്.

ഒരു നിശ്ചിത സമയപരിധിക്കുള്ളിൽ അറ്റകുറ്റപ്പണി നടത്തി KP റോഡ് ഗതാഗത യോഗ്യമാക്കേണ്ടത് നമ്മുടെയൊക്കെ ഒരു ആവശ്യമാണ്. അത്‌ എത്തരത്തിൽ പ്രാവർത്തികമാക്കാൻ കഴിയുമെന്നത് ഒരു ചോദ്യചിഹ്നമായി അവശേഷിക്കുന്നു.

ഇതിനൊരു പരിഹാരം കണ്ടെത്താനായി നല്ലവരായ കുറേ നാട്ടുകാർ ഒത്തു ചേർന്ന് തങ്ങളാൽ ആവും വിധം പ്രതിഷേധങ്ങൾ സംഘടിപ്പിച്ചിട്ടുണ്ട്.വളരെ ഗൗരവമേറിയ ഈ വിഷയം ഏത് വിധേനയും ബന്ധപ്പെട്ട ആൾക്കാരിൽ എത്തിച്ചു KP റോഡിനെ ഗതാഗതയോഗ്യമാക്കാനും ഇനിയൊരു ജീവിതം പൊലിഞ്ഞു പോകാതെയിരിക്കുവാനുമായി #SaveKPRoadAdoor ക്യാമ്പയ്‌നിൽ പങ്കു ചേരൂ.

ഓരോ ജീവൻ നിരത്തിൽ വീണു പൊലിയുമ്പോഴും താൽക്കാലികമായി ആവേശം ആളിക്കത്തിക്കുന്നതിലും നല്ലതല്ലേ തങ്ങളാലാകും വിധത്തിൽ പ്രതിഷേധങ്ങൾ സംഘടിപ്പിക്കുന്നത്. കാലത്തിനനുസരിച്ചുള്ള ഷേവിങ് പ്രതിഷേധത്തിലൂടെ ഇതിനൊരു നടപടി ഉണ്ടാകും വരെ നമുക്ക് #SaveKPRoadAdoor നൊപ്പം പങ്കു ചേരാം. അധികാരികളെയും രാഷ്ട്രീയ നേതാക്കളെയും നിരന്തരം ഓർമ്മപ്പെടുത്തി കൊണ്ടിരിക്കാം.