നാടൊന്നാകെ തിരുവോണം ആഘോഷിക്കുമ്പോൾ കൊല്ലം ചവറയിലെ പൂമുഖത്തു വീട് ഇത്തവണ വലിയൊരു സങ്കടക്കടലിലാണ്. ഒരുമിച്ചിരുന്ന് ഓണമുണ്ണാൻ ഇന്ന് ഈ വീട്ടിൽ മൂന്ന് പ്രിയപ്പെട്ടവരില്ല. കഴിഞ്ഞ ജൂലൈ 31-ന് നീണ്ടകര അഴിമുഖത്തിന് സമീപം വള്ളം മറിഞ്ഞുണ്ടായ അപകടമാണ് ഈ കുടുംബത്തിന്റെ സന്തോഷങ്ങൾ കവർന്നത്. രേഷ്മയുടെ ഭർത്താവ് രാധാകൃഷ്ണനും, അച്ഛൻ യു. രാജീവനും അപകടത്തിൽ മരണപ്പെട്ടു. മകൻ ഗൗതം കൃഷ്ണയെ ഇതുവരെ കണ്ടെത്താനായിട്ടില്ല. കഴിഞ്ഞ 27 ദിവസമായി മകനായുള്ള കാത്തിരിപ്പിലാണ് ഈ അമ്മ. സർക്കാർ തലത്തിലുള്ള ഔദ്യോഗിക തെരച്ചിൽ അവസാനിപ്പിച്ചെങ്കിലും തീരദേശ പൊലീസിന്റെ പരിശോധന തുടരുകയാണ്. ദുരന്ത പ്രതികരണ നിധിയിൽ നിന്നുള്ള എട്ടു ലക്ഷം രൂപയുടെ ധനസഹായം കുടുംബത്തിന് കൈമാറിയിട്ടുണ്ട്. എങ്കിലും, പ്രിയപ്പെട്ടവരുടെ വേർപാട് ഈ ഓണക്കാലത്ത് പൂമുഖത്തു വീടിന് ഒരിക്കലും ഉണങ്ങാത്ത നോവായി മാറുന്നു.