സദ്യയ്ക്കുള്ള ശർക്കരവരട്ടി വീട്ടിൽ തയ്യാറാക്കുന്നതെങ്ങനെയെന്നു നോക്കാം. അതിനായി പച്ച ഏത്തക്ക- നാല് എണ്ണവും ശർക്കര- 3/4 കപ്പും ആവശ്യത്തിന് വെളിച്ചെണ്ണയും രണ്ട് ടീസ്‌പൂൺ വെള്ളവും രണ്ട് ടീസ്‌പൂൺ പ‌ഞ്ചസാരയും ഒന്നര ടീസ്‌പൂൺ ചുക്കുപ്പൊടിയും ഒന്നര ടീസ്‌പൂൺ ജീരകപ്പൊടിയും അര ടീസ്‌പൂൺ ഏലയ്ക്ക പൊടിയും ആവശ്യത്തിന് അരിപ്പൊടിയും എടുക്കുക.

ആദ്യം പച്ച ഏത്തക്ക നാലെണ്ണം നന്നായി തൊലികള‌‌ഞ്ഞ് വെള്ളത്തിലിട്ട് കഴുകിയെടുത്ത ശേഷം ഏത്തക്ക രണ്ടാക്കി മുറിച്ച് നടുവിൽ വച്ച് കീറി അത്യാവശ്യം വലിപ്പത്തിൽ അരിയണം. ഇനി ഇത് വെള്ളത്തിലിട്ട് നന്നായി കഴുകി കറ കളഞ്ഞ് ഒരു തുണികൊണ്ട് തുടച്ച് വെള്ളം കളയണം. ഒരു പാനിൽ ആവശ്യത്തിന് വെളിച്ചെണ്ണ ഒഴിച്ച് ചൂടായതിന് ശേഷം കായ ചേർത്ത് ചെറിയ തീയിലിട്ട് നന്നായി വറുത്തെടുക്കണം.മറ്റൊരു പാനിൽ ശർക്കരയും അൽപ്പം വെള്ളവും ചേർത്ത് ഉരുക്കി ശർക്കര പാനി ഉണ്ടാക്കണം. ഇതിലേയ്ക്ക് പഞ്ചസാരയും ചേർത്ത് ഇളക്കാം. ഇനി നേരത്തെ വറുത്തുവച്ച ഏത്തക്ക കൂടി ചേർത്ത് നന്നായി ഇളക്കണം. ശേഷം ഏലയ്ക്ക പൊടി,​ ജീരകപ്പൊടി, ചുക്കുപ്പൊടി എന്നിവ കൂടി ചേർത്ത് ഇളക്കി യോജിപ്പിക്കണം. ഇതിലേയ്ക്ക് ആവശ്യത്തിന് അരിപ്പൊടി ചേർത്ത് നന്നായി ഇളക്കിയെടുത്താൽ മതി.