കോണ്ഗ്രസിന്റെ ശത്രു ബി.ജെ.പി തന്നെ; ലോക്സഭാ തിരഞ്ഞെടുപ്പില് കേരളത്തിലെ ഏതെങ്കിലും ഒരു സീറ്റില് നിന്നും മത്സരിക്കാമെന്ന് കോണ്ഗ്രസ് അദ്ധ്യക്ഷന് രാഹുല് ഗാന്ധി സമ്മതിച്ചതായി അറിയില്ലെന്ന് മുതിര്ന്ന പാര്ട്ടി നേതാവ് പി.സി.ചാക്കോ
ലോക്സഭാ തിരഞ്ഞെടുപ്പില് കേരളത്തിലെ ഏതെങ്കിലും ഒരു സീറ്റില് നിന്നും മത്സരിക്കാമെന്ന് കോണ്ഗ്രസ് അദ്ധ്യക്ഷന് രാഹുല് ഗാന്ധി സമ്മതിച്ചതായി അറിയില്ലെന്ന് മുതിര്ന്ന പാര്ട്ടി നേതാവ് പി.സി.ചാക്കോ. വയനാട്ടില് നിന്ന് മത്സരിക്കാമെന്ന് രാഹുല് സമ്മതിച്ചതായി ഏതെങ്കിലും നേതാക്കള് പറയുന്നുണ്ടെങ്കില് അത് വസ്തുതാ വിരുദ്ധമാണ് എന്നും അദ്ദേഹം പറഞ്ഞു. രാഹുല് അങ്ങനെ ആരോടും പറഞ്ഞിട്ടില്ലെന്നതാണ് സത്യം. എന്നാല് ദക്ഷിണേന്ത്യയിലെ ഒരു മണ്ഡലത്തില് നിന്നും മത്സരിക്കുന്നത് നല്ലതാണെന്നും അദ്ദേഹം ഡല്ഹിയില് മാദ്ധ്യമപ്രവര്ത്തകരുമായി സംസാരിക്കുമ്പോള് വ്യക്തമാക്കി.
കേരളത്തില് സി.പി.എമ്മിനെതിരെ രാഹുല് ഗാന്ധി മത്സരിക്കുന്നത് തെറ്റായ സന്ദേശമാണ് നല്കുന്നതെന്ന മുഖ്യമന്ത്രി പിണറായി വിജയന്റെ ആരോപണത്തോട് താന് യോജിക്കുന്നില്ല എന്നും അദ്ദേഹം വ്യക്തമാക്കി. ദേശീയാടിസ്ഥാനത്തില് ഒരുമിച്ച് നില്ക്കുന്ന പാര്ട്ടികള് പ്രാദേശിക തലത്തില് പരസ്പരം മത്സരിക്കുന്ന കീഴ്വഴക്കം നേരത്തെയുണ്ട്. എന്നാല് കോണ്ഗ്രസിന്റെ പ്രധാന ശത്രു ബി.ജെ.പി തന്നെയാണ്. ഇക്കാര്യത്തില് ഒരു സംശയവുമില്ല. രാഹുല് ഗാന്ധി ദക്ഷിണേന്ത്യയില് നിന്ന് മത്സരിക്കണമെന്ന് കര്ണാടക, തമിഴ്നാട്, കേരള തുടങ്ങിയ കോണ്ഗ്രസ് കമ്മിറ്റികള് ആവശ്യപ്പെട്ടിട്ടുണ്ട്. എന്നാല് ഇക്കാര്യത്തില് അദ്ദേഹം അനുകൂലമായ തീരുമാനം എടുത്തിട്ടില്ല. രാഹുല് വയനാട്ടില് മത്സരിക്കുമെന്ന രീതിയില് പ്രചാരണം നടത്തിയത് എന്തിന്റെ അടിസ്ഥാനത്തിലാണ് മനസിലാകുന്നില്ല എന്നും അദ്ദേഹം പറഞ്ഞു.
കൂടാതെ കേരളത്തിലെ കോണ്ഗ്രസ് സ്ഥാനാര്ത്ഥി ചര്ച്ചകള് പക്വമായ രീതിയിലല്ല നടന്നതെന്നും പി.സി ചാക്കോ പറഞ്ഞു. ഗ്രൂപ്പ് വീതം വെപ്പാണ് നടന്നത്. മുതിര്ന്ന നേതാക്കള്ക്ക് പോലും സങ്കുചിതമായ ഗ്രൂപ്പ് താത്പര്യങ്ങളെ മറികടക്കാനാകുന്നില്ല. എന്നാല് രാഹുലിന്റെ സ്ഥാനാര്ഥിത്വം ഗ്രൂപ്പ് വഴക്കിന്റെ ഭാഗമാണെന്ന അഭിപ്രായം ശരിയല്ലെന്നും പി.സി ചാക്കോ തുറന്നടിച്ചു.
അതേസമയം രാഹുല് ഗാന്ധി വയനാട്ടില് മത്സരിക്കുന്നതില് തീരുമാനം ആവാത്തതിനെ തുടര്ന്ന് കെപിസിസി അധ്യക്ഷന് മുല്ലപ്പള്ളി രാമചന്ദ്രന്റെ വാര്ത്താ സമ്മേളനം മാറ്റി. ഞായറാഴ്ച രാവിലെ നടത്താന് നിശ്ചയിച്ചിരുന്ന വാര്ത്താ സമ്മേളമാണ് റദ്ദാക്കിയത്. തിങ്കളാഴ്ച ചേരുന്ന തെരഞ്ഞെടുപ്പ് സമിതി യോഗത്തിനുശേഷം മാത്രമേ മുല്ലപ്പള്ളി രാമചന്ദ്രന് മാധ്യമങ്ങളെ കാണൂവെന്നാണ് റിപ്പോര്ട്ടുകള് പുറത്തുവരുന്നത്. യോഗത്തില് രാഹുലിന്റെ സ്ഥാനാര്ത്ഥിത്വം സംബന്ധിച്ചും ചര്ച്ച ചെയ്യുന്നതാണ്. അതേസമയം രാഹുല് മത്സരിക്കാന് സന്നദ്ധത അറിയിച്ചിട്ടില്ലെന്നാണ് പുതിയ റിപ്പോര്ട്ടുകള്. രാഹുലിന്റെ തീരുമാനം വരുന്നതിന് മുമ്പ് പ്രഖ്യാപനം നടത്തിയ കേരളഘടകത്തിന്റെ തീരുമാനത്തിനെതിരെ പാര്ട്ടിക്കുള്ളില് മുറുമുറുപ്പം ആരംഭിച്ചിട്ടുണ്ട്.
ദക്ഷിണേന്ത്യന് സംസ്ഥാനങ്ങളില് നിന്ന് ലോക്സഭാ തെരഞ്ഞെടുപ്പില് മത്സരിക്കാന് ക്ഷണമുണ്ടെന്നും രാഹുല് ഗാന്ധി ഉചിതമായ തീരുമാനമെടുക്കുമെന്നും പാര്ട്ടി വക്താവ് രണ്ദീപ് സൂര്ജേവാല പറഞ്ഞു. വയനാട് സീറ്റ് സംബന്ധിച്ച് അന്തിമതീരുമാനമെടുക്കേണ്ടത് രാഹുല് ഗാന്ധിയാണ്. കെപിസിസിയുടെ ആവശ്യം നേതൃത്വം അംഗീകരിച്ചിരുന്നെന്നും ഉമ്മന്ചാണ്ടി അറിയിച്ചു. ശനിയാഴ്ച 38 മണ്ഡലങ്ങളിലെ സ്ഥാനാര്ഥി പട്ടിക കോണ്ഗ്രസ് പുറത്തുവിട്ടെങ്കിലും വയനാടും വടകരയും അതില് ഉള്പ്പെടുത്തിയിട്ടില്ല.
https://www.facebook.com/Malayalivartha
