സ്ഥാനാര്ത്ഥിത്വം അനിശ്ചിതത്വത്തില്... ദേവസ്വം ബോര്ഡ് നിയമനത്തില് തുഷാറിനെ പൂട്ടാന് സര്ക്കാരിന് അവസരം; തുഷാറിനെതിരേ പ്രോസിക്യൂഷന് അനുമതി ഉടന് തീരുമാനിക്കണമെന്ന് ഹൈക്കോടതി
ബി.ഡി.ജെ.എസ് നേതാവ് തുഷാര് വെള്ളാപ്പള്ളി തൃശൂരില് മത്സരിക്കുമെന്ന് ഏതാണ്ട് തീരുമാനമായിരിക്കുകയാണ്. തൃശൂരില് മത്സരിക്കാനായി തുഷാര് വെള്ളാപ്പള്ളി ചില ഉപാധികള് മുന്നോട്ട് വെച്ചിരുന്നു. ഇതിന്റെ അടിസ്ഥാനത്തില് ബി.ജെ.പി കേന്ദ്ര നേതാക്കളുമായി ചര്ച്ച നടത്തി അനുകൂല തീരുമാനം ലഭിച്ചതിനെ തുടര്ന്നാണ് തുഷാര് മത്സരിക്കാന് തയ്യാറായത്. ചൊവ്വാഴ്ച ഇത് സംബന്ധിച്ച് പ്രഖ്യാപനമുണ്ടാകും. അതിനിടെ രാഹുല് ഗാന്ധി മത്സരിക്കുകയാണെങ്കില് തുഷാറിനെ വയനാട് മത്സരിപ്പിക്കാനും നീക്കമുണ്ട്.
എസ്എന്ഡിപി ജനറല് സെക്രട്ടറി വെള്ളാപ്പള്ളി നടേശനുമായി ഏറെ അടുപ്പമുള്ള സിപിഎമ്മിന് മകന് തുഷാര് വെള്ളാപ്പള്ളി സ്ഥാനാര്ത്ഥിയാകുന്നതിനോട് ഒട്ടും യോജിപ്പില്ല. ഇക്കാര്യം വെള്ളാപ്പള്ളിയെ അറിയിച്ചതുമാണ്. എന്നാല് അച്ഛന്റെ താക്കീത് പോലും മറികടന്ന് തുഷാര് സ്ഥാനാര്ത്ഥിയാകുകയാണ്. ഈഴവ വോട്ട് ബാങ്ക് പ്രതീക്ഷിച്ച സിപിഎം തുഷാര് സ്ഥാനാര്ത്ഥിയാകുന്നതോടെ കാലുമാറുമെന്ന് ആശങ്കയുണ്ട്. ഇപ്പോള് വലിയൊരു വടിയാണ് സിപിഎമ്മിന് കിട്ടിയിരിക്കുന്നത്.
ഗുരുവായൂര് ദേവസ്വം ബോര്ഡ് നിയമനത്തില് തുഷാര് വെള്ളാപ്പള്ളിക്കെതിരായ വിജിലന്സ് കേസില് പ്രോസിക്യൂഷന് അനുമതി വൈകുന്നതില് സര്ക്കാരിനു ഹൈക്കോടതി വിമര്ശനം നേരിട്ടിരിക്കുകയാണ്.
ഇക്കാര്യത്തില് സര്ക്കാര് നിലപാട് അടിയന്തരമായി അറിയിക്കണമെന്നു ജസ്റ്റിസ് പി. ഉബൈദ് നിര്ദേശിച്ചു. കേസ് അടുത്ത മാസം ആദ്യം പരിണഗിക്കും.പ്രതിസ്ഥാനത്തുനിന്ന് ഒഴിവാക്കാന് രണ്ടാം പ്രതി ദേവസ്വം മുന് മാനേജിങ് കമ്മിറ്റിയംഗം എന്. രാജു നല്കിയ ഹര്ജിയിലാണ് ഹൈക്കോടതിയുടെഇടപെടല്. തുഷാര് വെള്ളപ്പള്ളി ഗുരുവായൂര് ദേവസ്വം ബോര്ഡ് അംഗമായിരിക്കെ, രണ്ടു ജീവനക്കാരെ ചട്ടം മറികടന്ന് ഉയര്ന്ന തസ്തികയില് നിയമിച്ചുവെന്നാണു കേസ്.
ഗുരുവായൂര് ദേവസ്വത്തില് അസി. ലൈന്മാന് തസ്തികയില് ജോലി ചെയ്തിരുന്ന ഭരണസമിതിയംഗം എന്. രാജുവിനെ ചട്ടവും നിയമവും ലംഘിച്ച് യോഗ്യതയില്ലാതിരുന്നിട്ടും ഫോര്മാന് ഗ്രേഡ് വണ് എന്ന ഉയര്ന്ന തസ്തിക സൃഷ്ടിച്ച് സ്ഥാനക്കയറ്റം നല്കി നിയമിച്ചതിനും കെ. രഞ്ജിത്ത് എന്നയാളെ സിസ്റ്റം അനലിസ്റ്റ് എന്ന തസ്തിക സൃഷ്ടിച്ച് ഉയര്ന്ന ശമ്പളത്തില് നിയമിച്ചതിനുമെതിരേ കൊടുങ്ങല്ലൂര് സ്വദേശി നല്കിയ പരാതിയിലാണ് വിജിലന്സ് കോടതി നിര്ദേശപ്രകാരം കേസെടുത്തത്.
ദേവസ്വം ബോര്ഡ് ചെയര്മാനായിരുന്ന ടി.വി. ചന്ദ്രമോഹന് അടക്കം പ്രതികളാണ്. അഞ്ചാം പ്രതിയാണു തുഷാര്. ഇല്ലാത്ത തസ്തികയുണ്ടാക്കിയാണു നിയമനമെന്നും അഴിമതി നടന്നിട്ടുണ്ടെന്നും വിജിലന്സ് കണ്ടെത്തിയിരുന്നു. തുര്ന്നാണു പ്രതികളെ പ്രോസിക്യൂട്ട് ചെയ്യാന് സര്ക്കാരിന്റെ അനുമതി തേടിയത്.
പുതിയ നിയമം അനുസരിച്ച് ദേവസ്വം ബോര്ഡ് ഭാരവാഹികളായിരുന്നവരെ പൊതുസേവകരായി കണക്കാക്കും. സര്ക്കാര് അനുമതി നല്കാത്തതിനാല് കുറ്റപത്രം സമര്പ്പിക്കാന് കഴിയാത്ത സ്ഥിതിയാണെന്നു വിജിലന്സ് ബോധിപ്പിച്ചു.
അതിനിടെ ചൊവ്വാഴ്ച തൃശൂരില് ബി.ഡി.ജെ.എസ് കൗണ്സില് ചേരുന്നുണ്ട്. അതില് ഇക്കാര്യവും തുഷാറിന്റെ സ്ഥാനാര്ത്ഥിത്വവും ചര്ച്ചയാകുന്നു. ഈ കൗണ്സിലിന് ശേഷം നടക്കുന്ന വാര്ത്താ സമ്മേളനത്തിലായിരിക്കും പാര്ട്ടി സ്ഥാനാര്ഥികളെ പ്രഖ്യാപിക്കുക. തൃശൂര് ഉള്പ്പടെ അഞ്ച് സീറ്റിലാണ് ബി.ഡി.ജെ.എസ് സ്ഥാനാര്ഥികള് മത്സരിക്കുക.
തൃശൂരില് തുഷാര് സ്ഥാനാര്ഥിയാകും എന്ന ഉറപ്പ് ലഭിച്ചതോടെയാണ് പത്തനംതിട്ടയില് കെ. സുരേന്ദ്രനെ ബി.ജെ.പി സ്ഥാനാര്ഥിയായി പ്രഖ്യാപിച്ചത്. എന്നാല് സ്ഥാനാര്ഥിയാകുന്നതുമായി ബന്ധപ്പെട്ട് എന്തൊക്കെ ഉറപ്പുകളാണ് തുഷാറിന് കൊടുത്തത് എന്ന കാര്യം വ്യക്തമായിട്ടില്ല. അതിനിടെ ഈ കേസ് വെള്ളാപ്പള്ളിമാരെ ഞെട്ടിച്ചിട്ടുണ്ട്.
https://www.facebook.com/Malayalivartha
