ശ്രീചിത്ര തിരുനാള്‍ ഇന്‍സ്റ്റിറ്റിയൂട്ട് ഓഫ് മെഡിക്കല്‍ സയന്‍സസിലെ ഗവേഷകര്‍ വികസിപ്പിച്ച ക്യാന്‍സറിനെതിരായ അത്ഭുത മരുന്ന് ഇപ്പോള്‍ ലോകത്ത് തന്നെ ചര്‍ച്ചയാകുകയാണ്. ഞരമ്പില്‍ നേരിട്ടു കുത്തിവയ്ക്കാവുന്ന മരുന്ന് എലികള്‍ ഉള്‍പ്പെടെ മൃഗങ്ങളില്‍ പരീക്ഷിച്ചു വിജയിച്ചു. കൂടുതല്‍ ക്ലിനിക്കല്‍ പരീക്ഷണങ്ങള്‍ക്കായി മരുന്നിന്റെ സാങ്കേതികവിദ്യ സ്വകാര്യ കമ്പനിക്കു കൈമാറി. വിജയകരമായാല്‍ 3 വര്‍ഷത്തിനകം മരുന്ന് വിപണിയിലെത്തുമെന്നാണു പ്രതീക്ഷ. അതേസമയം ഈ മരുന്നിനെതിരെ കുപ്രചാരണങ്ങള്‍ തെറ്റെന്ന് തെളിവ് സഹിതം പുറത്തു വരികയും ചെയ്തു.

സാധാരണയായി കാണപ്പെടുന്ന ഒരു സസ്യത്തില്‍ നിന്നു വേര്‍തിരിച്ച ഏക തന്മാത്രാ പദാര്‍ഥവും രക്തത്തിലെ ആല്‍ബുമിന്‍ എന്ന പ്രോട്ടീനും ചേര്‍ത്താണു ശ്രീചിത്രയിലെ ഗവേഷകര്‍ കാന്‍സര്‍ കോശങ്ങളെ നശിപ്പിക്കാന്‍ കഴിവുള്ള മരുന്നു സൃഷ്ടിച്ചത്. ഇതു ലോകത്തു തന്നെ ആദ്യമാണെന്ന് ഇവര്‍ ചൂണ്ടിക്കാട്ടി. അര്‍ബുദ കോശങ്ങളെ നശിപ്പിക്കുന്ന പദാര്‍ഥങ്ങള്‍ ചില സസ്യങ്ങളില്‍ നിന്നു വേര്‍തിരിച്ചെടുക്കാറുണ്ടെങ്കിലും അതൊന്നും ജലത്തില്‍ ലയിക്കാത്തതിനാല്‍ കുത്തിവയ്പിലൂടെ ശരീരത്തിലേക്കു നേരിട്ടു കടത്തിവിടാനാവില്ല.

ശ്രീചിത്രയിലെ ഗവേഷകര്‍ സസ്യപദാര്‍ഥത്തിലെ പ്രോട്ടീനും ആല്‍ബുമിനുമായി സംയോജിപ്പിക്കുകയാണു ചെയ്തത്. അങ്ങനെയുണ്ടാക്കുന്ന മരുന്ന് ഞരമ്പുകളില്‍ കൂടി കുത്തിവയ്ക്കാം. എസ്‌സിടിഎസി 2010 എന്നാണു മരുന്നിനു പേരു നല്‍കിയിരിക്കുന്നത്. സസ്യമേതെന്ന് ഈ ഘട്ടത്തില്‍ വെളിപ്പെടുത്തിയിട്ടില്ല. കൂടുതല്‍ മൃഗങ്ങളിലുള്‍പ്പെടെ പരീക്ഷണങ്ങളിലൂടെ മാത്രമേ ഏതൊക്കെ തരം അര്‍ബുദങ്ങള്‍ക്കു മരുന്നു ഫലപ്രദമാകുമെന്നു കണ്ടെത്താനാകൂ. മൂന്നോ നാലോ പരീക്ഷണഘട്ടങ്ങള്‍ കഴിഞ്ഞാല്‍ മാത്രമേ ഡ്രഗ് കണ്‍ട്രോളര്‍ ജനറലിന്റെ ഉള്‍പ്പെടെ അംഗീകാരം ലഭിക്കൂ.

ഇന്ത്യന്‍ കൗണ്‍സില്‍ ഓഫ് മെഡിക്കല്‍ റിസര്‍ച്ചിന്റെ ഭാഗമായി ഡോ. ലിസി കൃഷ്ണന്റെ നേതൃത്വത്തിലാണു മരുന്ന് വികസിപ്പിച്ചത്. ഡോ. രഞ്ജിത് പി.നായര്‍, ഡോ. മോഹനന്‍, ഡോ. ആര്യ അനില്‍, ഡോ. മെജോ സി.കോര, ഡോ. ഹരികൃഷ്ണന്‍ തുടങ്ങിയവരാണു ഗവേഷക സംഘത്തിലുണ്ടായിരുന്നത്. 2010 ല്‍ തുടക്കമിട്ട ഗവേഷണമാണ് ഇപ്പോള്‍ ഫലം കണ്ടിരിക്കുന്നത്. ശ്രീചിത്രയിലെ ഗവേഷകരും മെഡിക്കല്‍ റിസര്‍ച് കൗണ്‍സിലും ചേര്‍ന്നു കണ്ടുപിടിത്തത്തിനു പേറ്റന്റിന് അപേക്ഷിച്ചിട്ടുണ്ട്.

മരുന്ന് വികസിപ്പിച്ചതിന്റെ പ്രധാന ഘട്ടങ്ങള്‍ ഇവയായിരുന്നു

അര്‍ബുദ കോശങ്ങളെ നശിപ്പിക്കാന്‍ കഴിവുള്ള ഏകകോശ തന്മാത്രാ പദാര്‍ഥം സസ്യത്തില്‍ നിന്നു വേര്‍തിരിച്ചെടുത്തു.

രക്തത്തില്‍ കാണപ്പെടുന്ന പ്രോട്ടീന്‍ ആയ ആല്‍ബുമിന്‍ ശുദ്ധീകരിച്ചെടുത്തു.

ആല്‍ബുമിനും സസ്യപദാര്‍ഥത്തിന്റെ പ്രോട്ടീനും സംയോജിപ്പിക്കുന്നു. ഇതിന് എസ്‌സിടിഎസി 2010 എന്ന പേരു നല്‍കി.

എസ്‌സിടിഎസി 2010 വീണ്ടും ശുദ്ധീകരിച്ചു പൗഡര്‍ രൂപത്തില്‍ സൂക്ഷിക്കുന്നു. ഇതു ജലത്തില്‍ ലയിപ്പിച്ച ശേഷം കുത്തിവയ്ക്കാം.

എന്തായാലും ഈ വാര്‍ത്ത വളരെ പ്രതീക്ഷയോടെയാണ് കേരളം കാണുന്നത്. കാരണം കേരളത്തിലെ ക്യാന്‍സര്‍ രോഗികളുടെ എണ്ണം ഓരോ വര്‍ഷവും വര്‍ധിച്ചു വരികയാണ്. മാത്രമല്ല ക്യാന്‍സര്‍ ഒരുകുടുംബത്തിന്റെ നട്ടെല്ലാണ് തകര്‍ക്കുന്നത്. അതിനാലാണ് ഈ മരുന്നിനെ വലിയ ആശ്വാസത്തോടെ കാണുന്നത്.