തകര്ന്ന റോഡുകള്, പത്തുവര്ഷമായി പൊതുഗതാഗത സംവിധാനമില്ല; ബി.ജെ.പി സൗരാഷ്ട്ര ചാടി കടക്കുമോ?
ബി.ജെ.പി സൗരാഷ്ട്ര ചാടി കടക്കുമോ എന്നുള്ളതാണ് ഇപ്പോള് ഉയരുന്ന പ്രധാന ചോദ്യം. ഗുജറാത്തിന്റെ അധികാരകേന്ദ്രങ്ങള് രാഷ്ട്രീയമായി അഹമ്മദാബാദും സാമ്പത്തികമായി സൂറത്തും സാംസ്കാരികമായി വഡോദരയുമാണെങ്കിലും ഹൃദയം സൗരാഷ്ട്രയാണ്. ഈ ഹൃദയഭൂമിയില് ആധിപത്യം നിലനിര്ത്താന് ഭരണകക്ഷിയായ ബി.ജെ.പി.ക്ക് കഴിഞ്ഞിട്ടില്ല. തകര്ന്ന റോഡുകള്. പത്തുവര്ഷമായി പൊതുഗതാഗതസംവിധാനമില്ല.
25 രൂപ മുടക്കിയാണ് ഗ്രാമീണര് ചക്കഡ എന്ന ബൈക്ക്റിക്ഷകളില് മൗവയിലെത്തുന്നത്. കൃഷിയിടങ്ങള് നിലനിര്ത്താനുള്ള വലിയ സമരങ്ങളിലാണ് ഇവര്. കോടഡയിലെ കൃഷിഭൂമികളില്നിന്ന് ചുണ്ണാമ്പുകല്ല് ഖനനം തുടങ്ങിയിരിക്കുകയാണ് സിമന്റ് കമ്പനികള്. മൂന്നുവര്ഷംമുമ്പ് പൊതുതെളിവെടുപ്പ് നടത്തിയപ്പോള് 100 ശതമാനം ആളുകളും ഖനനത്തെ എതിര്ത്തു. എന്നിട്ടും അനുമതി നല്കി. കഴിഞ്ഞ വര്ഷം ആറുവട്ടം കര്ഷകര് ഖനനം തടഞ്ഞു. ലാത്തിച്ചാര്ജും മര്ദനവുമുണ്ടായി. നൂറുകണക്കിന് കര്ഷകരാണ് പോലീസ് സ്റ്റേഷന് ഉപരോധിച്ചത്. ഹൈക്കോടതിയുടെ നിര്ദേശപ്രകാരം പോലീസിന്റെ പേരില് കേസെടുക്കേണ്ടിവന്നു. സമരം തുടരുകയാണ്. നഗരങ്ങളിലൊഴികെ സൗരാഷ്ട്രയിലെ ഗ്രാമങ്ങളില് ബി.ജെ.പി.ക്ക് തിരിച്ചടി കിട്ടാനിടയുണ്ട്. വേറിട്ടുകിടക്കുന്ന കച്ച് ഉള്പ്പെടെ സൗരാഷ്ട്രയിലെ എട്ട് ലോക്സഭാമണ്ഡലങ്ങളും 2014ലെ തിരഞ്ഞെടുപ്പില് മോദിതരംഗത്തില് ബി.ജെ.പി. തൂത്തുവാരിയെങ്കിലും 2015ലെ പഞ്ചായത്ത് തിരഞ്ഞെടുപ്പില് കോണ്ഗ്രസ് വന്വിജയം നേടി. 2017ലെ നിയമസഭാ തിരഞ്ഞെടുപ്പില് 30 നിയമസഭാമണ്ഡലങ്ങള് കോണ്ഗ്രസ് നേടിയപ്പോള് 23 എണ്ണമാണ് ബി.ജെ.പി.ക്ക് ഇവിടെ ലഭിച്ചത്.
കോണ്ഗ്രസിന് നിയമസഭാതിരഞ്ഞെടുപ്പിന്റെ കണക്കനുസരിച്ചും നാലിടത്ത് മേല്ക്കൈ ഉണ്ട്. വരള്ച്ചമൂലമുള്ള വിളനഷ്ടം കാരണം 2018 സെപ്റ്റംബര് മുതല് 2019 ജനുവരി 25 വരെയുള്ള കാലയളവില് 23 കര്ഷകര് ആത്മഹത്യചെയ്തു. റാബി വിളകള്ക്കുള്ള നര്മദാജലം ഇത്തവണ 30 ശതമാനം കുറച്ചു. തിരഞ്ഞെടുപ്പ് അടുക്കുമ്പോള് നഗരങ്ങളിലെ കുടിവെള്ളം മുട്ടാതിരിക്കാനുള്ള കരുതലിലാണ് സര്ക്കാരെന്നത് പരസ്യമായ രഹസ്യം. പട്ടണങ്ങള് ബി.ജെ.പി.യുടെ വോട്ടുകോട്ടകളുമാണ്. കോണ്ഗ്രസിനൊപ്പംനിന്ന ഒ.ബി.സി.ക്കാരായ കോലിസമുദായം ഇക്കുറി തങ്ങള്ക്കൊപ്പമാകുമെന്നാണ് ബി.ജെ.പി.യുടെ കണക്കുകൂട്ടല്. നാലിടങ്ങളില് ഇവര് നിര്ണായകമാണ്. സൗരാഷ്ട്രയിലാകെ പ്രബലമായ മറ്റൊരു വിഭാഗം പട്ടേലുമാരാണ്. നിയമസഭാതിരഞ്ഞെടുപ്പില് ബി.ജെ.പി.വിരുദ്ധ തരംഗമുയര്ത്തിയ ഹാര്ദിക് പട്ടേല് കോണ്ഗ്രസ് പിന്തുണയോടെ മത്സരിക്കുമോയെന്നതാണ് ശ്രദ്ധേയം. കോണ്ഗ്രസിലെ ഗ്രൂപ്പുവഴക്കുകളിലാണ് ബി.ജെ.പി.യുടെ കണ്ണ്.
https://www.facebook.com/Malayalivartha
