ബി.ജെ.പിക്ക് ഊര്‍ജ്ജമായി വയനാട്ടിലെ രാഹുല്‍ഗാന്ധിയുടെ സ്ഥാനാര്‍ത്ഥി ചര്‍ച്ച. സംസ്ഥാനത്തെ ഏറ്റവും പ്രമുഖമായ സി.പി.എം ഉള്‍പ്പെടെയുള്ള പാര്‍ട്ടികളെ പിന്നിലൊതുക്കി ബി.ജെ.പിക്ക് മുന്നോട്ടുകയറിവരാന്‍ ഈ ചര്‍ച്ച വഴിയൊരുക്കി. ജി. കാര്‍ത്തികേയന്റെ മരണത്തിന് ശേഷം അരുവിക്കര മണ്ഡലത്തില്‍ നടന്ന ഉപതെരഞ്ഞെടുപ്പില്‍ അനിവാര്യമായ വിജയത്തിനായി അന്നത്തെ മുഖ്യമന്ത്രിയായിരുന്ന ഉമ്മന്‍ചാണ്ടി പയറ്റിയ തന്ത്രം ഒരിക്കല്‍ കൂടി പുറത്തെടുത്തുവെന്നാണ് ഇടതുകേന്ദ്രങ്ങള്‍ ഇതുസംബന്ധിച്ച് നല്‍കുന്ന പ്രതികരണം.

അന്ന് വോട്ടെടുപ്പിന്റെ തലേദിവസം അരുവിക്കരയിലെ മത്സരം കോണ്‍ഗ്രസും ബി.ജെ.പിയും തമ്മിലാണെന്ന പ്രസ്താവന ഉമ്മന്‍ചാണ്ടി ഇറക്കിയിരുന്നു. അതോടെയാണ് അവിടുത്തെ തെരഞ്ഞെടുപ്പ് ചിത്രം തന്നെ മാറിയത്. ഇപ്പോള്‍ വയനാട്ടിലെ രാഹുല്‍ഗാന്ധിയുടെ സ്ഥാനാര്‍ത്ഥിത്വം സംബന്ധിച്ച പ്രസ്താവനയും അതേ തന്ത്രത്തിന്റെ ഭാഗമാണെന്ന് സി.പി.എമ്മും സംശയിക്കുന്നു.

വയനാട്ടില്‍ രാഹുല്‍ മത്സരിക്കുമെന്ന് ഉമ്മന്‍ചാണ്ടിയും രമേശ് ചെന്നിത്തലയും പ്രഖ്യാപിച്ചതിന് പിന്നാലെ കേരളത്തിലെ തെരഞ്ഞെടുപ്പ് ചര്‍ച്ചകളില്‍ ബി.ജെ.പിയാണ് നിറഞ്ഞുനില്‍ക്കുന്നത്. രാഹുല്‍ വടക്കേ ഇന്ത്യയില്‍ നിന്നും വയനാട്ടിലേക്ക് വരുന്നത് ബി.ജെ.പിയെ പേടിച്ചാണെന്ന വാദമാണ് ആദ്യമുയര്‍ന്നത്. അതിനുശേഷം വയനാട്ടില്‍ രാഹുലിനെ നേരിടുന്നതു സംബന്ധിച്ചായി ചര്‍ച്ച.

കേരളത്തില്‍ പ്രധാനമായും ഒട്ടുമിക്ക മണ്ഡലങ്ങളിലും ഇടതുമുന്നണിയും യു.ഡി.എഫും തമ്മിലാണ് മത്സരം. എന്നാല്‍ വയനാട്ടില്‍ രാഹൂല്‍ വരുന്നുവെന്ന് പ്രചരണം തുടങ്ങിയതോടെ ഇവിടെ ബി.ജെ.പിയുടെ സ്ഥാനാര്‍ത്ഥി ആരാണെന്നതിനെക്കുറിച്ചായി ചര്‍ച്ച. കഴിഞ്ഞ തെരഞ്ഞെടുപ്പില്‍ ആകെ 80,750 വോട്ടുകളാണ് ബി.ജെ.പി നേടിയത്. അവിടെ നിന്നും വിജയിച്ച എം.ഐ. ഷാനവാസിനെക്കാള്‍ 20,000 വോട്ടുകളുടെ കുറവുമാത്രമാണ് എതിര്‍സ്ഥാനാര്‍ത്ഥിയായിരുന്ന സി.പി.ഐയിലെ സത്യന്‍ മൊക്കേരിക്കുണ്ടായിരുന്നത്. എന്നാല്‍ രാഹുല്‍വരുമ്പോള്‍ ചര്‍ച്ച ആ 20,000 വോട്ടുകളുടെ കുറവിനെക്കുറിച്ചല്ല, മറിച്ച് 80,000 വോട്ടുമാത്രം ലഭിച്ച ബി.ജെ.പിയെക്കുറിച്ചാണ്.

മാത്രമല്ല, രാഹുല്‍വരുന്നുവെന്ന പ്രചരണം കോണ്‍ഗ്രസ് കേന്ദ്രങ്ങളില്‍ നിന്നും അഴിച്ചുവിട്ടപ്പോള്‍ മുതല്‍ മത്സരം തങ്ങളും കോണ്‍ഗ്രസും തമ്മിലാണെന്ന വാദവുമായി ബി.ജെ.പി രംഗത്ത് എത്തിയിട്ടുമുണ്ട്. ഈ വാദഗതി ഉയര്‍ത്താനുള്ള ദുഷ്ടലാക്കായിരുന്നു ഇത്തരമൊരു ചര്‍ച്ചയെന്നാണ് സി.പി.എം വിലയിരുത്തുന്നത്.

ഇത്തരത്തിലൊരു ചര്‍ച്ചയുണ്ടാക്കി വോട്ടര്‍മാരെ സാമുദായികമായി രണ്ടായി തിരിച്ച് നേട്ടം കൊയ്യാനാണ് കോണ്‍ഗ്രസ് ശ്രമിക്കുന്നത്. അങ്ങനെ വരുമ്പോള്‍ ന്യൂനക്ഷപങ്ങള്‍ കോണ്‍ഗ്രസിനൊപ്പവും ഭൂരിപക്ഷം ബി.ജെ.പിക്കൊപ്പവും എത്തുമെന്നും അതിലൂടെ ഇടതുപക്ഷത്തെ അപ്രസക്തമാക്കാമെന്നുമാണ് കോണ്‍ഗ്രസിന്റെ കണക്കുകൂട്ടലെന്നും അവര്‍ ചിന്തിക്കുന്നു.

എന്തായാലും രാഹുല്‍ കേരളത്തില്‍ മത്സരിക്കുന്നുവെന്നുള്ള പ്രചരണം ബി.ജെ.പിക്ക് പുത്തനുണര്‍വ് നല്‍കിയിട്ടുണ്ട്. രാഹുല്‍ വരികയാണെങ്കില്‍ അത് കൂടുതല്‍ ഗുണം ചെയ്യുമെന്ന വിലയിരുത്തലാണ് അവര്‍ക്ക്.