കാര്‍ഷികകടങ്ങള്‍ക്ക് മൊറട്ടോറിയം ഏര്‍പ്പെടുത്തിയ സര്‍ക്കാര്‍ നടപടി തട്ടിപ്പാണെന്ന് മനസിലായതോടെ സംസ്ഥാനത്തെ കര്‍ഷകര്‍ ഇടത് സര്‍ക്കാരിന് എതിരായി. കാര്‍ഷിക കടാശ്വാസം ത്രിശങ്കുവിലായതിന്റെ മനപ്രയാസത്തിലാണ് സര്‍ക്കാര്‍.

കര്‍ഷക സ്‌നേഹത്തിന്റെ പുണ്യാളന്‍മാര്‍ എന്ന് ഭാവിക്കുന്ന ഇടതു സര്‍ക്കാര്‍ മൊറട്ടോറിയത്തിന്റെ പേരില്‍ കര്‍ഷകരെ വഞ്ചിച്ചതായി പരാതി . മൊറട്ടോറിയത്തിന്റെ അപേക്ഷയില്‍ കൂടുതല്‍ വ്യക്തത വേണമെന്ന് പറഞ്ഞ് മുഖ്യ തെരഞ്ഞടുപ്പ് ഓഫീസര്‍ ടീക്കാറാം മീണ തിരികെ കൊടുത്തതോടെയാണ് സര്‍ക്കാരിന്റെ കള്ളകളി പൊളിഞ്ഞത്.

മോറട്ടോറിയവുമായി ബന്ധപ്പെട്ട് 2018 ഒക്‌ടോബറില്‍ സര്‍ക്കാര്‍ ഇറക്കിയ ഉത്തരവ് നിലനില്‍ക്കുന്നുണ്ടെന്ന് ചീഫ് സെക്രട്ടറി പറഞ്ഞിരുന്നു. തിരഞ്ഞെടുപ്പ് പ്രഖ്യാപിച്ച സാഹചര്യത്തില്‍ കര്‍ഷകരുടെ വായ്പയ്ക്ക് മോറട്ടോറിയം പ്രഖ്യാപിച്ച് ഉത്തരവിറക്കാനായില്ലെന്ന വാര്‍ത്ത തെറ്റിധാരണാജനകമാണെന്നും അദ്ദേഹം അറിയിച്ചിരുന്നു. 2018 ഒക്‌ടോബറില്‍ പ്രഖ്യാപിച്ച മോറട്ടോറിയം 2019 ഒക്‌ടോബര്‍ 11 വരെ നിലവിലുള്ളതാണെങ്കില്‍ എന്തിനാണ് തെരഞ്ഞെടുപ്പ് പ്രഖ്യാപനത്തിന്റെ തലേന്ന് മന്ത്രിസഭാ യോഗം വിളിച്ചു കൂട്ടി മൊറട്ടോറിയം പ്രഖ്യാപിച്ചത് എന്തിനു വേണ്ടിയെന്ന് ചീഫ് സെക്രട്ടറി വിശദീകരിച്ചില്ല. സത്യവിരുദ്ധമായ വാര്‍ത്ത മൂലം കര്‍ഷകര്‍ ആശങ്കപ്പെടേണ്ടതില്ലെന്ന സ്ഥിരം പല്ലവിയാണ് ചീഫ് സെക്രട്ടറി ആവര്‍ത്തിച്ചത്.
ബാങ്കുകള്‍ ഉള്‍പ്പെടെയുള്ള വിവിധ ധനകാര്യ സ്ഥാപനങ്ങളില്‍ നിന്നും സംസ്ഥാനത്തെ കര്‍ഷകര്‍ എടുത്തിട്ടുള്ള ക്ഷീരവികസനവും മൃഗസംരക്ഷണവും ഉള്‍പ്പെടെയുള്ള കാര്‍ഷിക വായ്പകള്‍, വിദ്യാഭ്യാസ വായ്പകള്‍ എന്നിവ ഉള്‍പ്പെടെയുള്ള എല്ലാവിധ വായ്പകളിലുമുള്ള ജപ്തി നടപടികള്‍ക്ക് മൊറട്ടോറിയം അനുവദിച്ച ഉത്തരവാണ് കഴിഞ്ഞ വര്‍ഷം ഒക്‌ടോബറില്‍ സര്‍ക്കാര്‍ പുറപ്പെടുവിച്ചതെന്ന് ചീഫ്‌സെക്രട്ടറി പറയുന്നു.

മോറട്ടോറിയം സംബന്ധിച്ച് ഒരു വെള്ള പേപ്പറിലാണ് ടീക്കാറാം മീണക്ക് അപേക്ഷ നല്‍കിയത്. അതാണ് സംസ്ഥാന സര്‍ക്കാരിന്റെ കെടുകാര്യസ്ഥത. വെള്ളപേപ്പറിലെ അപേക്ഷ പോരെന്നാണ് ടീക്കാറാം മീണ പറഞ്ഞത് . പുതിയ അപേക്ഷ സമര്‍പ്പിച്ചാല്‍ തന്നെ ഇലക്ഷന്‍ കഴിയണം എന്നതാണ് ഇപ്പോഴത്തെ അവസ്ഥ.

അതേസമയം കമ്മീഷന്റെ അനുമതിക്ക് വേണ്ടി ഫയല്‍ അയക്കാത്തതില്‍ ചീഫ് സെക്രട്ടറിക്കെതിരെ കഴിഞ്ഞ മന്ത്രിസഭായോഗത്തില്‍ വിമര്‍ശനം ഉന്നയിച്ചിരുന്നു. അതിനു ശേഷമാണ് ഫയല്‍ കമ്മീഷന് അയച്ചത്. മൊറട്ടോറിയം നീട്ടി ഉത്തരവ് ഇറക്കാന്‍ കമ്മീഷനോട് ആവശ്യപ്പെടണമെന്ന് റവന്യു മന്ത്രി നിര്‍ദ്ദേശിച്ചിരുന്നു. അതിലുള്ള വിരോധം കൊണ്ടാകാം മൊറട്ടോറിയം ഇല്ലാതാക്കിയത്.

കര്‍ഷകരുടെ വോട്ടാണ് എക്കാലവും ഇടതുപക്ഷത്തെ വിജയിപ്പിച്ചിട്ടുള്ളത്. എന്നാല്‍ വോട്ടിട്ട് ജയിപ്പിക്കുന്നവര്‍ക്ക് നേരേ മുഖം തിരിക്കുന്ന നിലപാടാണ് ഇടതുപക്ഷം എക്കാലവും സ്വീകരിച്ചിട്ടുള്ളത്. ഇടതില്‍ നിന്നു ഇല്ലാതാകുന്ന വോട്ടുകള്‍ എങ്ങോട്ട് മറിയുമെന്നാണ് കണ്ടറിയേണ്ടത്.

യഥാര്‍ത്ഥത്തില്‍ കൃഷിമന്ത്രിയാണ് കേസിലെ പ്രതി. മൊറട്ടോറിയം പ്രഖ്യാപിക്കണമെന്ന പ്രതിപക്ഷനേതാക്കളുടെ ആവശ്യത്തില്‍ പൊടുന്നനെ പ്രതികരിച്ചതാണ് അബദ്ധത്തിന് കാരണം.