ദീപാ നിശാന്തിന് ശക്തമായ മറുപടിയുമായി ആലത്തൂര്‍ മണ്ഡലം യു.ഡി.എഫ് സ്ഥാനാര്‍ത്ഥി രമ്യ ഹരിദാസ്. പാട്ട് പാടി വോട്ട് പിടിക്കുമെന്നും അതൊക്കെ ഓരോരുത്തരുടെയും രീതിയാണെന്നും രമ്യ വ്യക്തമാക്കി. പ്രചരണത്തിനിടെ രമ്യ പാട്ടുപാടിയപ്പോള്‍ ഇതെന്താ ഐഡിയാ സ്റ്റാര്‍ സിംഗറാണോ എന്നാണ് ദീപാ നിശാന്ത് പരിഹസിച്ചിരുന്നു. ദീപാ നിശാന്തിന്റെ വിമര്‍ശനം സോഷ്യല്‍ മീഡിയയില്‍ വലിയ ചര്‍ച്ചയായതിനാല്‍ പ്രചാരണ വേദികളില്‍ ഇനി പാട്ടുപാടുമോ എന്ന് മാധ്യമപ്രവര്‍ത്തകര്‍ ചോദിച്ചപ്പോഴാണ് പാട്ട് പാടി വോട്ടുപിടിക്കുമെന്ന് വ്യക്തമാക്കിയത്. ദീപടീച്ചറും കുടുംബവും ആലത്തൂരിലെ വോട്ടര്‍മാരാണെന്നും കുടുംബത്തിന്റെ വോട്ട് എനിക്കാണെന്നും ടീച്ചറുടെ വോട്ടും വേണമെന്നും രമ്യ പറഞ്ഞു. 

പാട്ടിനെ ആയുധമായാണ് കാണുന്നത്. പ്രചാരണ രീതിയില്‍ മാറ്റും വരുത്തില്ല. ദീപാ നിശാന്തിന്റെ വിമര്‍ശനം തള്ളിക്കളയുകയാണെന്നും രമ്യ ഹരിദാസ് പറഞ്ഞു. കോണ്‍ഗ്രസ് നേതാക്കളും പൊതുസമൂഹവും ദീപയ്‌ക്കെതിരെ രൂക്ഷമായ വിമര്‍ശനമാണ് നടത്തിയത്. അനില്‍അക്കര എംഎല്‍എ തെരഞ്ഞെടുപ്പ് ഓഫീസര്‍ക്ക് പരാതി നല്‍കിയിട്ടുണ്ട്. രമ്യയെയെ ജാതീയമായ രീതില്‍ അവഹേളിച്ചെന്നും പരാതിയില്‍ പറയുന്നു. ദീപ നിശാന്തിന്റെ ഫേസ്ബുക്ക് പോസ്റ്റും വിമര്‍ശനങ്ങളും യു.ഡി.എഫ് പ്രചരണായുധമാക്കുകയാണ്. വിമര്‍ശനങ്ങളൊന്നും തിരിച്ചടിയാകില്ലെന്നാണ് കോണ്‍ഗ്രസിന്റെ നിഗമനം. 

ദീപാ നിശാന്ത് പറഞ്ഞത് ഇതാണ്- യൂത്ത് കോണ്‍ഗ്രസിന്റെ പേജിലെ ചിത്രത്തില്‍ ഫണ്ട് ശേഖരണത്തിനുള്ള പരസ്യവാചകം ശ്രദ്ധിക്കുക.' രമ്യ തെരഞ്ഞെടുക്കപ്പെട്ടാല്‍ ലോകസഭയിലെത്തുന്ന ആദ്യത്തെ ദളിത് വനിതാ എം പി ആവും' എന്നാണ് അവകാശവാദം. ദീര്‍ഘകാലം കേരളനിയമ സഭാംഗവും എട്ടാം കേരള നിയമസഭയിലെ ഡെപ്യൂട്ടി സ്പീക്കറുമായിരുന്നു ഭാര്‍ഗവി തങ്കപ്പന്‍ 1971ലെ പൊതു തിരഞ്ഞെടുപ്പില്‍ അടൂര്‍ മണ്ഡലത്തില്‍ നിന്ന് വിജയിച്ച് കമ്മ്യൂണിസ്റ്റ് പാര്‍ട്ടി ഓഫ് ഇന്ത്യയുടെ എം പി യായി ലോകസഭയില്‍ എത്തിയ ചരിത്രം മറന്നിട്ടുണ്ടാകണം.

രണ്ടാമത്തെ ചിത്രം ഷെയര്‍ ചെയ്തിരിക്കുന്നത് എം എല്‍ എ ശ്രീ.അനില്‍ അക്കരയാണ്. തങ്ങളുടെ സ്ഥാനാര്‍ത്ഥി കടന്നു പോന്ന ജീവിതത്തിന്റെ വേനല്‍വിതാനങ്ങളും കനല്‍വഴികളും പറഞ്ഞ് വോട്ടഭ്യര്‍ത്ഥിക്കുന്നതില്‍ തെറ്റൊന്നുമില്ല. മാളികപ്പുറത്തമ്മയാകലാണ് ജീവിതലക്ഷ്യമെന്ന പ്രഖ്യാപനവും നന്നായിട്ടുണ്ട്. ഒന്നോര്‍ക്കണം പൗരസംരക്ഷണത്തിനും നിയമനിര്‍മ്മാണത്തിനും സദാ ജാഗരൂകരാകേണ്ട വ്യക്തികളെ തിരഞ്ഞെടുക്കുന്ന ജനാധിപത്യപ്രക്രിയയാണിത്. സ്ഥാനാര്‍ത്ഥി എത്ര മനോഹരമായി പാടുന്നു ,ഡാന്‍സ് കളിക്കുന്നു, ഏത് മതവിശ്വാസിയാണ് എന്നതൊന്നുമല്ല അവിടെ വിഷയമാകേണ്ടത്. 

ഐഡിയ സ്റ്റാര്‍ സിങ്ങര്‍ തിരഞ്ഞെടുപ്പോ അമ്പലക്കമ്മിറ്റി തിരഞ്ഞെടുപ്പോ അല്ല നടക്കുന്നത് എന്ന സാമാന്യബോധം വോട്ടഭ്യര്‍ത്ഥന നടത്തുന്നവര്‍ പുലര്‍ത്തണമെന്ന അപേക്ഷയുണ്ട്. ഒരു ജനാധിപത്യമതേതര രാഷ്ട്രത്തില്‍ ഇത്തരം കാര്യങ്ങള്‍ പറഞ്ഞല്ല വോട്ട് ചോദിക്കേണ്ടത്. 'ഒന്നു രണ്ടു ചിരട്ട കുടിപ്പോളം അച്ഛനുണ്ടോ വരുന്നെന്ന് നോക്കണം! രണ്ടു നാലു ചിരട്ട കുടിച്ചെന്നാല്‍ ,അച്ഛനാരെടാ ഞാനെടാ, മോനെടാ ' എന്ന ചാരായ യുക്തിയാണ് മറുപടിയെങ്കില്‍ സുലാന്‍. എന്നായിരുന്നു ദീപയുടെ ഫേസ്ബുക്‌പോസ്റ്റ്. ഉടന്‍ തന്നെ ദീപ നിഷാന്തിന് മറുപടിയുമായി അനില്‍ അക്കരയും രംഗത്തെത്തി.