നടിയെ ആക്രമിച്ച കേസിന്റെ വിചാരണ നീട്ടിക്കൊണ്ട് പോകാന്‍ ദിലീപ് വീണ്ടും ശ്രമം തുടങ്ങി. കേസ് സി.ബി.ഐ അന്വേഷിക്കണമെന്ന് ആവശ്യപ്പെട്ട് ദിലീപ് ഹൈക്കോടതിയെ സമീപിച്ചു. ഇതേ ആവശ്യമുന്നയിച്ച് മുമ്പ് ഹൈക്കോടതിയെ സമീപിച്ചെങ്കിലും സിംഗിള്‍ ബെഞ്ച് അനുവദിച്ചില്ല. ഇതേ തുടര്‍ന്നാണ് ഡിവിഷന്‍ ബെഞ്ചിനെ സമീപിച്ചത്. ഹര്‍ജി പരിഗണിക്കും വരെ വിചാരണ നിര്‍ത്തിവയ്ക്കണമെന്നും ദിലീപ് ആവശ്യപ്പെട്ടു. കേസിന്റെ വിചാരണ ദിലീപ് തടസ്സപ്പെടുത്താന്‍ ശ്രമിക്കുന്നതായി സര്‍ക്കാര്‍ മുമ്പ് കോടതിയെ അറിയിച്ചിരുന്നു. വിചാരണക്ക് പ്രത്യേക കോടതി ആവാമെന്നും വനിതാ ജഡ്ജിയെ നിയമിക്കുന്നതാണ് ഉചിതമെന്നും സര്‍ക്കാര്‍ വ്യക്തമാക്കിയിരുന്നു. തുടര്‍ന്നാണ് പ്രത്യേക സി.ബി.ഐ കോടതിയില്‍ വിചാരണ നടത്താന്‍ ഹൈക്കോടതി ഉത്തരവിട്ടത്.

ആറ് മാസത്തിനുള്ളില്‍ വിചാരണ പൂര്‍ത്തിയാക്കണമെന്ന് ഹൈക്കോടതി നിര്‍ദ്ദേശിച്ചിട്ടുണ്ട്. തുടര്‍ന്നാണ് ദിലീപ് ഇന്ന് സിംഗിള്‍ ബെഞ്ചിനെ സമീപിച്ചത്. നടിയുടെ മൊഴിയുടെ അടിസ്ഥാനത്തില്‍ മാത്രമാണ് തനിക്കെതിരെ കേസ് എടുത്തതെന്ന നിലപാടിലാണ് ദിലീപ്. കേസിന്റെ വിചാരണ എറണാകുളം ജില്ലക്ക് പുറത്തേക്ക് മാറ്റരുതെന്ന് മുഖ്യപ്രതി സുനില്‍ കുമാര്‍ മുമ്പ് ആവശ്യപ്പെട്ടിരുന്നു. കേസ് പരിഗണിക്കാന്‍ പ്രത്യേക കോടതിയും വനിതാ ജഡ്ജിയും വേണമെന്നാവശ്യപ്പെട്ട് നടി നല്‍കിയ ഹരജി പരിഗണിക്കുന്നതിന് മുമ്പാണ് ഇക്കാര്യം ഉന്നയിച്ചിരുന്നത്. ഇതെല്ലാം വിചാരണ നീട്ടിക്കൊണ്ട് പോകാനുള്ള നീക്കമാണെന്ന് അന്നേ ആക്ഷേപമുണ്ടായിരുന്നു.

കേസിലെ പ്രധാന തെളിവായ വീഡിയോ വേണമെന്ന് ആവശ്യപ്പെട്ട് സെഷന്‍സ് കോടതി മുതല്‍ സുപ്രീംകോടതി വരെ ദീലീപ് കയറിയിറങ്ങി. വീഡിയോ തൊണ്ടുമുതലല്ലെന്നും നടിയുടെ സ്വകാര്യതയെ ബാധിക്കുന്നതിനാല്‍ തരാനാകില്ലെന്നും സുപ്രീംകോടതി വ്യക്തമാക്കി. ഇതെല്ലാം കേസ് വിചാരണ നീട്ടുക്കൊണ്ട് പോകാനുള്ള നീക്കത്തിന്റെ ഭാഗമായിരുന്നെന്ന് ആക്ഷേപം ഉയര്‍ന്നിരുന്നു. 2017 ഫെബ്രുവരിയിലാണ് കൊച്ചിയില്‍ നടിയെ ഓടിക്കൊണ്ടിരുന്ന കാറില്‍ നിന്ന് തട്ടിക്കൊണ്ട് പോയി പീഡിപ്പിച്ചത്. കേസില്‍ മുഖ്യപ്രതി സുനില്‍കുമാറിനെ പെട്ടെന്ന് അറസ്റ്റ് ചെയ്തിരുന്നു. ആദ്യം ദിലീപിന്റെ പങ്കിനെ കുറിച്ച് വ്യക്തത ഇല്ലായിരുന്നു.

2017 ജൂലായില്‍ ദിലീപിനെ പൊലീസ് അറസ്റ്റ് ചെയ്തു. ക്രിമിനല്‍ ഗൂഢാലോചനയ്ക്കായിരുന്നു അറസ്റ്റ് ചെയ്തത്. 86 ദിവസത്തെ ജയില്‍ വാസത്തിന് ശേഷമാണ് ദിലീപ് ജാമ്യത്തിലിറങ്ങിയത്. അതിന് ശേഷം പല താരങ്ങളെയും സ്വാധീനിച്ച് മൊഴി മാറ്റാന്‍ നോക്കിയിരുന്നു. കുഞ്ചാക്കോബോബന്‍, സംയുക്താവര്‍മ തുടങ്ങിയ നാല്‍പ്പതോളം താരങ്ങളാണ് ദിലീപിനെതിരെ മൊഴി നല്‍കിയിരിക്കുന്നത്. ദിലീപും കാവ്യാമാധവനും തമ്മിലുള്ള ബന്ധം ആദ്യ ഭാര്യ മഞ്ജുവാര്യരോട് ആക്രമണത്തിനിരയായ നടി പറഞ്ഞതിനെ തുടര്‍ന്നാണ് ഇത്രയും ക്രൂരമായ കൃത്യം നിര്‍വഹിക്കാന്‍ ദിലീപ് ക്രിമിനല്‍ ഗൂഢാലോചന നടത്തിയതെന്നാണ് ആക്ഷേപം.