തനിക്കെതിരെ നായര്‍ വാട്‌സാപ്പ് ഗ്രൂപ്പുകളില്‍ ബി.ജെ.പി മോശം പ്രചരണം നടത്തുകയാണെന്ന് യു.ഡി.എഫ് സ്ഥാനാര്‍ത്ഥി ശശി തരൂര്‍ ആരോപിച്ചു. ആദ്യം തരൂര്‍ മത്സരിക്കാനെത്തിയപ്പോള്‍ കേരളാ നായരല്ലെന്നായിരുന്നു ആരോപണം. ശിവകുമാറിന് സീറ്റ് നല്‍കാത്തതിനെതിരെയായിരുന്നു അന്ന് പ്രതിഷേധം. അതിനെയൊക്കെ മറികടന്ന് തരൂര്‍ വിജയിച്ചു. ഇപ്പോള്‍ കുമ്മനം രാജശേഖരന്‍ സ്ഥാനാര്‍ത്ഥിയായതോടെ വീണ്ടും തരൂരിനെതിരെ ചില നായര്‍ ഗ്രൂപ്പുകള്‍ തിരിഞ്ഞിരിക്കുകയാണ്. ബിജെപിക്കാരനല്ലാത്ത വ്യക്തി അയക്കും പോലെയാണ് പ്രചരണം നടത്തുന്നത്. തരൂര്‍ നായര്‍ സമുദായത്തെ അപമാനിച്ചെന്നാണ് പ്രചരണം. 

ഞാന്‍ ഒരു നായര്‍ സമുദായ അംഗമാണ്. എന്നാലിത്തരം വൃത്തികെട്ട കളി ഞാനോ പാര്‍ട്ടിയോ നടത്താറില്ലെന്ന് തരൂര്‍ പറഞ്ഞു. പ്രചാരണസമയത്ത് വ്യക്തിപരമായ അധിക്ഷേപം നടത്തരുതെന്ന് തെരഞ്ഞെടുപ്പ് കമ്മീഷന്‍ നിര്‍ദ്ദേശം നല്‍കിയിട്ടുണ്ട്. അതിനാല്‍ താന്‍ ഒന്നും പറയുന്നില്ലെന്നും ഒരു സ്വകാര്യ ചാനല്‍ പരിപാടിയില്‍ തരൂര്‍ പറഞ്ഞു. അതേസമയം തെരഞ്ഞെടുപ്പ് കമ്മീഷന് പരാതിയും നല്‍കിയിട്ടുണ്ട്. അതില്‍ ഇലക്ഷന്‍ കമ്മീഷന് എന്ത് ചെയ്യാനാകും എന്നതില്‍ തനിക്കും സംശയമുണ്ടെന്നും തരൂര്‍ പറഞ്ഞു. വ്യക്തിപരമായി അയയ്ക്കുന്ന ദുഷ്പ്രചരണങ്ങളില്‍ ആരെ കുറ്റം പറയും എന്നതും വലിയ പ്രശ്‌നമാണെന്നും അദ്ദേഹം പറഞ്ഞു

ശശി തരൂരിന്റെ മൂന്ന് ഭാര്യമാര്‍ എങ്ങനെ കൊല്ലപ്പെട്ടെന്ന് ശ്രീധരന്‍പിള്ള വാര്‍ത്താസമ്മേളനത്തില്‍ ആരോപിച്ചിരുന്നു. പിള്ളയുടെ പ്രസ്താവന തനിക്ക് മാനഹാനി ഉണ്ടാക്കിയെന്ന് തരൂര്‍ മാനനഷ്ടത്തിന് പരാതി നല്‍കിയിരിക്കുകയാണ്. 'തിരുവനന്തപുരത്തെ കോണ്‍ഗ്രസ് സ്ഥാനാര്‍ത്ഥിയുടെ മൂന്ന് ഭാര്യമാര്‍ മരിച്ചതെങ്ങനെയെന്നാണ് എല്ലാവരും ചോദിക്കുന്നത്. ബിജെപിയോ താനോ അത് ചോദിക്കാന്‍ ഉദ്ദേശിക്കുന്നില്ല'. എന്നാണ് ശ്രീധരന്‍ പിള്ള വാര്‍ത്താസമ്മേളനത്തില്‍ പറഞ്ഞത്. 

തരൂരിന്റെ രണ്ടാം ഭാര്യ അടൂര്‍ സ്വദേശിയാണെന്നും അഭിഭാഷകനായിരുന്ന മധുസൂദനന്‍ നായരുടെ അനന്തരവളായിരുന്നെന്നും ശ്രീധരന്‍ പിള്ള പറഞ്ഞിരുന്നു. മധുസൂദനന്‍ നായര്‍ അന്ന് നിയമോപദേശത്തിനായി തന്നെ സമീപിച്ചിരുന്നെന്നും ശ്രീധരന്‍ പിള്ള പറഞ്ഞിരുന്നു. ഈ വിഷയങ്ങള്‍ രാഷ്ട്രീയമായി ഉപയോഗിക്കാന്‍ താല്‍പര്യമില്ലാത്തതിനാലാണ് പുറത്ത് പറയാത്തതെന്നും ശ്രീധരന്‍ പിള്ള പറഞ്ഞിരുന്നു. മൂന്ന് ഭാര്യമാരും മരിച്ചോ എന്ന് മാധ്യമപ്രവര്‍ത്തകര്‍ സംശയം ചോദിച്ചപ്പോള്‍ രണ്ട് പേര്‍ മരിച്ചെന്നും ഒരാള്‍ ബന്ധം വേര്‍പെടുത്തിയെന്നും പിള്ള തിരുത്തിയിരുന്നു. കേന്ദ്രമന്ത്രി രവിശങ്കര്‍ പ്രസാദിനെതിരെ നല്‍കിയ മാനനഷ്ട കേസില്‍ തരൂര്‍ കോടതിയില്‍ ഹാജരായിരുന്നു. സുനന്ദപുഷ്‌ക്കര്‍ കേസില്‍ തരൂരിനെ രവിശങ്കര്‍ പ്രസാദ് കൊലപാതകി എന്ന് വിളിച്ചിരുന്നു. സുന്ദാപുഷ്‌ക്കറിന്റെ മരണത്തില്‍ തരൂരിനെതിരെ ആത്മഹത്യാ പ്രേരണയ്ക്കാണ് കേസ് എടുത്തിരിക്കുന്നത്.