സംസ്ഥാനത്തെ മുതിര്ന്ന ഐ.എ.എസ് ഉദ്യോഗസ്ഥന് സ്ത്രീത്വത്തെ അപമാനിച്ചെന്ന് ഗുരുതര ആരോപണം, ഇത് സംബന്ധിച്ച് തിരുവനന്തപുരം പൊഴിയൂര് സ്വദേശിനിയായ 26കാരി വനിതാ കമ്മീഷന് പരാതി നല്കി
സംസ്ഥാനത്തെ മുതിര്ന്ന ഐ.എ.എസ് ഉദ്യോഗസ്ഥന് സ്ത്രീത്വത്തെ അപമാനിച്ചെന്ന് ഗുരുതര ആരോപണം. ഇത് സംബന്ധിച്ച് തിരുവനന്തപുരം പൊഴിയൂര് സ്വദേശിനിയായ 26കാരി വനിതാ കമ്മീഷന് പരാതി നല്കി. പിതാവ് ലൈംഗികാതിക്രമം നടത്തിയ സംഭവത്തില് എക്സാമിനേഷന് ആന്ഡ് സര്ട്ടിഫിക്കറ്റ് ഓഫ് എ ഫീമെയില് വിക്ടിം ഓഫ് സെക്ഷ്വല് അസാള്ട്ട് എന്ന സര്ട്ടിഫിക്കറ്റ് നല്കാതെ വൂണ്ട് സര്ട്ടിഫിക്കറ്റ് നല്കിയ ഡോക്ടര്ക്കെതിരെ പരാതി നല്കാന് സെക്രട്ടറിയേറ്റിലെ ഓഫീസിലെത്തിയപ്പോഴാണ് മുതിര്ന്ന ഐ.എ.എസ് ഉദ്യോഗസ്ഥന് ലൈംഗികചുവയോടെയും അപമാനിക്കുന്ന രീതിയിലും സംസാരിച്ചതെന്ന് പെണ്കുട്ടി 25-3-19ല് നല്കിയ പരാതിയില് പറയുന്നു.
പരാതിയില് പറയുന്ന കാര്യങ്ങളെ കുറിച്ച് കൂടുതല് ചോദിച്ചറിയാനുണ്ട്. രാത്രി ഞാന് വിളിച്ചാല് ഫോണ് എടുക്കുമോ? എന്ന് അപമാനിച്ച് സംസാരിക്കുകയും കൈവിരലില് ചുരണ്ടുകയും ചെയ്തെന്ന് പരാതിക്കാരി ആരോപിക്കുന്നു. പരാതി നല്കാനെത്തിയ ഇരയായ തന്നോട് മോശമായി സംസാരിക്കുകയും പെരുമാറുകയും ചെയ്തത് സങ്കടവും അപമാനവുമാണെന്നും ഒരു സ്ത്രീയോടും സര്ക്കാര് ഉദ്യോഗസ്ഥര് ഇത്തരത്തില് പെരുമാറാനോ സംസാരിക്കാനോ പാടില്ല. അതിനാല് തനിക്ക് നേരിട്ട മോശം അനുഭവത്തിനെതിരെ നടപടിയെടുക്കണമെന്നും വനിതാ കമ്മീഷനോട് പെണ്കുട്ടി ആവശ്യപ്പെട്ടു. സംസ്ഥാനത്തെ ചീഫ് സെക്രട്ടറി സ്ഥാനത്ത് വരെ എത്താവുന്ന ഐ.എ.എസ് ഉദ്യോഗസ്ഥനെതിരെയാണ് പരാതി നല്കിയിരിക്കുന്നത്. ലോക്സഭാ തെരഞ്ഞെടുപ്പ് അടുത്തിരിക്കുന്ന സാഹചര്യത്തില് സര്ക്കാരിനെ വെട്ടിലാക്കുന്നതാണ് ഈ ഗുരുതരമായ ആരോപണം.
2018 മാര്ച്ചില് പെണ്കുട്ടിയുടെ പിതാവ് ലൈംഗിക അതിക്രമം നടത്തിയതിന് പൊഴിയൂര് പൊലീസില് പരാതി നല്കിയിരുന്നു. ക്രൈം നമ്പര് 265\ 2018 പ്രകാരം കേസും രജിസ്റ്റര് ചെയ്തിരുന്നു. പിതാവിന്റെ അതിക്രമത്തെ തുടര്ന്ന് കടുത്ത ശാരീരിക വേദനയും അസ്വസ്ഥതകളും ഉണ്ടായെന്നും സംഭവം നടന്ന ദിവസം രാത്രി 11.45ന് പാറശ്ശാല സര്ക്കാര് ആശുപത്രിയില് താന് ചികിത്സതേടിയെന്നും പരാതിക്കാരി പറയുന്നു. എന്നാല് താന് ലൈംഗിക അതിക്രമത്തിന് ഇരയായെന്ന സര്ട്ടിഫിക്കറ്റ് നല്കാതെ ഡോക്ടര് നിയമവിരുദ്ധമായി വൂണ്ട് സര്ട്ടിഫിക്കറ്റ് നല്കിയെന്നും യുവതി ആരോപിക്കുന്നു. ഇത് സംബന്ധിച്ച് തിരുവനന്തപുരം ജില്ലാ മെഡിക്കല് ഓഫീസര്ക്കും പാറശാല താലൂക്ക് ആശുപത്രി മെഡിക്കല് സൂപ്രണ്ടിനും പരാതി നല്കിയിരുന്നു.
പാറാല താലൂക്ക് ആശുപത്രി സൂപ്രണ്ടിനും ജില്ലാ മെഡിക്കല് ഓഫീസര്ക്കും പെണ്കുട്ടി ഈ മാസമാണ് പരാതി നല്കിയിരിക്കുന്നത്. ഇത്രയും നാള് പരാതി നല്കാന് വൈകിയതിന്റെ കാരണം വ്യക്തമല്ല. ഇവര്ക്കെല്ലാം പരാതി നല്കിയിട്ടും നടപടിയെടുക്കാത്തതിനെ തുടര്ന്നാണ് ഐ.എ.എസ് ഉദ്യോഗസ്ഥനെ സമീപിച്ചത്. എന്നാല് അദ്ദേഹത്തില് നിന്നും വളരെ മോശമായ അനുഭവം ഉണ്ടായതിനെ തുടര്ന്നാണ് സംസ്ഥാന വനിതാ കമ്മീഷന് പരാതി നല്കിയത്. കമ്മീഷന് പരാതി നമ്പര് പി 2/ 1408 ആയി സ്വീകരിച്ചിട്ടുണ്ട്. ഇത് സംബന്ധിച്ച നടപടികള് താമസിക്കാതെ ഉണ്ടാകുമെന്നറിയുന്നു. തെരഞ്ഞെടുപ്പിന്റെ പടിവാതില്ക്കല് എത്തിനില്ക്കെ പാലക്കാട് ചെര്പുളശ്ശേരി പാര്ട്ടി ഓഫീസിലെ പീഡനം സി.പി.എമ്മിനെ പ്രതിരോധത്തിലാക്കിയതിന് പിന്നാലെയാണ് മുതിര്ന്ന ഐ.എ.എസ് ഉദ്യോഗസ്ഥനെതിരെ സ്ത്രീത്വത്തെ അപമാനിച്ചെന്ന പരാതിയും ഉയരുന്നത്.
https://www.facebook.com/Malayalivartha
