യുവതി ക്രൂരമായ ലൈംഗിക അതിക്രമത്തിന് ഇരയായെന്ന് പൊലീസ് എഫ്.ഐ.ആര്‍ ഇട്ടിട്ടും ഡോക്ടര്‍ വൂണ്ട് സര്‍ട്ടിഫിക്കറ്റ് മാത്രമാണ് നല്‍കിയതെന്ന് പരാതി. പാറശ്ശാല താലൂക്ക് ആശുപത്രിയിലെ ഡോക്ടര്‍ക്കെതിരെ പൊഴിയൂര്‍ സ്വദേശിയായ 26കാരി ആശുപത്രി സൂപ്രണ്ടിനും ജില്ലാ മെഡിക്കല്‍ ഓഫീസര്‍ക്കും പരാതി നല്‍കിയിട്ടുണ്ട്. പിതാവ് പെണ്‍കുട്ടിയെ പീഡിപ്പിക്കണമെന്ന ഉദ്ദേശത്തോടെ ലൈംഗിക അതിക്രമം നടത്തിയെന്നാണ് എഫ്.ഐ.ആറില്‍ പറയുന്നു. പരാതിക്കാരി താമസിക്കുന്ന വീടിന്റെ മുകള്‍ നിലയിലെ ഹാളില്‍ വെച്ച് പിതാവ് അതിക്രമം നടത്തുകയായിരുന്നു. സ്വകാര്യഭാഗങ്ങളില്‍ കയറിപ്പിടിക്കുകയും വസ്ത്രങ്ങള്‍ വലിച്ചുകീറാന്‍ ശ്രമിക്കുകയും ചെയ്തു. എതിര്‍ത്തപ്പോള്‍ അടിവയറ്റില്‍ ചവുട്ടിയെന്നും എഫ്.ഐ.ആറില്‍ വ്യക്തമാക്കുന്നു. 

പിതാവിന്റെ ലൈംഗികാതിക്രമം കാരണം സ്വകാര്യഭാഗങ്ങളില്‍ മുറിവേറ്റിരുന്നെന്നും ഇക്കാര്യം ബോധ്യപ്പെട്ടിട്ടും ഡോക്ടര്‍ വൂണ്ട് സര്‍ട്ടിഫിക്കറ്റ് മാത്രമാണ് നല്‍കിയതെന്നും ഇത് നിയമവിരുദ്ധമാണെന്നും പരാതിക്കാരി ആരോപിക്കുന്നു. ഇക്കാര്യം ഈമാസം അഞ്ചിനാണ് ബോധ്യപ്പെട്ടതെന്നും യുവതി ജില്ലാ മെഡിക്കല്‍ ഓഫീസര്‍ക്ക് നല്‍കിയ പരാതിയില്‍ പറയുന്നു. 2018 മാര്‍ച്ചിലാണ് കേസിനാസ്പദമായ സംഭവം നടന്നത്. അന്നേ ദിവസം രാത്രി പതിനൊന്നേ മുക്കാലോടെ താന്‍ പാറശ്ശാല താലൂക്ക് ആശുപത്രിയില്‍ ചികിത്സതേടിയത്. ഡോക്ടറുടെ അനീതി കാരണം പ്രതിയായ പിതാവിന് നിയമത്തിന് മുന്നില്‍ നിന്ന് രക്ഷപെടാനുള്ള പഴുത് ഒരുക്കുകയായിരുന്നെന്നും ആരോപിക്കുന്നു. സംസ്ഥാനത്ത് ഒരു ഡോക്ടര്‍ക്കെതിരെ ഇത്തരത്തിലുള്ള ആരോപണം മുമ്പ് ഉയര്‍ന്നതായി അറിവില്ല. 

ലൈംഗികാതിക്രമത്തിന് ഇരയായി എന്ന് വ്യക്തമാക്കുന്ന സര്‍ട്ടിഫിക്കറ്റ് ലഭ്യമാക്കാന്‍ തന്റെ രഹസ്യഭാഗങ്ങളിലെ മുറിവുകളില്‍ വീണ്ടും പരിശോധന നടത്തണമെന്നും വീഴ്ചവരുത്തിയ ഡോക്ടര്‍ക്കെതിരെ നടപടി സ്വീകരിക്കണമെന്നും പെണ്‍കുട്ടി തിരുവനന്തപുരം ജില്ലാ മെഡിക്കല്‍ ഓഫീസര്‍ക്ക് നല്‍കിയ പരാതിയില്‍ ആവശ്യപ്പെടുന്നു. പിതാവ് ലൈംഗികാതിക്രമം നടത്തിയ കാര്യം മാതാവിനോട് പറഞ്ഞപ്പോള്‍ ക്രൂരമായ മര്‍ദ്ദനമാണ് ഏല്‍ക്കേണ്ടിവന്നത്. ഇക്കാര്യങ്ങളെല്ലാം പൊലീസിനോടും ഡോക്ടറോടും പറഞ്ഞിരുന്നു. വിവാഹിതയായ യുവതിയും രണ്ടര വയസുള്ള മകനും അനുജത്തിയും മാതാപിതാക്കളും ഒരു വീട്ടിലാണ് താമസം. ഭര്‍ത്താവും യുവതിയുടെ പിതാവും തമ്മില്‍ അത്രരസത്തിലല്ല. ഭര്‍ത്താവ് അദ്ദേഹത്തിന്റെ സഹോദരന്റെ വീട്ടിലാണ് താമസം. 

രാത്രി ഉറങ്ങാന്‍ കിടന്ന തന്നെ വെള്ളം വേണമെന്ന് പറഞ്ഞാണ് പിതാവ് വിളിച്ചുണര്‍ത്തിയതെന്നും എടുത്ത് കൊടുക്കുന്നതിനിടെ പിന്നില്‍ നിന്ന് ലൈംഗികാതിക്രമം നടത്തുകയായിരുന്നെന്ന് പരാതിയില്‍ പറയുന്നു. അനുജത്തിക്ക് ആറ് വയസ് പ്രായമുള്ളതിനാല്‍ എന്താണ് സംഭവിച്ചതെന്ന് അറിയില്ലായിരുന്നു. പൊലീസ് പരാതി എടുത്ത് അന്വേഷണം നടത്തിയിരുന്നു. എന്നാല്‍ കാര്യങ്ങള്‍ ബോധ്യപ്പെട്ടിട്ടും ഡോക്ടര്‍ എന്തിനാണ് തന്റെ ശരീരത്തില്‍ മുറിവ് മാത്രമാണ് ഉള്ളതെന്ന രീതിയില്‍ സര്‍ട്ടിഫിക്കറ്റ് നല്‍കിയതെന്ന് മനസിലാകുന്നില്ലെന്ന് പരാതിക്കാരി പറയുന്നു. ഇവരുടെ ആരോപണം ശരിയാണെങ്കില്‍ ഡോക്ടറുടെ ഭാഗത്ത് നിന്ന് ഗുരുതരമായ വീഴ്ചയാണ് സംഭവിച്ചത്. ജില്ലാ മെഡിക്കല്‍ ഓഫീസര്‍ക്കും ആശുപത്രി സൂപ്രണ്ടിനും പരാതി നല്‍കിയതിനാല്‍ നടപടിയുണ്ടാകുമെന്ന വിശ്വാസത്തിലാണ് പരാതിക്കാരി.