കഠിനമായ ചൂടുവര്‍ദ്ധിച്ച സാഹചര്യത്തില്‍ സംസ്ഥാനത്ത് ശനിയാഴ്ചവരെ അതിജാഗ്രത തുടരാന്‍ സംസ്ഥാന ദുരന്തനിവാരണ അതോറിറ്റി തീരുമാനിച്ചു. ഉയര്‍ന്ന അള്‍ട്രാവയലറ്റ് സൂചിക രേഖപ്പെടുത്തുന്നതിന്റെയും താപസൂചിക ഉയരുന്നതിന്റെയും അടിസ്ഥാനത്തിലാണിത്. വെള്ളിയാഴ്ച വയനാട്, ഇടുക്കി ഒഴികെയുള്ള ജില്ലകളില്‍ ഉയര്‍ന്ന താപനില ശരാശരിയില്‍നിന്ന് രണ്ടുമുതല്‍ മൂന്നുഡിഗ്രി വരെ ഉയര്‍ന്നേക്കും. സംസ്ഥാനത്ത് പലയിടത്തും താപസൂചിക 50ന് മുകളിലാണ്. അതിനാലാണ് കൂടുതല്‍പേര്‍ക്ക് സൂര്യതാപമേല്‍ക്കുന്നതെന്നും അധികൃതര്‍ പറഞ്ഞു.

വ്യാഴാഴ്ച സംസ്ഥാനത്ത് 71 പേര്‍ക്കാണ് സൂര്യതാപമേറ്റത്. എറണാകുളത്താണ് കൂടുതല്‍ 19 പേര്‍. കോട്ടയം 12, ആലപ്പുഴ 10, പാലക്കാട് ഒമ്പത്, മലപ്പുറം 6, കൊല്ലം, തൃശ്ശൂര്‍ ഏഴുവീതം, ഇടുക്കി 1 വീതം പേര്‍ക്കാണ് സൂര്യതാപമേറ്റത്. തിരുവനന്തപുരം ജില്ലയില്‍ വ്യാഴാഴ്ച 36.7 ഡിഗ്രി സെല്‍ഷ്യസായിരുന്നു താപനില. ഇത് ശരാശരി ഉയര്‍ന്ന താപനിലയില്‍നിന്ന് മൂന്നു ഡിഗ്രി കൂടുതലാണ്. പാലക്കാട്ട് 40.4 ഡിഗ്രിയും തൃശ്ശൂര്‍ വെള്ളാനിക്കരയില്‍ 39 ഡിഗ്രിയും പുനലൂരില്‍ 38.5 ഡിഗ്രിയും ആലപ്പുഴയില്‍ 36.2 ഡിഗ്രിയും താപനില രേഖപ്പെടുത്തി.