വെള്ളാപ്പള്ളിയുടെ പുത്ര വാത്സല്യം മറ്റെല്ലാവരേക്കാളും നമുക്ക് നന്നായി അറയാം. തുഷാര്‍ തോല്‍ക്കുമെന്ന് നൂറു വട്ടം പറയുമ്പോഴും ആ അച്ഛന്റെ മനസ് മകനൊപ്പമാണ്. അതിനാലാണ് സ്വന്തം മകനെ ക്യാമറയ്ക്ക് മുമ്പില്‍ നിര്‍ത്തി ആശിര്‍വദിച്ചത്. അത് ബുദ്ധിയുള്ള ജനങ്ങള്‍ കണ്ട് വോട്ട് നല്‍കട്ടെയെന്നാണ് വെള്ളാപ്പള്ളി ലൈന്‍. അതേസമയം അമ്മ പ്രീതി നടേശനെ ഇറക്കി ഈഴവ സമുദായത്തിന്റെ വോട്ട് ഉറപ്പിക്കാനും ശ്രമം നടക്കുന്നു. മകന് വേണ്ടി വോട്ട് പിടിക്കാന്‍ പോകുമെന്നാണ് പ്രീതി പറയുന്നത്. ഇതോടെ വെള്ളാപ്പള്ളിയും ഹാപ്പി തുഷാറും ഹാപ്പി. 

അതേസമയം വൈകിയാണ് തുഷാര്‍ തൃശൂരിലെത്തിയെങ്കിലും മത്സരം തിരിച്ചുപിടിക്കുമെന്ന വാശിയിലാണ് തുഷാര്‍ വെള്ളാപ്പള്ളി. 

ബി.ഡി.ജെ.എസ് സംസ്ഥാന പ്രസിഡന്റും എന്‍.ഡി.എ. സംസ്ഥാന കണ്‍വീനറുമായ തുഷാര്‍ വെള്ളാപ്പള്ളി തൃശൂരിലെ തെരഞ്ഞെടുപ്പു ഗോദയിലിറങ്ങുന്നത് ആത്മവിശ്വാസത്തോടെയാണ്. ബി.ജെ.പി പ്രവര്‍ത്തകരും ആഞ്ഞുപിടിക്കാനുണ്ട്. അതിലൂടെ തൃശൂരില്‍ കളമുറപ്പിക്കാനാണ് തുഷാര്‍ നോക്കുന്നത്. ഇതോടെ ശക്തന്റെ തട്ടകത്തില്‍ പ്രചാരണത്തിനു ചൂടേറും.

എന്‍.ഡി.എ. സ്ഥാനാര്‍ഥി തുഷാര്‍ വെള്ളാപ്പള്ളി ഇന്നു രാവിലെ ഒമ്പതരയ്ക്ക് വടക്കുംനാഥ ക്ഷേത്രദര്‍ശനം നടത്തും. പൂങ്കുന്നത്തു നിന്ന് അദ്ദേഹത്തെ ബൈക്കു റാലിയോടെയാണ് സ്വീകരിക്കുക. വിവിധ ക്ഷേത്രദര്‍ശനത്തിനു ശേഷം നേതാക്കളുമായി ആലോചിച്ച് പ്രചാരണരീതി തീരുമാനിക്കും. 

തുഷാര്‍ വരുന്നതോടെ പ്രചാരണത്തില്‍ ഓട്ടമത്സരത്തിനാണ് ബി.ജെ.പി. ഒരുങ്ങുന്നത്. ബി.ജെ.പി എ പ്ലസ് കാറ്റഗറിയിലുള്‍പ്പെടുത്തി വെച്ചിരുന്ന മണ്ഡലമാണ് തൃശൂര്‍. 

ഇവിടെ കെ.സുരേന്ദ്രന്‍ വരുമെന്ന പ്രതീക്ഷയില്‍ വലിയ പ്രചാരണസംവിധാനമാണ് ഒരുക്കിയത്. പലയിടത്തും ചുവരെഴുത്തുകളും കുടുംബയോഗങ്ങളും നടത്തി. അതിനിടെയാണ് സീറ്റ് ബി.ഡി.ജെ.എസിനാണെന്നു വ്യക്തമായത്.

ബി.ജെ.പി കേന്ദ്രനേതൃത്വം നിര്‍ബന്ധിച്ചാണ് തുഷാറിനെ രംഗത്തിറക്കുന്നത്. തൃശൂരില്‍ കഴിഞ്ഞനിയമസഭാ തെരഞ്ഞെടുപ്പിലെ കണക്കുവെച്ച് ബി.ജെ.പി രണ്ടുലക്ഷത്തിലധികം വോട്ടുകള്‍ നേടിയിരുന്നു. അതു വലിയ ആത്മവിശ്വാസമാണ് പാര്‍ട്ടിക്കു പകരുന്നത്. 

ശബരിമല വിഷയം കൂടി വന്നതോടെ അണികളുടെ ആവേശം ഇരട്ടിച്ചു. ച്രപാരണ രംഗത്തിറങ്ങാന്‍ വൈകിയെങ്കിലും ശക്തമായ കുതിപ്പിനാണ് എന്‍.ഡി.എ നീക്കം.

തുഷാര്‍ പ്രശസ്തനായതിനാല്‍ പ്രത്യേക പരിചയപ്പെടുത്തലിന്റെ ആവശ്യമില്ല. ബി.ജെ.പിക്കു തൃശൂരില്‍ സീറ്റില്ലെന്നു വന്നതോടെ അണികളുടെ ആവേശം ചോര്‍ന്നതു തിരികെ പിടിക്കാന്‍ നേതാക്കള്‍ അരയും തലയും മുറുക്കും.

അതേസമയം പാര്‍ട്ടി മെഷിനറി എണ്ണയിട്ട യന്ത്രം പോലെ വരുംദിവസങ്ങളില്‍ ചലിക്കുമെന്ന് ബി.ജെ.പി ജില്ലാപ്രസിഡന്റ് എ.നാഗേഷ് പറഞ്ഞു. ഏപ്രില്‍ അഞ്ചിനാണ് തെരഞ്ഞെടുപ്പു കണ്‍വന്‍ഷന്‍. 1500 കുടുംബസംഗമങ്ങള്‍ നടത്തും.