ആറു പതിറ്റാണ്ടിലേറെ കേരള രാഷ്ട്രീയത്തെ നിര്‍ണായകമായി സ്വാധീനിച്ച സമുന്നത നേതാവും സുവര്‍ണ ജൂബിലി ആഘോഷിച്ച നിയമസഭാ സാമാജികനും ബഡ്ജറ്റ് അവതരണത്തില്‍ റെക്കാഡിട്ട ധനമന്ത്രിയും കേരള കോണ്‍ഗ്രസ് ചെയര്‍മാനുമായ കെ.എം. മാണിക്ക് നാട് അന്ത്യാഞ്ജലി അര്‍പിക്കുകയാണ്. രാഷ്ട്രീയ തന്ത്രങ്ങളുടെ ചാണക്യനായിരുന്ന കെ. എം. മാണി, വലിയ ലക്ഷ്യങ്ങളുമായി ഒരു പൊതു തിരഞ്ഞെടുപ്പിന്റെ വക്കില്‍ നില്‍ക്കേയാണ് അരങ്ങൊഴിഞ്ഞത്. ഭാര്യ കുട്ടിയമ്മയുടെ കൈ ചേര്‍ത്തുപിടിച്ചാണ് അദ്ദേഹം വിടവാങ്ങിയത്.

ശ്വാസകോശ രോഗത്തിന് വര്‍ഷങ്ങളായി ചികിത്സയില്‍ കഴിഞ്ഞിരുന്ന അദ്ദേഹത്തെ കഴിഞ്ഞ വെള്ളിയാഴ്ച രാത്രിയാണ് ലേക്ഷോര്‍ ആശുപത്രിയില്‍ പ്രവേശിപ്പിച്ചത്. ചീഫ് പള്‍മണോളജിസ്റ്റ് ഡോ. ഹരി ലക്ഷ്മണന്റെ നേതൃത്വത്തിലായിരുന്നു ചികിത്സ. ശ്വസിക്കാന്‍ വിഷമം അനുഭവപ്പെട്ടിരുന്ന അദ്ദേഹം ഐ.സി.യുവിലാണ് കഴിഞ്ഞത്. വൃക്കയ്ക്കും തകരാര്‍ കണ്ടതോടെ ഡയാലിസിനും വിധേയനാക്കി. തിങ്കളാഴ്ച രാവിലെയോടെ ആരോഗ്യനില വഷളായി. രാത്രിയോടെ അല്പം ഭേദപ്പെട്ടെങ്കിലും ഇന്നലെ രാവിലെ വീണ്ടും വഷളായി. വിദഗ്ദ്ധ ഡോക്ടര്‍മാരുടെ സംഘം തീവ്രശ്രമം നടത്തിയെങ്കിലും ഉച്ചയ്ക്ക് മൂന്നോടെ അതീവഗുരുതരാവസ്ഥയിലായി. 4.57 ന് അന്ത്യം സംഭവിച്ചതായി ആശുപത്രിയിലെ ക്രിട്ടിക്കല്‍ കെയര്‍ വിഭാഗം മേധാവി ഡോ. മോഹന്‍ മാത്യു, സി.ഇ.ഒ എസ്.കെ. അബ്ദുള്ള എന്നിവര്‍ അറിയിച്ചു. ആശുപത്രിയില്‍ വൈകിട്ട് 6.40 മുതല്‍ 7.10 വരെ പൊതുദര്‍ശനത്തിന് വച്ച മൃതദേഹത്തില്‍ നേതാക്കളും പ്രവര്‍ത്തകരും ആദരാഞ്ജലി അര്‍പ്പിച്ചു.ഇന്ന് പൊതുദര്‍ശനംഇന്ന് കോട്ടയത്ത് കേരള കോണ്‍ഗ്രസ് സംസ്ഥാന ഓഫീസിലെത്തിക്കുന്ന മൃതദേഹം പിന്നീട് തിരുനക്കര മൈതാനത്ത് പൊതുദര്‍ശനത്തിന് വയ്ക്കും. വൈകിട്ട് പാലായിലെ വീട്ടിലെത്തിക്കും.ആശുപത്രിയില്‍ ജനപ്രവാഹം. മാണിയുടെ വിയോഗം അറിഞ്ഞ് നേതാക്കളും പ്രവര്‍ത്തകരും ആശുപത്രിയിലേക്ക് പ്രവഹിച്ചു. മുഖ്യമന്ത്രി പിണറായി വിജയന്‍ തിങ്കളാഴ്ച ആശുപത്രിയിലെത്തിയിരുന്നു.